بۇگىن - قازاقستان تاۋەلسىزدىگىنە 28 جىل
قازاقستان س س ر و تاراعاننان كەيىن اراعا 8 كۇن سالىپ، تاۋەلسىزدىگىن جاريالادى. قازاقستاننىڭ دەربەس ەل بولعانىن العاشقى اقپارات قۇرالدارىنىڭ ءبىرى بولىپ الەمگە «قازاقپارات» حالىقارالىق اقپارات اگەنتتىگى (قازتاگ) حابار تاراتقان بولاتىن.
«تاۋەلسىزدىكتىڭ ءبىزدىڭ بارىمىزگە ارتار مىندەتى مول. ەندى ەڭسەلى ەل بولۋدىڭ جولىنا شىنداپ ءتۇسۋىمىز كەرەك. اۋلەتىمىزدىڭ اسۋى دا، داۋلەتىمىزدىڭ تاسۋى دا ءوز قولىمىزدا. كەڭ-بايتاق جەرىمىزدىڭ بايلىعى وسى دالانىڭ تۇپكىلىكتى حالقىنا دا، تاعدىر قوسىپ بىرگە ءومىر ءسۇرىپ جاتقان وزگە ۇلت وكىلدەرىنە دە مولىنان جەتەدى. نە ىستەسەك تە اقىلمەن ىستەيىك، ارزان ۇرانعا ەرمەيىك، ۇشپا سەزىمگە ەرىك بەرمەيىك دەگىم كەلەدى»، - دەدى نۇرسۇلتان نازاربايەۆ 17- جەلتوقساندا الماتىداعى ورتالىق الاڭدا قازاقستان رەسپۋبليكاسىنىڭ مەملەكەتتىك تاۋەلسىزدىگى جاريالانۋىنا وراي وتكىزىلگەن جيىندا.
قازاقستاننىڭ تاۋەلسىزدىگىن رەسمي تۇردە ەڭ العاش بولىپ امەريكا قۇراما شتاتتارى مويىنداعان ەدى. ودان كەيىن قىتاي، ۇلى بريتانيا، موڭعوليا، فرانسيا، جاپونيا، وڭتۇستىك كورەيا جانە يران يسلام مەملەكەتى قازاقستاندى تاۋەلسىز مەملەكەت رەتىندە مويىنداپ، تانىدى. تۇركيا العاش بولىپ قازاقستاندا ءوز ەلشىلىگىن اشتى.
تاۋەلسىزدىك كۇنى - 1991-جىلعى 16- جەلتوقساندا قازاقستان رەسپۋبليكاسىنىڭ پرەزيدەنتى ن. ءا. نازاربايەۆ قول قويعان «قازاقستان رەسپۋبليكاسىنىڭ مەملەكەتتىك تاۋەلسىزدىگى تۋرالى» جانە 2001-جىلعى 13- جەلتوقسانداعى «قازاقستان رەسپۋبليكاسىنداعى مەرەكەلەر تۋرالى» قازاقستان رەسپۋبليكاسى زاڭدارىنا (2008-جىلعى 25- ماۋسىمداعى جانە 2009-جىلعى 22- ساۋىردەگى زاڭدارمەن وزگەرتۋلەر ەنگىزىلگەن) سايكەس اتالىپ وتەدى.
ايتسە دە، بۇل كۇندى قاتارداعى مەرەكەلىك داتا رەتىندە قاراۋعا كەلمەس. بۇل تۋرالى ەلباسى ن. نازاربايەۆ: «مەنىڭشە، تاۋەلسىزدىك كۇنى تەك رەسمي بەكىتىلگەن مەرەكەلىك داتا عانا بولۋعا ءتيىستى ەمەس. بۇل كۇننىڭ ودان اناعۇرلىم ماڭىزى ۇلكەن مازمۇنى بار. ول تاۋەلسىزدىك جولىنداعى كۇرەستىڭ نۇكتەسىن قويۋمەن بىرگە، ونىڭ باستالعان كۇنى دە بولدى. بۇگىن ءار قازاقستاندىق ونى ءوزىنىڭ جەكە تاۋەلسىزدىگى مەن تابىستى كۇنى ەسەبىندە مەرەكەلەي الادى» دەگەن بولاتىن.
قازاقستان تاۋەلسىزدىك العاننان سوڭ حالىق ىنتىماقتاسىپ، جالپى ۇلتتىق، ۇلتارالىق بىرلىكتى نىعايتۋعا، رۋحاني—مادەني جاڭعىرۋعا قول جەتكىزىلدى. قىسقا مەرزىمدە تاۋەلسىز رەسپۋبليكامىز سوۆەت يمپەرياسىنان مۇرا بولىپ قالعان كوپتەگەن وتكىر دە وزەكتى ماسەلەلەردىڭ شەشىمىن تاۋىپ، ساياسي، ەكونوميكالىق جانە الەۋمەتتىك-مادەني سالالارعا دا رەفورمالار جۇرگىزىلدى. بۇگىن دە قازاقستان ەكونوميكاسى دامىعان، بىرنەشە حالىقارالىق ۇيىمداردىڭ مۇشەسى، الەمدىك ساحنادا وزىندىك ىقپالى بار مەملەكەتكە اينالىپ وتىر.
مەرەيلى ەل بولعانىمىزدى اقوردادا ءبىرقاتار ازاماتقا مەملەكەتتىك ناگرادالاردى تاپسىرۋ بارىسىندا ق ر پرەزيدەنتى قاسىم-جومارت توقايەۆ تا اتاپ وتكەن بولاتىن. مەملەكەت باسشىسىنىڭ ايتۋىنشا، بۇل - تاريحي ۇدەرىستەرىمىزدىڭ باستاۋى، ۇلى مەيرام.
«بۇكىل ەلىمىز ءۇشىن مۇنان اسقان ايتۋلى كۇن، ماڭىزدى مەرەكە جوق. تاۋەلسىزدىك ۇلتىمىزدىڭ باعا جەتپەس بايلىعى. ءبىزدىڭ بۋىن ەلباسى نۇرسۇلتان نازاربايەۆتىڭ سارابدال ساياساتىنىڭ ارقاسىندا حالقىمىزدىڭ اسقاق ارمانىن اقيقاتقا اينالدىردى. بايراقتى بابالارمىز بىزگە ۇلان- بايتاق جەردى مۇرا ەتىپ قالدىردى. ولاردىڭ اماناتىنا ادال بولۋ - بارشامىزدىڭ كيەلى پارىزىمىز. ازاتتىق ءۇشىن الىسىپ، ەل ءۇشىن جان پيدا ەتكەن باتىرلاردىڭ ەرلىگى ەشقاشان ۇمىتىلمايدى»، - دەدى مەملەكەت باسشىسى.