كەستە تىگۋدەن 28 پاتەنت العان كەلىنشەك - شەتەلدەگى قازاق ءتىلدى ب ا ق- قا شولۋ

نۇر-سۇلتان. قازاقپارات - «قازاقپارات» ح ا ا ادەتتەگىدەي شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

مۇز-مۇسىندەر جارىسىندا موڭعوليانىڭ «مەنى قۇتقارىڭىز!» جۇمىسى ەرەكشە بولدى - kazakh.people.com.cn 

13- قاڭتاردا 25-حالىقارالىق قارلى مۇسىندەر كونكۋرسى حاربين قالاسىندا ءوتتى. الەمدىك سايىسقا 10 ەل مەن ولكەلەردەن 25 كوماندا قاتىستى، دەپ حابارلايدى kazakh.people.com.cn .

بۇل حالىقارالىق جارىستا يندونەزيادان كەلگەن سايىسكەرلەر توبى «باليداعى جاس جۇبايلار» قار مۇسىنىمەن شەبەرلىكتىڭ ەڭ ۇزدىك ماراپاتىن جەڭىپ الدى. ايتسە دە، كوپشىلىكتىڭ ەرەكشە ىقىلاسىنا بولەنگەن موڭعوليا كومانداسىنىڭ «مەنى قۇتقارىڭىز!» اتتى مۇسىندىك جۇمىستارى بولىپ وتىر. موڭعوليا كومانداسىنىڭ جۇمىسى ءبىرىنشى ورىنعا لايىق دەپ باعالانعان. «موڭعوليا كومانداسىنىڭ سايىسكەرلەرى دايىنداعان «مەنى قۇتقارىڭىز» قار ءمۇسىنى اۆسترالياداعى ورمان ورتىندە اۋىر زارداپ شەككەن كوپتەگەن جابايى جانۋارلار جونىندە ەكەن. ماعىناسى قورشاعان ورتانى قورعاۋ»، دەپ جازادى قىتايلىق اقپارات كوزى.

اتالعان حالىقارالىق باسەكەدە قىتايداعى حەيلۋنتسزيان زاماناۋي ونەر ينستيتۋتىنىڭ كونكۋرسقا قاتىسۋشىلارى «الەمدى ساقتاڭىز» اتتى قار مۇسىنىمەن ەكىنشى جۇلدەنى جەڭىپ السا، رەسەيدىڭ «ۆلاديۆوستوك» كومانداسىنىڭ سايىسكەرلەرى «كارناۆال- ماسكا شەرۋى» قار مۇسىنىمەن ءۇشىنشى ورىندى يەلەنگەن. وڭتۇستىك كورەيانىڭ ميكاسا قالاسىنان كەلگەن «Samcheok City» كومانداسىنىڭ سايىسكەرلەرىنىڭ «باياۋ ەستەتيكا» قار ءمۇسىنى ارنايى سىيلىققا يە بولدى، دەپ جازادى قىتايلىق ب ا ق.

شاحمات ماماندىق رەتىندە وقىتىلادى - TRT

تۇركيانىڭ دۋزجە ۋنيۆەرسيتەتىندە سپورت عىلىمدارى فاكۋلتەتىندە شاحمات «ماماندىق ءبىلىمى» رەتىندە وقىتىلادى، دەپ حابارلايدى تۇركيا راديو تەلەۆيزيا پورتالى.

اقپارات كوزىنىڭ دەرەگىنە سۇيەنسەك، دۋزجە ۋنيۆەرسيتەتى سپورت عىلىمدارى فاكۋلتەتىنىڭ جاتتىقتىرۋشىلىق كافەدراسىندا ستۋدەنتتەر شاحماتتى «ماماندىق ءبىلىمى» رەتىندە تاڭداي الادى. 4 ءبىلىم بەرۋ ماۋسىمىندا 224 ساعات شاحمات ساباعىن الادى، 196 ساعات شاحمات جاتتىقتىرۋشىلىعى باقىلاۋى مەن تاجىريبەسىنەن وتەدى.

