ءۇندىستاندا 288 ادام قازا تاپتى
«شاليمار- كوروماندەل» جۇردەك پويىزى جەرگىلىكتى ۋاقىت بويىنشا ساعات 19:00 شاماسىندا رەلستەن شىقتى، بۇل رەتتە ونىڭ بىرنەشە ۆاگونى «ەسۆانتپۋر- حاورا» ەكسپرەسى جۇرەتىن باسقا جولعا ءتۇسىپ كەتتى. قارسى باعىتتا ءجۇرىپ كەلە جاتقان پويىز اۋەلى وسى ۆاگوندارمەن، سودان كەيىن جولدا تۇرعان تاعى ءبىر جۇك پويىزىمەن سوقتىعىستى.
بۇل - ءۇندىستاندا 1980 -جىلداردان بەرگى ەڭ ۇلكەن تەمىرجول اپاتى. جەرگىلىكتى بيلىكتىڭ باعالاۋىنشا، قۇربان بولعانداردىڭ سانى ارتۋى مۇمكىن.
اپات بولعان جەرگە 200-دەن استام جەدەل جاردەم كولىگى كەلىپ جەتتى، كەزەكشىلىككە قوسىمشا 100-دەن استام دارىگەر جۇمىلدىرىلعان.
كۋاگەرلەردىڭ ايتۋىنشا، ءتىرى قالعان جولاۋشىلاردىڭ كوپشىلىگى اۋدارىلعان ۆاگونداردا قالعان ادامدارعا كومەككە كەلگەن. قۇتقارۋ جۇمىستارى جالعاسۋدا.
ءۇندىستان پرەمەر- ءمينيسترى نارەندرا مودي قازا تاپقاندار مەن زارداپ شەككەندەردىڭ تۋىستارىنا كوڭىل ايتىپ، اپات بولعان جەردە قۇتقارۋ جۇمىستارى جۇرگىزىلىپ جاتقانىن جانە زارداپ شەككەندەر قاجەتتى كومەك الۋ ءۇشىن قولدان كەلگەننىڭ ءبارى جاسالىپ جاتقانىن حابارلادى.
ءۇندىستانداعى ەڭ ۇلكەن تەمىرجول اپاتى 1981 -جىلى بيحار شتاتىنداعى سيكلون كەزىندە بولعان. ول كەزدە جولاۋشىلارعا لىق تولى پويىز وزەنگە قۇلاپ، كەم دەگەندە 800 ادام كوز جۇمعان.