27-قىركۇيەك. قازاقپارات كۇنتىزبەسى
اتاۋلى كۇندەر
حالىقارالىق تۋريزم كۇنى
1980 -جىلى مانيلادا وتكەن بۇكىلالەمدىك تۋريستىك ۇيىمدار باس اسسامبلەياسىنىڭ شەشىمىمەن جىل سايىن اتاپ وتىلەدى.
Google ءدىڭ تۋعان كۇنى
Google.com دومەندىك ەسىمى 1997 -جىلعى 15-قىركۇيەكتە تىركەلدى، ال Google Inc. كومپانياسى 1998 -جىلعى 4-قىركۇيەكتە تىركەلدى. الايدا، 2005 -جىلدان باستاپ كومپانيانىڭ تۋعان كۇنى رەسمي تۇردە 27-قىركۇيەكتە اتاپ وتىلەدى.
ەستە قالار وقيعالار
1929 -جىلى استىق دايىنداۋ ناۋقانى كەزىندە سىرداريا وكرۋگىنىڭ بوستاندىق اۋدانىنىڭ (قازىر وزبەكستانعا قارايدى) تۇرعىندارى سوۆەت ۇكىمەتىنىڭ ۇستەمەلەتە سالعان سالىعى مەن زومبىلىق ارەكەتتەرىنە قارسى شىقتى. كوتەرىلىستى ۇيىمداستىرۋشىلار ت. مۇسابايەۆ، ۋ. مايلىبايەۆ بولدى، وعان 500 گە تارتا ادام قاتىستى. بەرىشموللا قىستاۋىنىڭ قاسىنداعى ۇرىستا ولارعا ي. شانىبەكوۆتىڭ باسماشىلار جاساعى كومەككە كەلدى. كوتەرىلىستى مەملەكەتتىك ساياسي باسقارمانىڭ جاساقتارى كۇشپەن باستى. كوتەرىلىسشىلەردەن 50 ادام قازاعا ۇشىرادى، 2 ادام اتۋ جازاسىنا كەسىلدى، 36 سى - 10 جىلعا سوتتالدى، جەتەۋى - 5 -جىلعا جەر اۋدارىلدى.
1931 -جىلى پاۆلودار وبلىسى باياناۋىل اۋدانىنىڭ «بايانتاۋ» گازەتىنىڭ العاشقى سانى شىقتى. وعان بەلگىلى ەتنوگراف، فلكلورشى جانە ادەبيەتشى ءماشھۇر ءجۇسىپ كوپەيەۆ اق تىلەگىن ءبىلدىردى. ونىڭ العاشقى رەداكتورى عالىم مالدىبايەۆ بولدى، وسى گازەتتە حالىق جازۋشىسى ديحان ءابىلوۆ شىعارماشىلىق جولىن باستادى.
2006 -جىلى گەرمانيانىڭ بادەن- ۆيۋرتەمبەرگ جەرىندە، ۆالدبرۋنن- ميۋلبەن قالاسىندا قازاقستان ەلشىلىگى جەرگىلىكتى قىمىز ءوندىرۋشى فەرمامەن بىرلەسىپ، گەرمانياداعى قازاق دياسپوراسى مەن قازاقستاننان كوشىپ بارعان وتانداستارىمىزدىڭ بەلسەندى اتسالىسۋىمەن «قىمىزمۇرىندىق» وتكىزدى. شارا اياسىندا مەرەكەلىك قويىلىمدار ۇيىمداستىرىلىپ، قىمىز مەرەكەسىنە ارنايى كەلگەن قوناقتاردىڭ الدىندا كەلن جانە باۆاريا ايماقتارىنداعى قازاق دياسپوراسىنىڭ كوركەمونەرپاز ارتىستەرى ونەر كورسەتتى. مەرەكە قوناقتارى قازاقتىڭ كيىز ۇيىمەن، دومبىرا اسپابىمەن، ۇلتتىق داستارقان مازىرىمەن جانە گەرمانياداعى قىمىز ءوندىرىسىنىڭ باستالۋ تاريحىمەن، قىمىزدىڭ ەمدىك قاسيەتتەرىمەن تانىستى.
2007 -جىلى الماتىدا «اباي جولى» رومانىنىڭ ورىس تىلىندەگى جاڭا اۋدارماسىنىڭ تانىستىرىلىمى بولىپ ءوتتى. قازاقستاندا تۋعان جانە قازاق ادەبيەتىمەن جەتە تانىس، سونداي- اق ءابدىجامىل نۇرپەيىسوۆ، ءابىش كەكىلباي، ورالحان بوكەي مەن تولەن ابدىكتىڭ شىعارمالارىن ءساتتى اۋدارىپ، مول تاجىريبە جيناقتاعان ەسىمى الەمگە ايگىلى جازۋشى اناتولي كيم بۇل اۋدارماعا ۇلكەن دايىندىقپەن كەلدى.
