يراندىقتار مەن قازاقتاردىڭ بايلانىسى 27 جىلمەن شەكتەلمەيدى - ەلشى

None
None
استانا. قازاقپارات - ەلوردادا يران يسلام رەسپۋبليكاسىنىڭ ۇلتتىق كۇنىنە ارنالعان سالتاناتتى قابىلداۋ ءوتتى، دەپ حابارلايدى قازاقپارات ءتىلشىسى.

يراننىڭ قازاقستانداعى توتەنشە جانە وكىلەتتى ەلشىسى مادجيد سامادزادە سابەردىڭ ايتۋىنشا، قازاقستان - وسى ەلدىڭ سەنىمدى سەرىكتەسى. ال يراندىقتار مەن قازاقتار اراسىنداعى قارىم-قاتىناستىڭ تاريحى تەرەڭدە جاتىر.

«كاسپي تەڭىزىندە كورشىلەس قازاقستان رەسپۋبليكاسىمەن ىنتىماقتاستىقتى دامىتۋ ءبىزدىڭ سىرتقى ساياساتىمىزدىڭ ماڭىزدى قاعيداتى بولىپ سانالادى. 29- قاڭتاردا يران مەن قازاقستان اراسىنداعى ديپلوماتيالىق قارىم-قاتىناستاردىڭ ورناعانىنا 27 جىل تولدى. ارينە، يراندىقتار مەن قازاقتاردىڭ بايلانىستارى 27 جىلمەن شەكتەلمەيدى، ەكىجاقتى بايلانىستارىمىزدىڭ تاريحى تەرەڭ. ءبىزدىڭ 3 مىڭنان استام ورتاق سوزدەرىمىز بار. ەكى ەلگە ورتاق تاريحي تۋىندىلار مەن تۇلعالار قانشاما. قازاقستاندىق ادەبيەتشىلەر فەردوۋسي، حافيز، ساعدي، حايام جانە نيزامي سياقتى ءسوز شەبەرلەرىنىڭ شىعارمالارىمەن جاقسى تانىس. اتالعان تۇلعالار قوجا احمەت ياساۋي، اباي قۇنانباي ۇلى، شاكارىم قۇدايبەردى ۇلى، مۇحتار اۋەزوۆ سىندى تانىمال اقىن-جازۋشىلاردىڭ شىعارمالارىنا دا اسەر ەتتى. سونداي-اق، ەكى ەلدىڭ اتاقتى اقىندارى مەن جازۋشىلارىنىڭ تالاي تۋىندىلارى پارسى جانە قازاق تىلدەرىنە اۋدارىلدى. وسىنىڭ ءبارى ەكى ۇلتتىڭ مادەني بايلانىسى تەرەڭ ەكەنىن كورسەتسە كەرەك»، - دەدى مادجيد سامادزادە سابەر سالتاناتتى شارانىڭ اشىلۋ راسىمىندە.

ەلشىنىڭ سوزىنە قاراعاندا، يراندا تۇرىپ جاتقان قازاقتار از ەمەس. قازاقستان جەرىندە دە يراندىقتار كوپ. وسىنىڭ ءوزى ەكىجاقتى سەنىم مەن دوستىقتىڭ كورىنىسى ىسپەتتى.

«سوڭعى جىلدارى ەكى مەملەكەتتىڭ مادەني جانە ساياسي-ەكونوميكالىق بايلانىستارى كۇشەيىپ كەلەدى. مەملەكەت باسشىلارىمىزدىڭ ءوزارا ساپارلارى مەن كەزدەسۋلەرى وسى ۇدەرىسكە تىڭ سەرپىن بەرىپ وتىر. بىلتىر يران يسلام رەسپۋبليكاسىنىڭ باسشىسى حاسان رۋحاني مىرزانىڭ كاسپيي تەڭىزى جاعالاۋى مەملەكەت باسشىلارىنىڭ سامميتىنە قاتىسۋ ءۇشىن اقتاۋعا جاساعان ساپارى، ەكى مەملەكەتتىڭ سىرتقى ىستەر مينيسترلەرى مەن لاۋازىمدى تۇلعالاردىڭ ءوزارا ساپارلارى ەكىجاقتى ايماقتىق جانە حالىقارالىق ماسەلەلەر بويىنشا ءتيىمدى كونسۋلتاتسيالار جاساۋعا قولايلى جاعداي جاسادى. وسى ۇدەرىستى ودان ءارى جالعاستىرا وتىرىپ، قولدا بار مۇمكىندىكتەردى بارىنشا پايدالانۋىمىز قاجەت. مەملەكەت باسشىلارىمىزدىڭ نۇسقاۋلارىن جۇزەگە اسىرساق، ونىڭ پايداسىن ايماق ەلدەرى دە كورە الادى. ىنتىماقتاستىق بايلانىستارىمىزدىڭ ودان ءارى دامۋىنا كۋا بولاتىنىمىزعا ۇمىتتەنەمىن»، - دەپ اتاپ كورسەتتى ەلشى.

ايتا كەتەيىك، بيىل يران يسلام رەسپۋبليكاسى يسلام ريەۆوليۋتسياسىنىڭ 40 جىلدىعىن اتاپ وتۋدە. 1979-جىلى اتالعان مەملەكەت ءوزىن يسلام رەسپۋبليكاسى دەپ جاريالادى.

سوڭعى جاڭالىقتار