قازاقپارات كۇنتىزبەسى: 28- قىركۇيەك
اتاۋلى كۇندەر
اتوم سالاسى قىزمەتكەرلەرىنىڭ كۇنى
قازاقستان رەسپۋبليكاسىنىڭ 2001-جىلعى 13- جەلتوقسانداعى «قازاقستان رەسپۋبليكاسىنداعى مەرەكەلەر تۋرالى» زاڭىنىڭ 4- بابىنا سايكەس بەكىتىلدى.
قۇتىرۋ اۋرۋىنا قارسى كۇرەستىڭ بۇكىل الەمدىك كۇنى
قۇتىرۋ اۋرۋىمەن كۇرەس جونىندەگى (ARC) قايىرىمدىلىق ۇيىمى مەن اۋرۋمەن كۇرەس جانە اۋرۋدىڭ الدىن الۋ ورتالىقتارى (CDC) (اتلانتا، ا ق ش) ۇسىنىسىمەن وتكىزىلەدى. قۇتىرۋ اۋرۋىنا قارسى كۇرەس بۇكىل الەمدىك كۇنى ادامدار مەن جانۋارلار قۇتىرۋىنىڭ زارداپتارى تۋرالى، سونداي-اق ونىڭ الدىن الۋعا جانە ونى قوزدىرۋشىلارمەن شەكتەۋ ورىندارىنداعى جانۋارلار اراسىندا كۇرەسە وتىرىپ، تامىرىنا بالتا شابۋعا بولاتىنى، ءتيىستى جۇمىس جۇرگىزسە قانشالىقتى جەڭىل ەكەنى جايلى جۇرتشىلىقتى حاباردار ەتۋگە ارنالعان.
حالىقارالىق اقپاراتقا قولجەتىمدىلىك كۇنى
ب ۇ ۇ- نىڭ ەستەلىك كۇنى يۋنەسكونىڭ 2015-جىلعى 17- قاراشاداعى قارارىمەن بەلگىلەنگەن.
ونىڭ ماقساتى - الەمدىك قوعامداستىقتىڭ نازارىن اقپاراتقا قوعامدىق قول جەتىمدىلىكتى قامتاماسىز ەتۋ جانە ادامنىڭ نەگىزگى بوستاندىقتارىن قورعاۋ قاجەتتىلىگىنە اۋدارۋ.
ەستە قالار وقيعالار
1995-جىلى قازاقستان پرەزيدەنتى نۇرسۇلتان نازاربايەۆ رەسپۋبليكاداعى سايلاۋ تۋرالى كونستيتۋتسيالىق زاڭ كۇشى بار جارلىققا قول قويدى. بۇل جارلىققا سايكەس، ەل پارلامەنتى 2 پالاتادان تۇراتىن جانە كاسىبي نەگىزدە جۇمىس ىستەيتىن بولىپ بەلگىلەندى.
1996 -جىلى الماتىداعى كەڭسايدا جازۋشى ورالحان بوكەيەۆتىڭ زيراتىنا ەسكەرتكىش ورناتىلدى.
1999 -جىلى اقتاۋ قالاسىندا الاشوردا قايراتكەرى مۇستافا شوقايعا ارنالعان ەسكەرتكىش اشىلدى.
2000 -جىلى الماتىدا تۇركىستانعا 1500 جىل تولۋى مەن مادەنيەتتى قولداۋ جىلىنا وراي ەكى كۇندىك «ءال-فارابي مۇرالارى جانە الەم مادەنيەتى» اتتى حالىقارالىق كونگرەسس ءوتتى. بۇل ءىس-شاراعا رەسەي، سيريا، يران، تۇركيا، ورتالىق ازيا ەلدەرى مەن قازاقستاننىڭ جەتەكشى ءال-فارابي تانۋشى ماماندارى قاتىسقان.
2005-جىلى تسيۋريح قالاسىندا قازاقستان-شۆەيتساريا قاۋىمداستىعى سالتاناتتى تۇردە اشىلدى.
قاۋىمداستىق ەكى ەلدىڭ ساياساتكەرلەرى مەن كاسىپكەرلەرىن بىرىكتىرەدى، ماقساتى - ءار ءتۇرلى سالاداعى ەكى جاقتى ىنتىماقتاستىقتى نىعايتۋ.
2006-جىلى ا ق ش- قا رەسمي ساپارمەن بارعان ەلباسى نۇرسۇلتان نازاربايەۆ ۆاشينگتونداعى قازاقستان ەلشىلىگىنىڭ الدىنا قويىلعان قازاقستان رەسپۋبليكاسى تاۋەلسىزدىك مونۋمەنتىن اشتى.
بۇل شاراعا ا ق ش- تىڭ ەنەرگەتيكا ءمينيسترى س. بودمان مەن قازاقستاننىڭ ا ق ش- تاعى ەلشىسى قانات ساۋدابايەۆ جانە ا ق ش كونگرەسىنىڭ مۇشەلەرى مەن قازاقستان دەلەگاتسياسىنىڭ وكىلدەرى قاتىستى.
2006 -جىلى جامبىل وبلىستىق تاريحي-ولكەتانۋ مۇراجايىنىڭ قورى تاعى ءبىر بىرەگەي جادىگەر - اقسۋ- جاباعىلى قورىعىندا تابىلعان جىل ساناۋعا دەيىنگى VII - IV عاسىرلاردا جاسالعان مەتال قازانمەن تولىقتى.
