ەلىمىزدە تاۋىق ەتى 28 پايىزعا قىمباتتادى

استانا. قازاقپارات - قازاقستاندا جىل باسىنان بەرى تاۋىق ەتىنىڭ باعاسى 28 پايىزعا، ال تاۋىق اياقتارىنىڭ قۇنى 27 پايىزعا قىمباتتاعان، دەپ حابارلايدى قازاقپارات energyprom رەسۋرسىنا سىلتەمە جاساپ.

«بيىل قاڭتار-قازان ارالىعىندا قازاقستاندا 93,3 مىڭ توننا جاڭا نەمەسە سالقىنداتىلعان قۇس ەتى ءوندىرىلدى. بۇل وتكەن جىلمەن سالىستىرعاندا 3,5 پايىزعا ارتىق. ال مۇزداتىلعان قۇس ەتىنىڭ ءوندىرىسى 109,3 مىڭ توننانى قۇرايدى. وتكەن جىلمەن سالىستىرساق 1,7 پايىز جوعارى»، - دەلىنگەن energyprom دەرەگىندە.

اتالعان رەسۋرستىڭ مالىمەتىنە سايكەس، وڭىرلەر اراسىندا مۇزداتىلعان قۇس ەتىن ءوندىرۋ بويىنشا الماتى وبلىسى كوش باستاپ تۇر.

ياعني، 54,6 مىڭ توننا نەمەسە 4,9 پايىز. كوشباسشىلار ۇشتىگىنە اقمولا جانە اباي وبلىسى كىرەدى.

سونداي-اق، سالقىنداتىلعان قۇس ەتىن ءوندىرۋ بويىنشا اقمولا وبلىسى (35,2 مىڭ توننا) الدىڭعى ورىندا. ەكىنشى ورىندا ش ق و، ال ءۇشىنشى ورىنعا الماتى وبلىسى جايعاسقان.

وتكەن جىلى ەلىمىزدە 112,5 مىڭ توننا سالقىنداتىلعان جانە 127 مىڭ توننا مۇزداتىلعان قۇس ەتى ءوندىرىلدى. دەمەك سالقىنداتىلعان قۇس ەتى 20,5 پايىزعا، ال مۇزداتىلعان قۇس ەتى 13,8 پايىزعا ارتىق.

بيىل قاڭتار-تامىز ايىنىڭ قورىتىندىسى بويىنشا جەرگىلىكتى كومپانيالار قۇس ەتى مەن ازىق-تۇلىك ونىمدەرىنە سۇرانىستى (ىشكى نارىقپەن ەكسپورتتى قوسا ساناعاندا) 67,2 پايىزعا قامتاماسىز ەتتى. 2021-جىلى 69,2 پايىزعا قامتىعان ەدى.

يمپورت ۇلەسى 30,8 پايىزدى قۇرادى. قازاقستان 84,9 مىڭ توننا «اق» ەت جانە سۋبونىمدەر اكەلدى. بۇل وتكەن جىلمەن سالىستىرعاندا 6 پايىزعا از.

ال ەكسپورتقا 8,7 مىڭ توننا ەت جىبەرىلدى، كورسەتكىش 55,6 پايىزعا از. ىشكى نارىقتا قۇس ەتى جانە قۇس ەتى ونىمدەرىن ساتۋ 4,3 پايىزعا ياعني 267,2 مىڭ تونناعا دەيىن ءوستى.

2022-جىلعى قازان ايىنىڭ قورىتىندىسى بويىنشا قازاقستاندا تاۋىق ەتى 27,9 پايىزعا، ال تاۋىق اياقتارى (وكوروچكا) 26,7 پايىزعا قىمباتتادى. وسىلايشا دۇكەندەر مەن بازار سورەسىندە تاۋىق ەتىنىڭ كەلىسى 1,4 مىڭ تەڭگە، ال تاۋىق اياقتارىنىڭ كەلىسى 1,2 مىڭ تەڭگە بولدى.

تاۋىق ەتى باعاسىنىڭ قىمباتتاۋى اسىرەسە اباي وبلىسىندا بايقالدى. ءبىر جىلدا 52,3 پايىزعا وسكەن.

سونىمەن قاتار شىمكەنت قالاسىندا 48,7 پايىزعا جانە ش ق و- دا 41,9 پايىزعا قىمباتتاعان.

كەرىسىنشە ارزان باعا الماتى وبلىسىندا تىركەلدى. اتالعان وڭىردە ءوسىم - 12,3 پايىز.

تاۋىق اياقتارىنىڭ (وكوروچكا) باعاسى ماڭعىستاۋ وبلىسىندا 54,9 پايىز، پاۆلودار وبلىسىندا 43,9 پايىزعا جانە س ق و- دا 35,7 پايىزعا قىمباتتاۋ بايقالدى.

ەلىمىزدىڭ ءىرى قالالارىنىڭ ىشىندە تاۋىق ەتى اقتاۋدا (كەلىسى 1,7 مىڭ تەڭگە)، تاۋىقتىڭ اياقتارى تۇركىستاندا كەلىسى 1,4 مىڭ تەڭگەگە قىمبات.

ەڭ ارزان تاۋىق ەتى مەن تاۋىق اياقتارى ورال قالاسىندا، كەلىسى 997 تەڭگە تۇرادى.