«شاحماتتى ماماندىق رەتىندە تاڭداعان ستۋدەنتتەر ءبىلىم العاننان كەيىن تۇركيا شاحمات فەدەراتسياسىنان «3- دارەجەلى شاحمەت جاتتىقتىرۋشىسى قۇجاتىن الادى»، دەپ جازادى تۇركيالىق ب ا ق.

قابا اۋدانىندا 10 مىڭنان استام كەلىنشەك كەستە تىگەدى - «اعاجاي- التاي» پورتالى

قىتايدىڭ قابا اۋدانىندا ون ساۋساعىنان ونەر تامعان كەستەشى قىزـكەلىنشەك كوپ، ءبىراق، كەستەدەن 28 پاتەنت كۋالىگىن العان تەك باقىتگۇل ىعيسا قىزى عانا. جايىلما اۋىلى اقتوبە قىستاعىنداعى وزگە كەستەشى ايەلدەرى باقىتگۇلدىڭ تالانتىن دا مويىندايدى، دەپ جازادى «اعاجاي-التاي» پورتالى.

ونىڭ ەكى ءتۇرلى سەبەبى بار. ءبىرىنشى، باقىتگۇلدىڭ كەستەشىلىك ونەرىندە ىسمەرلىگىمەن بىرگە كەستەسى شەبەر جوبالانعان. ەندى ءبىرى، جوبالاعان كەستەسىنىڭ ءبىلىم مەنشىك قۇقىعىن زاڭدىق قورعاۋ تانىمى كۇشتى، دەپ جازادى altxw.com.

قىتايلىق ب ا ق- تىڭ مالىمەتىنشە، باقىتگۇل وزگەشە جوبالاعان كەستەلەرىنە پاتەنت قۇقىعىن العاندىقتان ونىڭ كەستەلەرىنىڭ «كوشىرمە» نۇسقاسى بازاردان كەزىكپەيدى. قىسقاسى، ونىڭ ءاربىر تىككەن كەستەسىنىڭ جوباسى ءبىر وزىنە عانا تيەسىلى. سول سەبەپتى، كوپتەگەن ادامدار باقىتگۇلدى ارنايى ىزدەپ كەلىپ تاپسىرىس بەرىپ، قاجەتتى بۇيىمىن تىككىزەدى. اسىرەسە، ۇزاتىلاتىن قىزدار ونىڭ كەستەلى بۇيىمدارىمەن وتاۋىن بەزەندىرۋدى ادەتكە اينالدىرعان. ويتكەنى، ولار باقىتگۇلدىڭ كەستەلەنگەن بۇيىمدارى ەشكىمگە ۇقسامايتىن ۇلگىمەن تىگىلەتىنىن بىلەدى.

باقىتگۇل «ءوزىم جوبالاعان كەستەنىڭ ۇلگىسى نەگە وزىممەن ەش قاتىسى بولماۋى كەرەك؟» دەپ ويلاپ، التاي ايماقتىق عىلىم-تەحنيكا مەكەمەسىنە بارىپ، كاسىبي قىزمەتكەرلەردەن كەڭەس الىپ، ءوزىنىڭ كەستە جوباسى ءۇشىن پاتەنتكە ءوتىنىش ەتۋى كەرەك ەكەندىگىن بىلەدى. ءسويتىپ، ول ءوزى جوبالاعان كەستە ورنەكتەرىنە 2013-جىلى تۇڭعىش رەت پاتەنتتىك كۋالىك الدى. سودان بەرى باقىتگۇل كەستە جوبالارىن 28 رەت پاتەنتتەگەن.

ول كەستەلى بۇيىم جونىندەگى تۇسىنىگىن، سونداي-اق پاتەنت قۇقىعىن الۋدىڭ ماڭىزدىلىعىن كەستەشى قۇربىلارىنا ۇنەمى ايتادى. قازىرگە دەيىن باقىتگۇل 1000 نان استام كەستەشى تاربيەلەگەن.