تاۋدا ومارتاسى بار تاراز قالاسىنىڭ تۇرعىنى سەرگەي كۋدريننىڭ كوزى جەردەن شوشايىپ شىعىپ تۇرعان تەمىر زاتقا تۇسەدى. سويتسە ول سىيىمدىلىعى 17 ليترلىك 15 كەلى تارتاتىن بىرنەشە مەتالداردىڭ بالقىماسىنان جاسالعان قازان بولىپ شىقتى.
وبلىستىق مۇراجاي ماماندارىنىڭ پايىمداۋىنشا، بۇل قازان كونە زاماندا اقسۋ-جاباعىلى قورىعىنىڭ اۋماعىندا ورنالاسقان ءبۇتىن كەشەننىڭ ءبىر بولشەگى بولۋى مۇمكىن.
2011-جىلى وڭتۇستىك كورەيانىڭ داەدجون قالاسىندا كورەيا-قازاقستان تەحنولوگيالىق ىنتىماقتاستىق ورتالىعىنىڭ اشىلۋ سالتاناتى بولىپ ءوتتى. ورتالىقتىڭ نەگىزگى فۋنكتسيالارى - اقپارات تاراتۋ، ينۆەستورلار، سەرىكتەستەر مەن تەحنولوگيالار ىزدەستىرۋ، بىرلەسكەن عىلىمي-زەرتتەۋ جانە يننوۆاتسيالىق جوبالاردى ۇيلەستىرۋ، يننوۆاتسيالاردى قۇرۋ جانە باسقارۋ سالاسىندا كادرلاردى دايارلاۋ جانە دامىتۋ بويىنشا بىرلەسكەن باعدارلامالاردى ۇيىمداستىرۋ ارقىلى ەكى ەلدىڭ كومپانيالارى اراسىندا ىنتىماقتاستىق ورناتۋ.
2012-جىلى استاناداعى رەسپۋبليكا داڭعىلىنان بارايەۆ كوشەسىنە دەيىن سوزىلاتىن كوشەگە قازاقستاننىڭ حالىق سۋرەتشىسى اۋباكىر يسمايلوۆتىڭ اتىن بەرۋ سالتاناتى ءوتتى. بۇل - ەلوردادا سۋرەتشىنىڭ اتىمەن اتالعان العاشقى كوشە. اۋباكىر يسمايلوۆ - قازاقستاننىڭ ەڭبەك سىڭىرگەن ونەر قايراتكەرى، ءبيشى، جىرشى، رەجيسسەر، سۋرەتشى، قويۋشى، كينو اكتەرى، سۋىرىپ سالما مۋزىكانت، فولكلور جيناقتاۋشىسى.
قازاقستان رەسپۋبليكاسىنىڭ حالىق ءارتىسى 1913-جىلى قاراعاندى وبلىسىنداعى دولينكي اۋىلىنىڭ جانىنداعى 6№ اۋىلدا دۇنيەگە كەلگەن. اۋباكىر يسمايلوۆ قازاقستاننىڭ بەينەلەۋ ونەرىنە ⅩⅩ عاسىردىڭ 30-جىلدارىندا كەلدى. ونىڭ بۇكىل شىعارماشىلىق ءومىرى ەلدىڭ بەينەلەۋ ونەرىنىڭ پايدا بولۋى مەن قالىپتاسۋ تاريحىمەن ۇزدىكسىز بايلانىستا بولدى.
2015 -جىلى اقسۋ قالاسىندا الەمدىك رەكورد ورناتىلىپ، گيننەستىڭ رەكوردتار كىتابىنا ەنگىزىلدى. جەرگىلىكتى تۇرعىندار 4 توننا 250 كەلى تامىرلى كوكونىستەردى وڭدەپ، 54 قازاندىقتا 19 مىڭ 254 پورتسيا فري كارتوبىن قۋىردى. دايىن بولعان تاعام فەستيۆال سيمۆوليكاسىمەن پورتسيالىق پاكەتتەرگە سالىنىپ بەرىلدى. ولاردى 150 ەرىكتى داياشى مەيرام قاتىسۋشىلارىنا تاراتىپ بەردى.
2015-جىلى ەستۋ قابىلەتى بۇزىلعان بالالارعا ارنالعان پاۆلودار مەكتەپ-ينتەرناتىنىڭ «جاڭا تولقىن» بالالار شىعارماشىلىق ستۋدياسىنىڭ تاربيەلەنۋشىلەرى كاميل اللاياروۆ، ماحاببات يساحانوۆا، تولعاناي مايكەنوۆا كالينينگراد وبلىسىنىڭ زەلەنوگراد قالاسىندا وتكەن DEAF « يانتارنىە زۆەزدى» IV حالىقارالىق فەستيۆالىندە التىن كۋبوك پەن جەڭىمپاز ديپلومىن جەڭىپ الدى.
قازاقستاندىق قاتىسۋشىلار «سالەم ساعان، قازاقستان»، «ءان ايتايىق» جانە ەكى كۇلدىرگى «شتانگيست»، «فوتوگراف» اندەرىن ورىنداپ، قازىلار القاسى ۇزدىك دەپ تانىلدى.
2017-جىلى «تۋعان جەر» مەملەكەتتىك باعدارلاماسىن جۇزەگە اسىرۋ اياسىندا پاۆلودار مەملەكەتتىك پەداگوگيكالىق ينستيتۋتىنداعى «مارعۇلان ورتالىعى» اۋماعىندا 18- عاسىرداعى كورنەكتى ساياساتكەر سۇلتانمۇحامەد باحادۋرعا ارنالعان سالتاناتتى تۇردە قايتا جوندەۋدەن وتكەن عيمارات اشىلدى. ول ەل اراسىندا سۇلتانبەت سۇلتان دەپ تانىلعان.