قازاقپارات كۇنتىزبەسى: 28- قاڭتار
اتاۋلى كۇندەر
جەكە مالىمەتتەردى قورعاۋ كۇنى
جەكە مالىمەتتەردى قورعاۋ تۋرالى كونۆەنتسياعا سايكەس 28- قاڭتار مالىمەتتەردى قورعاۋ كۇنى بولىپ بەلگىلەندى. بۇل كۇندى اتاپ وتۋدەگى ماقسات - ازاماتتاردىڭ وزدەرى تۋرالى قانداي مالىمەتتەردى نە ءۇشىن جينالىپ جاتقانىنان حاباردار ەتۋ بولدى.
بۇل كۇن 2007-جىلى بەلگىلەندى جانە العاش رەت سول جىلى اتاپ ءوتىلدى.
حالىقارالىق LEGO كۇنى
LEGO كىشكەنە كىرپىشتەرىنىڭ زاماناۋي ديزاينى 1958-جىلدىڭ 28- قاڭتارىندا پاتەنتتەلگەن. بۇل داتا الەمدەگى ەڭ تانىمال كونسترۋكتورلارىنىڭ ناعىز تۋعان كۇنى دەپ سانالادى.
ەستە قالار وقيعالار
1955-جىلى قازاق ك س ر حالىق ءارتىسى اسقار توقپانوۆ قۇرمانعازى اتىنداعى الماتى مەملەكەتتىك كونسەرۆاتورياسى جانىنان تەاتر فاكۋلتەتىن اشتى.
1977-جىلى ونىڭ بازاسىندا الماتى تەاتر-كوركەمسۋرەت ينستيتۋتى قۇرىلدى.
1989-جىلى الماتى مەملەكەتتىك تەاتر-كوركەمونەر ينستيتۋتىنا قازاقستاننىڭ تۇڭعىش حالىق اعارتۋ كوميسسارى، مادەنيەت پەن ونەردى دامىتۋعا سۇبەلى ۇلەس قوسقان تەمىربەك قارا ۇلى جۇرگەنوۆتىڭ ەسىمى بەرىلدى.
1993-جىلى ت. جۇرگەنوۆ اتىنداعى الماتى مەملەكەتتىك تەاتر-كوركەمونەر ينستيتۋتى ت. جۇرگەنوۆ اتىنداعى قازاق مەملەكەتتىك تەاتر جانە كينو ينستيتۋتى بولىپ وزگەرتىلدى. قازاقستان رەسپۋبليكاسى ۇكىمەتىنىڭ 2000-جىلعى 14- اقپانداعى 236№ قاۋلىسىنا سايكەس، بۇرىنعى قازاق مەملەكەتتىك تەاتر جانە كينو ينستيتۋتى مەن قازاق مەملەكەتتىك كوركەمونەر اكادەمياسى نەگىزىندە ت. ق. جۇرگەنوۆ اتىنداعى قازاق مەملەكەتتىك ونەر اكادەمياسى قۇرىلدى.
1992-جىلى قازاقستان رەسپۋبليكاسى مەن كورەيا رەسپۋبليكاسى اراسىندا ديپلوماتيالىق قارىم-قاتىناس ورناتۋ تۋرالى حاتتاماعا قول قويىلدى.
1993-جىلى ق ر جوعارعى كەڭەسى تاۋەلسىز قازاقستان رەسپۋبليكاسىنىڭ تۇڭعىش كونستيتۋتسياسىن قابىلدادى.
1994-جىلى شىعىس قازاقستان وبلىسىنىڭ اباي اۋدانىندا ۇلى ابايدىڭ شاكىرتى، اقىن كوكباي جاناتاي ۇلى اتىنداعى قور اشىلدى.
1994 -جىلى «قازاقستان-زامان» بىرلەسكەن قازاق-تۇرىك گازەتىنىڭ بازاسىندا قازاق تىلىندەگى حالىقارالىق تاۋەلسىز اپتالىق - «تۇركىستان» گازەتىنىڭ ءبىرىنشى ءنومىرى جارىق كوردى. ءبىرىنشى باس رەداكتورى - قازاقستاننىڭ حالىق جازۋشىسى قالتاي مۇحامەدجانوۆ.