«مەن قازاقتىڭ كەستەشىلىك ونەرىن جالعاستىرۋشىنىڭ ءبىرىمىن. قولمەن كەستە تىگۋ وڭاي ەمەس. مىسالى، 1,8 مەتر ۇزىندىقتاعى توسەك جاپقىشتى تىگۋگە جارتى ايدان استام ۋاقىت كەتەدى، ماشاقاتتى بولعانىمەن تىككەن بۇيىمى كەستەشىنىڭ ىسىمەرلىگىن ايگىلەيدى. پاتەنتكە ءوتىنىش ەتۋ ءوزىڭ جوبالاعان بۇيىمدى قورعاۋ، ونان دا ماڭىزدىسى ءداستۇرلى قولونەرگە كورسەتكەن ىزەت-قۇرمەتىڭ»، دەيدى باقىتگۇل ىعيسا قىزى.

سوندىقتاندا جىلىنا بىرنەشە كەستە ۇلگىسىن پاتەنتتەتۋ ونىڭ ءومىر داعدىسىنا اينالعان.

«قازىر قابا اۋدانىندا كەستە تىگەتىن 10 مىڭنان استام ايەل بار. كەستە ونىمدەرىنەن تۇسكيىز، ساندىق قاپ، كيىمـكەشەك، اشەكەي بۇيىمدارى قاتارلى 50 نەشە ءتۇرى بار. سونىمەن بىرگە، قابا اۋدانى كەستەشىلىك كووپەراتيۆىن قۇرۋ، كۋرس اشۋ قاتارلى تاسىلدەر ارقىلى ۇلتتىق ونەردەن ماركالىق برەند جاساپ، كەستەشىلىك كاسىبىن دامىتۋدا»، دەپ تۇيىندەيدى «اعاجاي-التاي» پورتالى.

سپورتتىق شارالار ايماقتىڭ 80 جىلدىعىنا ارنالادى - kaznews

وسى اپتادا kaznews.mn اقپاراتتىق پورتالىندا، بايان-ولگەي ايماعىنىڭ دەنە شىنىقتىرۋ، سپورت باسقارماسىنىڭ باستىعى قاينار قايساناي ۇلىمەن وتكىزگەن سۇحباتى جارىق كوردى.

سۇحباتتا بايان- ولگەي ايماقتىق سپورت باسقارماسىنىڭ باسشىسى قاينار مىرزا قازاقتار كوپ قونىستانعان ءوڭىردىڭ وتكەن جىلعى جانە ودان بۇرىنعى ۋاقىتتارداعى سپورت سالاسىندا جەتكەن جەتىستىكتەرى تۋرالى كەڭىنەن توقتالعان. اتاپ ايتار بولساق، 2019-جىلى جالپى سپورت تۇرلەرىنەن ەرەسەكتەر اراسىندا 17، جاستار جانە جاسوسپىرىمدەر اراسىندا 21، جوسپاردان تىس 20 داي، بارلىعى 60 تاي سپورتتىق شارالار ۇيىمداستىرىلعان ەكەن. ايماقتىق دەنە شىنىقتىرۋ، سپورت باسقارماسىنىڭ باستىعى بۇل اڭگىمەسىندە وزدەرىندە بار سپورت سەكتسيالارى تۋرالى دا ايتقان. «ايماعىمىزدا موڭعولدىڭ ۇلتتىق كۇرەسى، باسكەتبول، ۆولەيبول، بوكس، زىلتەمىر، تاەكۆوندو، كاراتە، دزيۋ-دو، ۇستەل تەننيسى، شاعىن فۋتبول، سونداي-اق دەنە شىنىقتىرۋ باعىتىنداعى فيتنەس زالدارى قاتارلى 13 ءتۇرلى سەكسيا تۇراقتى جۇمىس جاسايدى»، دەيدى قاينار قايساناي ۇلى.

