بيىل 28 مىڭ شەتەلدىك قىزمەتكەرگە كۆوتا بەرىلگەن

استانا. قازاقپارات – ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا رەسەيدەن ەلىمىزگە قانشا ادام جۇمىس ماقساتىندا كەلگەنىن ايتتى، دەپ حابارلايدى قازاقپارات ءتىلشىسى.

«جىل باسىنان بەرى قازاقستانعا رەسەيدەن 262 مىڭعا جۋىق ادام كەلدى. ونىڭ ىشىندە 6518 ادام - «جۇمىسقا بارۋ» ماقساتىن جازعان ادامدار. بۇل وسىندا جۇمىس ىستەگىسى كەلەتىندەر تۋرالى اقپارات. ەكىنشىدەن، بىزدە 8,7 ميلليون ادام جۇمىسپەن قامتىلعان. شەتەلدەن قانشا مامان شاقىراتىنىمىزدى ەسكەرسەك، بيىل ءبىز 28 مىڭ شەتەلدىك قىزمەتكەرگە كۆوتا بەردىك، قازىر تەك 15 مىڭ ادامعا عانا رۇقسات بەرىلدى. ەۋرازەق ەلدەرى اۋماعىندا تۇراتىن ادامدارعا قاتىستى بىزدە كۆوتا جوق، قازاقستان ازاماتتارى وندا رۇقساتسىز جۇمىس ىستەي الادى جانە وسى ەلدەردىڭ ازاماتتارى بىزگە رۇقساتسىز جۇمىس ىستەۋگە كەلە الادى»، - دەپ جاۋاپ بەردى مينيستر ورتالىق كوممۋنيكاتسيالار قىزمەتىندە ءتىلشى سۇراعىنا.

ت. دۇيسەنوۆانىڭ ايتۋىنشا، ءتىپتى پاندەمياعا دەيىنگى كەزەڭدە رەسەي فەدەراتسياسىنان 24816 ادام، سودان كەيىن 2019 -جىلى - 30 مىڭ، 2020 -جىلى - 33 مىڭ، ال وتكەن جىلى - 32 مىڭعا جۋىق ادام كەلگەن.

«قازىر كەلگەندەر مەن كەتكەندەردى ەسكەرە وتىرىپ، ءبىزدىڭ قىزمەتتەرىمىزدىڭ مالىمەتتەرى بويىنشا ەلگە جۇمىس ماقساتىندا كەلگەن جانە نارىقتا جۇرگەن 25301 رەسەيلىك بار. وعان جىل باسىنان بەرى كەلگەن 6 مىڭ ادامدى قوسساق، 31 مىڭعا جۋىق رەسەيلىك جۇمىس ىستەپ ءجۇر. جالپى قازاقستانعا جۇمىسقا كەلگەن ادامداردى باقىلاۋ جۇرگىزىلىپ جاتىر، ءتيىستى اقپاراتتىق جۇيەلەر بار، ولار ءبىزدىڭ ۇلتتىق ەڭبەك نارىعىمىزعا قاتتى اسەر ەتۋى مۇمكىن دەپ قورقۋدىڭ قاجەتى جوق. بىزدە قازىر جاستارىمىزدى جۇمىسقا ورنالاستىرۋ بويىنشا ۇلكەن جۇمىس جۇرگىزىلۋدە، ازىرگە بۇكىل ەلەكتروندى ەڭبەك بيرجاسىن سيفرلاندىردىق»، - دەدى تامارا دۇيسەنوۆا.