2010 -جىلى اقىن مۇزافار الىمبايەۆتىڭ سوعىس جىلدارىندا تاتارستان كومپوزيتورى ماقسۇت لاتيپوۆكە جولداعان ولەڭدەرى مەن حاتتارى استاناداعى قازاقستاننىڭ ۇلتتىق مۇراجايىنا تابىستالدى.
قولجازبالاردى تاتارستان حالقى اسسامبلەياسى ءتوراعاسىنىڭ ورىنباسارى ساعيق جاقسىبايەۆ تاپسىردى. حاتتىڭ جارتىسى ورىس تىلىندە، جارتىسى - قازاق تىلىندە، ال سوڭعى سوزدەرى لاتىن الىپبيىمەن جازىلعان.
2010 -جىلى شىمكەنت ارقىلى اعىپ وتەتىن قوشقاراتا وزەنى ايرىقشا قورعالاتىن اۋماق مارتەبەسىنە يە بولدى. 12,3 گەكتار اۋماق - وزەن باستاۋىن الاتىن بۇلاقتان قالانىڭ ورتاسىنداعى ورداباسى الاڭىنا دەيىنگى جەر بۇدان بىلاي قالالىق دەندراباقتىڭ بولىگى بولىپ سانالادى.
2015 -جىلى قازاقستان رەسپۋبليكاسىنىڭ ۇلتتىق بانكى «تايقازان»، «Amir Timur»، «بوران»، «شاكەن ايمانوۆ»، «8- ناۋرىز» جانە «باسكەتبول. وليمپيادا ويىندارى-2016» ەستەلىك مونەتالارىن شىعاردى. مونەتالار 925-سىنامالى كۇمىستەن شىعارىلعان. ماكسيمالدىق تيراجى - 3 مىڭنان 13 مىڭ داناعا دەيىن.
2015-جىلى قازاقستان «عارىش بايلانىسىنىڭ رەسپۋبليكالىق ورتالىعى» (ع ب ر و) ا ق جانە رەسەيلىك «اكادەميك م. ف. رەشەتنيەۆ اتىنداعى «اقپاراتتىق سپۋتنيكتىك جۇيەلەر» ا ا ق قازاقستاندىق «KazSat-3» جەرسەرىگىنە تاپسىرىس بەرۋشى جانە ونى دايىنداۋشى رەتىندە «KazSat-3» عارىشتىق بايلانىس جۇيەسىن قۇرۋ تۋرالى جاريالادى.
قازاقستاندا «KazSat-2» جانە «KazSat-3» عارىش اپپاراتتارىنىڭ توپتاماسى قۇرىلىپ، ەلىمىز «KazSat» سپۋتنيكتىك بايلانىس پەن حابار تاراتۋدىڭ عارىشتىق جۇيەسىنىڭ تولىققاندى يەسى اتاندى.
2017 -جىلى الماتىدا بۇكىل الەمدىك XXVIII ۋنيۆەرسيادا باستالدى. ونى حوككەيشىلەر باستاپ بەردى. سپورتتىڭ وسى تۇرىنەن ۋنيۆەرسيادا مەدالدارىن ۇلى بريتانيا، قازاقستان، كانادا، قىتاي، سلوۆاكيا، لاتۆيا جانە جاپونيا قۇرامالارى ساراپقا سالدى.
2017 -جىلى ۆەنگريانىڭ شىمكەنت قالاسىنداعى كونسۋلدىعىنىڭ اشىلۋ سالتاناتى ءوتتى. ۆەنگريانىڭ قازاقستان رەسپۋبليكاسىنداعى قۇرمەتتى كونسۋلى بولىپ «OTAU Group» كومپانياسىنىڭ پرەزيدەنتى، بەلگىلى مەتسەنات قايرات مولداسەيىتوۆ تاعايىندالدى. بۇگىنگى تاڭدا ۆەنگريا قازاقستاننىڭ شىعىس ەۋروپاداعى ەڭ بەلسەندى ەكونوميكالىق ارىپتەسى.