اتالعان سۇحباتتىڭ سوڭى بايان- ولگەي ايماعىنىڭ سپورتىنا ۇلەس قوسىپ كەلە جاتقان بەيرەسمي وداق، فەدەراتسيالاردىڭ ۇلەسى ەرەكشە ەكەنىن ايتۋمەن اياقتالعان. «ءبىزدىڭ ايماعىمىزدا بۇگىنگى مالىمەتپەن 30 عا تارتا سپورتتىق بەيرەسمي وداق، فەدەراتسيالار جۇمىس ىستەيدى. سوندىقتان، وسى ۇيىمداردى باسقارۋشى ازاماتتاردىڭ اتى-ءجونىن تۇگەندەپ، جەكە-جەكە العىس ايتۋعا بۇل سۇحباتىمدا مۇمكىندىك از... سپورتقا دەگەن جاناشىرلىقتارى ءۇشىن بارىنە دە ريزاشىلىعىمدى، اقجارما العىسىمدى بىلدىرەمىن!» دەپ ويىن تۇيىندەيدى ايماقتىق سپورت باسقارماسىنىڭ باسشىسى ق. قايساناي ۇلى.

وزبەكستاندا جۋرناليست قىزمەتىنە كەدەرگى كەلتىرگەنى ءۇشىن جاۋاپكەرشىلىك كۇشەيتىلمەك - «ءو ز ا» اقپاراتتىق اگەنتتىگى

قازىرگى تاڭدا قوعامعا جىلدام ءارى شىنايى اقپارات تاراتۋ مەن وقيعانىڭ كەلىپ شىعۋ سالدارىن انىقتاۋدا جۋرناليستكە كەدەرگى جاساۋ فاكتىلەرى بۇكىل الەمدە ورىن الىپ جاتقان سوراقى جاعداي ەكەنى بەلگىلى. وزبەكستان ۇكىمەتى وسى جاعدايدى بولدىرماۋ جانە جۋرناليستەردىڭ مارتەبەسىن كوتەرمەلەۋ مەن ولار قۇقىعىن قورعاۋ ماقساتىندا «ولي ءماجليستىڭ» اكىمشىلىك جاۋاپكەرشىلىك تۋرالى كودەكسىنە تولىقتىرۋلار ەنگىزۋ تۋرالى زاڭ جوباسى كوپشىلىكتىڭ تالقىلاۋىنا جاريالادى. بۇل تۋرالى ءو ز ا اقپارات اگەنتتىگى جازادى.

«اتاۋلى قۇجات بويىنشا، 1994-جىل 22- قىركۇيەكتە قابىلدانىپ 2015-XII- ساندى زاڭمەن بەكىتىلگەن وزبەكستان رەسپۋبليكاسىنىڭ اكىمشىلىك جاۋاپكەرشىلىك تۋرالى كودەكسىنە ءبىرقاتار تۇزەتۋلەر مەن قوسىمشالار ەنگىزىلەدى. اتاپ ايتقاندا، 197-5- باپپەن تولىقتىرىلىپ، جۋرناليستىك قىزمەتكە كەدەرگى جاساۋ، اقپارات تاراتۋىنا نەمەسە تاراتۋدان باس تارتۋعا ماجبۇرلەۋ، اككرەديتتەۋدەن باس تارتۋعا نەمەسە اككرەديتتاتسيانى ورىنسىز جارامسىز ەتۋگە، جۋرناليستىڭ سۇراق قويۋى جانە قاجەتتى اقپاراتتى الۋ قۇقىعىن بۇزۋعا، جۋرناليستىڭ ماتەريالدارى مەن جۇمىس قۇرال جابدىقتارىن زاڭسىز الىپ قويۋ نەگىزدەرى بازالىق ەسەپتەۋ مولشەرىنىڭ ەكى دەن بەس ەسەلەنگەن مولشەرىندە ايىپپۇل سالۋعا اكەپ سوعادى. ەسكە سالا كەتسەك، ولي ءماجليستىڭ زاڭ پالاتاسى دەپۋتاتى راسۋل كۋشەربايەۆ بۇل ماسەلەدە اسا كوڭىلى تولمايىنىن جەتكىزىپ، «جۋرناليستەرگە قىسىم كورسەتكەن كىسى زاڭ اياسىندا جازالانۋى ءتيىس، كەشىرىم سۇراۋمەن قۇتىلىپ كەتۋى كەرەك ەمەس» دەپ ايتقان ەدى»، - دەلىنگەن اگەنتتىك سايتىنداعى اقپاراتتا.

اۆتور: بەيسەن سۇلتان