تۇركيادا 28 ميلليون جىل بۇرىن تىرشىلىك ەتكەن ءمۇيىزتۇمسىقتىڭ سۇيەكتەرى تابىلدى
تاسقا اينالعان جانۋاردىڭ جاسى 28 ميلليون جىل دەپ ەسەپتەلدى.
تۇركيانىڭ پايدالى قازبالاردى زەرتتەۋ جانە بارلاۋ ينستيتۋتى جانىنداعى شەحيد دجۋما داگ اتىنداعى تابيعي تاريح مۇراجايى قىزىلىرماك اۋدانىنداعى كەماللى كەنتىنىڭ ماڭىندا قازبا جۇمىستارىن 2015 -جىلدان باستاپ جۇرگىزىپ كەلەدى.
پالەونتولوگتار وسى ايماقتى زەرتتەۋگە 2014 -جىلى كىرىستى. سول جىلى جەرگىلىكتى تۇرعىن چورۋم پروۆينتسياسىنىڭ سۋنگۋرلۋ اۋدانىنان سۇيەك سىنىقتارىن تاۋىپ العان بولاتىن.
قازىرگى ۋاقىتتا قازبا جۇمىستارى كەماللى كەنتىنىڭ ماڭىندا ءجۇرىپ جاتىر.
شەحيد دجۋما داگ اتىنداعى تابيعي تاريح مۇراجايىنىڭ ومىرتقالىلار پالەونتولوگياسى توبىنىڭ باسشىسى، گەولوگيا ينجەنەرى نەشە ويال بيىلعى قازبا كەزىندە سۇيەك سىنىقتارى تۇرىندە جاڭا ولجا تابىلعانىن ايتتى.
ونىڭ ايتۋىنشا، ايماقتان شامامەن 28 ميلليون جىل بۇرىن تىرشىلىك ەتكەن الىپ ءمۇيىزتۇمسىق سۇيەكتەرى تابىلعان.
«ەل اۋماعىنان تابىلعان جەر بەتىندەگى ەڭ ءىرى سۇتقورەكتى جانۋار رەتىندە بەلگىلى الىپ ءمۇيىزتۇمسىق سۇيەكتەرى بۇل جانۋاردىڭ كوشى- قون جولدارى مەن تارالۋ ايماقتارىن انىقتاۋ تۇرعىسىندا وتە ماڭىزدى» دەيدى گەولوگ.
ويال الىپ ءمۇيىزتۇمسىق سۇيەكتەرى بۇعان دەيىن نەگىزىنەن موڭعوليا، قىتاي، ءۇندى سۋبكونتينەنتىندە جانە ورتالىق ازيادان تابىلعانىنا نازار اۋداردى.