2007 -جىلى شىعىس قازاقستان وبلىسىنىڭ سەمەي قالاسىندا قازاقستان رەسپۋبليكاسى «سەماز» جشس وندىرىستىك الاڭدارىندا Daewoo اۆتوبۋستارىن ءوندىرۋ زاۋىتىنىڭ اشىلۋ سالتاناتى ءوتتى. بۇل ءوندىرىس قازاقستاندا يمپورتتالاتىن ماشينا جيىنتىقتارىنان توراپتار مەن اگرەگاتتاردى قۇراستىرۋدى عانا ەمەس، سونداي- اق شاناقتاردى قۇراستىرۋ- دانەكەرلەۋدى جانە سىرلاۋدى قامتيتىن تولىق تسيكلدى ءبىرىنشى اۆتوقۇراستىرۋ كاسىپورنى بولدى.
2010 -جىلى قازاقستاندا «Balapan» تەلەارناسى - ەلىمىزدەگى العاشقى جانە جالعىز بالالار تەلەارناسى ءوز جۇمىسىن باستادى. سول كەزدەن باستاپ ول وقۋ- تانىمدىق، سپورتتىق، ويىن- ساۋىق، انيماتسيالىق جانە زياتكەرلىك باعدارلامالاردى جارىققا شىعارىپ، ءار بالا ءۇشىن ادال دوس، رۋحاني جەتەكشى بولدى. ونى تەك باعدارلامالاردى ترانسلياتسيالاۋ عانا ەمەس، وسكەلەڭ ۇرپاقتى تاربيەلەۋ قۇرالى دەپ تە اتاۋعا بولادى.
2013 -جىلى وسكەمەن قالاسىندا اشىلعان «مادەنيەتتەر دوستاستىعى» كورمەسىندە 1897 -جىلى يمپەراتريتسا II ەكاتەرينا جارلىعىمەن وتكەن رەسەي يمپەرياسىنىڭ سوڭعى حالىق ساناعى كەزىندە جاسالعان جەتىسۋ وبلىسىنىڭ لەپسى ۋەزى تۇرعىندارىنىڭ قازاق تۇرمىسىنىڭ بىرەگەي كونە فوتوسۋرەتتەرى العاش رەت ۇسىنىلدى. فوتوسۋرەتتەردىڭ اۆتورى - كونستانتين دە لازاري. وسى 36 سۋرەتتى مۇراجايعا قازاقستان رەسپۋبليكاسىنداعى پولشا ەلشىسى ياتسەك كليۋچكوۆسكي تابىستادى.
2014 -جىلى ەۋرازيا ۇلتتىق ۋنيۆەرسيتەتىندە. قازاقستاننىڭ ءبىلىم بەرۋ تاريحى مۇراجايى اشىلدى. مۇراجايدا كورنەكتى اعارتۋشىلارعا تيەسىلى ەرەكشە قۇجاتتار مەن زاتتار، سونىمەن قاتار فوتوسۋرەتتەر، لاتىن تىلىندەگى باسىلىمدار جانە اراب تىلىندەگى قولجازبا كىتاپتار جيناقتالعان. بارلىق ەكسپوناتتار مۋزەيگە وتەۋسىز نەگىزدە سىيعا تارتىلدى. ولار ورتا عاسىرلاردان بۇگىنگى كۇنگە دەيىن قازاقستان جەرىندە اعارتۋشىلىقتىڭ قالىپتاسۋى تۋرالى باياندايدى.
2017 -جىلى ق ر ۇلتتىق كىتاپحاناسىندا فوتوسۋرەتشى، قازاقستاندا ⅩⅩ عاسىردا بولعان تاريحي وقيعالاردىڭ كۋاگەرى، قازاقستاننىڭ ەڭبەك سىڭىرگەن مادەنيەت قايراتكەرى يوسيف بۋدنيەۆيچ تۋىندىلارىنىڭ كورمەسى اشىلدى.
2018 -جىلى تۇركىستان وبلىسىندا تۇلكىباس اۋدانىنىڭ 90 جىلدىعىن تويلاۋ اياسىندا مۇحامەدجان تىنىشبايەۆ پەن تۇرار رىسقۇلوۆقا قويىلعان جاڭا ەسكەرتكىش اشىلدى.
2019 -جىلى قازاقستاندىق جاس ءانشى دانەليا تولەشوۆا ەۋرازيالىق سىيلىقتىڭ لاۋرەاتى اتانىپ، «ۆوكال» نوميناتسياسى بويىنشا ماراپاتقا يە بولدى. 13 جاسار ءانشى ونەر، ادەبيەت، عىلىم، سپورت جانە الەۋمەتتىك ماڭىزدى جەتىستىكتەر سالاسىندا ەۋرازيالىق شىعارماشىلىق وداقتىڭ حالىقارالىق ماراپاتىن العان العاشقى بالا بولدى. ەۋرازيالىق سىيلىقتى 2013 -جىلى قازاقستان، بەلارۋس، ءۇندىستان، يران، رەسەي جانە تاجىكستان وكىلدەرى قۇرعان ەۋرازيالىق شىعارماشىلىق وداق تاعايىندادى.