الماتىداعى 28 مىڭ جىلدىق تاريحى بار ساق قورعاندارى ارحەولوگيالىق كەشەنى كوپشىلىككە تانىستىرىلدى - فوتو
اشىق اسپان استىنداعى ارحەولوگيالىق پارك «بولاشاققا باعدار: رۋحاني جاڭعىرۋ» قوعامدىق سانانى جاڭعىرتۋ باعدارلاماسى اياسىندا ۇيىمداستىرىلعان.
قازىرگى الماتىدا ورنالاسقان جەردىڭ تاريحى 28000 جىلدان اسادى. كليماتىنىڭ جايلى، توپىراعىنىڭ قۇنارلى جانە سۋىنىڭ مول بولۋىنىڭ ارقاسىندا بۇل جەر ەشقاشاندا بوس جاتپاعان. بۇعان ارحەولوگيالىق قازبالار بارىسىندا تابىلعان كوپتەگەن زاتتار دالەل. شامامەن ب. ز. دەيىنگى X عاسىردان باستاپ بۇل جەردە ءىرى كوشپەلى تايپالار - ساقتار پايدا بولعان، كەيىننەن بۇلاردى ۇيسىندەر الماستىردى.
بورالداي ايماعىندا ەجەلگى ساقتاردىڭ قورىمدارى مەن بۇرىنعى تۇرعىن جايلارى ءجيى كەزدەسەدى.
بورالداي ساق قورعاندارى - الماتى اۋماعىندا ەرتە تەمىر عاسىرىنان ساقتالعان جالعىز ەسكەرتكىش. ول قالانىڭ الاتاۋ اۋدانىندا، ۇلكەن الماتى مەن بورالداي وزەندەرىنىڭ اراسىندا، اۋەجايعا جاقىن جەردە ورنالاسقان. مۇندا كونە قورىم بار، ونىڭ تاريحى ەكى جارىم مىڭ جىلدان اسىپ جىعىلادى. ارحەولوگيالىق كەشەن 47 ساق جانە ءۇيسىن قورعاندارىنان تۇرادى. ولاردىڭ ەڭ ۇلكەنىنىڭ بيىكتىگى 14 مەتر، ال ديامەترى 100 مەتردەن اسادى.
بۇرىنعى ساق تايپاسىنىڭ ءومىرى جاڭعىرتىلعان «بورالداي ساق قورعاندارى» پاركىندە ەكى باستى نىسان - ورتاسىنان جارىلعان قورعان مەن ەجەلگى ساق تۇرعىن ءۇيىنىڭ ماكەتىن كورۋگە بولادى.
كەلۋشىلەر ۋاقىتتى انىقتاۋ ءۇشىن قولدانىلعان كۇن ساعاتتى جانە قايتا قۇرىلعان توقىما ستانوگىن تاماشالايدى.
«اشىق اسپان استىنداعى «بورالداي ساق قورعاندارى» ارحەولوگيالىق كەشەنى - ماڭىزدى تاريحي ەسكەرتكىش. بۇل تۋرالى ۇزاق جىلدار بويى بەيمالىم بولىپ كەلدى. بىرەگەي ەسكەرتكىش 2006 -جىلى 3D كارتانى مودەلدەۋ ءۇشىن ءاەروتۇسىرىلىم كەزىندە اشىلعان ەدى. قازىرگى ساتتە ول الماتى مەن الماتى اگلومەراتسياسىنىڭ تۋريستىك نىساندارىنىڭ ءبىرىڭعاي تىزىلىمىنە كىردى. الماتىدا 30000 نان استام تاريحي ەسكەرتكىش بار. بۇل ارحيتەكتۋرالىق ەسكەرتكىشتىڭ تاريحي قۇندىلىعى ىشكى جانە شەتەلدىك تۋريستەردى وزىنە تارتادى»، - دەدى VisitAlmaty ورتالىعىنىڭ ديرەكتورى كاميلا لۇقپانوۆا.
ساراپشىلار ول جەرگە قۇرىلىستار سالىنباي، قيراماي ەسكەرتكىشتىڭ وسى كۇنگە دەيىن ءوزىنىڭ مادەني جانە تابيعي لاندشافتىن ساقتاعانىن اتاپ كورسەتكەن.
تاياۋدا «بورالداي ساق قورعاندارى» قازاقستاننىڭ جالپىۇلتتىق قاسيەتتى نىساندارىنىڭ تىزىمىنە ەندى.
سونىمەن قاتار، ارحەولوگيالىق كەشەندى يۋنەسكو-نىڭ دۇنيەجۇزىلىك مۇرا نىساندارى تىزىمىنە ەنگىزۋ جونىندە ۇسىنىس بەرۋ كوزدەلىپ وتىر.