قازاقستان مەن پاكىستان اراسىنداعى ساۋدا اينالىمى %28 ءوستى
29 قىركۇيەك, 21:24

قازاقستان مەن پاكىستان اراسىنداعى ساۋدا اينالىمى %28 ءوستى

استانا. قازاقپارات - پرەمەر- ءمينيستردىڭ ورىنباسارى - ساۋدا جانە ينتەگراتسيا ءمينيسترى سەرىك جۇمانعارين پاكىستان يسلام رەسپۋبليكاسىنىڭ كوممەرتسيا ءمينيسترى سايد ناۆيد كامارمەن كەلىسسوز جۇرگىزدى.

بۇل تۋرالى قازاقپارات primeminister.kz سىلتەمە جاساپ حابارلايدى.

كەزدەسۋ ونلاين رەجيمدە ءوتتى، قاتىسۋشىلار اۋىل شارۋاشىلىعى سالاسىنداعى ەكىجاقتى ىنتىماقتاستىق، قازاقستاننان پاكىستانعا گاز بەن كومىر جەتكىزۋ، بانك سەكتورى سالاسىنداعى ءوزارا ءىس- قيمىل سياقتى كەڭ اۋقىمدى ماسەلەلەردى تالقىلادى. سونداي- اق تاراپتار ترانزيتتىك ساۋدا، كەدەن ىستەرىندەگى ىنتىماقتاستىق جانە اكىمشىلىك ءوزارا كومەك تۋرالى ۇكىمەتارالىق كەلىسىمدەر جوبالارىنىڭ قىر- سىرىن قاراستىردى.

كەزدەسۋ سوڭىندا سەرىك جۇمانعارين قازاقستاننىڭ ءوزارا ءتيىمدى جانە جەمىستى ىنتىماقتاستىق ورناتۋعا جانە قازاقستان- پاكىستان ديالوگىن ودان ءارى كەڭەيتۋگە نيەتتى ەكەنىن اتاپ ءوتىپ، سىندارلى جانە ناتيجەلى ديالوگ ءۇشىن العىسىن ءبىلدىردى.

2022 -جىلعى قاڭتار- شىلدە ايلارىندا قازاقستان مەن پاكىستان اراسىنداعى اۋىل شارۋاشىلىعى ونىمدەرى مەن اۋىل شارۋاشىلىعى شيكىزاتىن قايتا وڭدەۋ ونىمدەرىنىڭ تاۋار اينالىمى $12,6 ميلليوندى قۇرادى، بۇل 2021 -جىلمەن سالىستىرعاندا %28,8- عا ارتىق ($9,8 ميلليون).


جاڭالىقتار