ناۋرىز ايىندا ەل تۇرعىندارى 2900 گە جۋىق التىن قۇيما ساتىپ الدى

نۇر- سۇلتان. قازاقپارات - 2021 -جىلدىڭ ناۋرىز ايىندا قازاقستاندىقتار ەكىنشى دەڭگەيلى بانكتەر مەن جەكەلەگەن بانكتىك ەمەس ايىرباستاۋ پۋنكتتەرىنەن جالپى سالماعى 48,2 ك گ 2 898 قۇيما ساتىپ الدى، دەپ حابارلايدى قازاقپارات ق ر ۇلتتىق بانكىنىڭ باسپا ءسوز قىزمەتىنە سىلتەمە جاساپ.

حالىققا تازارتىلعان التىن قۇيمالاردى ساتۋ جانە ساتىپ الۋ باعدارلاماسىن 2017 -جىلى قولعا العان بولاتىن. باعدارلاما جۇزەگە اسىرىلا باستاعاننان بەرى جالپى سالماعى 1,79 توننا قۇرايتىن 50200 التىن قۇيما ساتىلدى. التىن قۇيمالاردىڭ بەس ءتۇرى ۇسىنىلعان: 5، 10، 20، 50 جانە 100 گ. تازارتىلعان التىن قۇيمالاردى ساتۋ جانە ساتىپ الۋ باعدارلاماسى ىسكە اسىرىلعالى حالىق اراسىندا ەڭ كوپ سۇرانىسقا يە بولعانى - 10 گرامدىق قۇيما. جالپى ساتىلىمداعى ونىڭ ۇلەسى %30 - 15184 دانا. ودان كەيىن 20 گرامدىق قۇيما - 10976 دانا % 22 جانە 100 گرامدىق قۇيما - 10964 دانا % 22، 5 گرامدىق قۇيما - 7305 دانا % 15) ، 50 گرامدىق قۇيما - 5771 دانا % 11.

نەگىزىنەن ولشەنگەن قۇيمالار الماتى، نۇر- سۇلتان جانە اتىراۋ قالالارىندا سۇرانىسقا يە. التىن قۇيمالار سەنىمدى ينۆەستيتسيالىق قۇرال بولا الادى. بانكتەر مەن بانكتىك ەمەس ايىرباستاۋ پۋنكتتەرىنىڭ كليەنتكە اقشاسىن تولەپ، قۇيمالاردى «كۇنبە- كۇن» ساتىپ الا الاتىن مۇمكىندىگى - التىن قۇيمالار نارىعىنىڭ وتىمدىلىگىن قامتاماسىز ەتۋدە نەگىزگى فاكتورعا اينالىپ وتىر.

باعدارلاما ىسكە قوسىلعان ۋاقىتتان بەرى جالپى سالماعى 3,75 ك گ ولشەنگەن تەك قانا 141 قۇيما ساتىپ الۋعا قابىلداندى. بۇل، ارينە، التىن قۇيمالاردىڭ ۇزاق مەرزىمدى ينۆەستيتسيالاۋ مەن جيناقتاۋ قۇرالى بولىپ تابىلاتىنىنا بايلانىستى. ءار قۇيما قورعانىس ەلەمەنتتەرىمەن (قۇيمالاردىڭ اينا بەتى، ميكروتەكست جانە رەلەفتىڭ شەتى)، قۇيمالاردى مەحانيكالىق زاقىمدانۋدان قورعايتىن جانە پاكەتتىڭ اشىلعان- اشىلماعانىن تەكسەرۋدى جەڭىلدەتەتىن ارنايى قاپتامادا شىعارىلادى. قورعانىس قاپتاماسى، سونىمەن قاتار، قۇيمانىڭ ساپا سەرتيفيكاتى بولا الادى.

سوندىقتان قۇيمانى ساقتاعاندا مۇقيات بولىپ، ورامانى اشپاعان ءجون. قازىرگى ۋاقىتتا التىن قۇيمالاردى Halyk Bank-تە، ەۋرازيالىق بانكتە، Jusan Bank-تە، بانك تسەنتركرەديتتە، سونداي- اق بانكتىك ەمەس ايىرباستاۋ پۋنكتتەرىندە ساتىپ الۋعا جانە ساتۋعا بولادى.