گەوگرافيالىق الشاقتىعىنا قاراماستان، قازاقستان ت م د ەلدەرىنىڭ اراسىندا رەسەي مەن ۋكراينادان كەيىن ماجارستان 3-ساۋدا سەرىكتەسى.
2018 -جىلى قىتايدا وتكەن Global golden chart awards سالتاناتىندا قازاقستاندىق ءانشى ديماش قۇدايبەرگەن «ۇزدىك ءارتىس» اتالىمى بويىنشا جەڭىمپاز اتاندى. سالتاناتتى شارا بەيجىڭدەگى «جۇمىسشىلار» ستاديونىندا ءوتتى. ديماش قىتاي تىلىندە ءان ايتتى.
2018 -جىلى قازاقستاندىق اكتەر، پروديۋسەر جانە رەجيسسەر سانجار ءمادي ا ق ش- تاعى «سپورت وسكارى» سىيلىعىنىڭ يەگەرى اتاندى. بەدەلدى شارا - «سپورت وسكارى» سىيلىعىن تابىستاۋ جىل سايىن ا ق ش- تىڭ نيۋ-دجەرسي شتاتىنىڭ اتلانتيك- سيتي قالاسىندا وتەدى. اكتسياعا الەمنىڭ تانىمال ساياساتكەرلەرى، بيزنەسمەندەر، اكتەرلەرى جانە سپورتشىلارى قاتىسادى.
2019 -جىلى اتىراۋدا قازاقستاننىڭ حالىق ءارتىسى، داۋلەسكەر كۇيشى قارشىعا احمەدياروۆقا ەسكەرتكىش ورناتىلدى. قارشىعا احمەدياروۆ شەبەر ورىنداۋشى عانا ەمەس، وسكەلەڭ ۇرپاقتى ونەر جولىنا باۋلىعان، ۇلتتىق سانانىڭ قالىپتاسۋىنا ۇلكەن ەڭبەك سىڭىرگەن پەداگوگ بولدى، بەس جاسىندا قولىنا العان قازاقتىڭ قاسيەتتى دومبىراسى ومىرلىك سەرىگىنە اينالدى. قارشىعا احمەدياروۆ بەلگىلى كۇيشىلەردىڭ شىعارمالارىن ورىنداپ قانا قويعان جوق، ءوزى دە 60 تان استام كۇي شىعاردى.
2020 -جىلى اقتوبەدە «التىن وردا» مەملەكەتىنىڭ 750 جىلدىق مەرەيتويىن مەرەكەلەۋ اياسىندا تانىمال باتىر جانە قولباسشى ەدىگەگە ارنالعان ەسكەرتكىش اشىلدى. ەسكەرتكىشتىڭ اۆتورى - ءمۇسىنشى جەڭىس جۇبانقوسوۆ.
2020 -جىلى قازاقستان ۇلتتىق بانكى نومينالدىق قۇنى 200 تەڭگە بولاتىن بيكولورلىق تسيركۋلياتسيالىق مونەتالاردى اينالىمعا شىعاردى. مونەتالاردىڭ سىرتقى ساقيناسى نەيزيلبەردەن جاسالعان، ىشكى ديسك نيكەل جەزدەن جاسالعان.
شەتى تەگىس جانە كەدىر-بۇدىرلى سەكتورلارى كەزەكتەسەتىن 16 ويىقپەن كوركەمدەلگەن. مونەتالاردىڭ سىرتقى جاعىنداعى ورتالىق بولىگىندە مەملەكەتتىك ەلتاڭبا، اينالدىرا - «QAZAQSTAN RESPÝBLIKASY»
دەگەن جازۋ، مونەتانىڭ تومەنگى بولىگىندە - ناقىشتالعان جىلدى بىلدىرەتىن «2020» دەگەن جازۋ بەينەلەنگەن.