سۋ تاسقىنى كەزىندە 27 جانۋاردى قۇتقارعان ايەل مەيىرىمدىلىگىنىڭ كەسىرىنەن باسى بالەگە قالدى
سولتۇستىك كارولينادا «فلورەنتسيا» داۋىلىنىڭ سالدارىنان زارداپ شەككەندەر كوپ بولدى. ايتىپ كەلمەيتىن اپاتتان ءوز جاندارىن امان الىپ قالۋدى ويلاعان ادامدار ءاردايىم جانۋارلاردى وزدەرىمەن بىرگە الا المادى. سوندا تەممي جانۋارلارعا سۋ تاسقىنىنان امان قالۋعا كومەكتەسۋ كەرەك دەپ شەشتى.
«ادامدار وزدەرىن قۇتقارۋى كەرەك. ءبىراق جانۋارلاردى كىم قۇتقارادى؟ ارينە، ولاردى قۇتقارۋمەن ءبىز اينالىستىق» ، - دەيدى تەممي.
كەدەي وتباسىلارعا جانۋارلارعا قامقورلىق كورسەتۋگە كومەكتەسەتىن ۇيىمدى باسقاراتىن ايەل ەسكى قويمانى جوندەپ، ونى جانۋارلار ۇيىنە اينالدىردى. ول ءتىپتى، اپات كەزىندە جانۋارلاردى قابىلدايتىنى جايلى حابارلاندىرۋ جاريالاپ، ولارعا قامقورلىق كورسەتپەكشى بولدى.
تەممي مەن ەرىكتىلەر ولاردى كۇتىپ باعۋ ءۇشىن بارلىق قاجەتتى زاتتاردى ساتىپ الدى جانە تاۋلىك بويى ءوز قامقورشىلارىمەن بىرگە بولدى. ولاردى تاماقتاندىرىپ، ەمدەدى. كوپ ۇزاماي ونىڭ جانۋارلار ۇيىنە 27 جانۋار: 10 يت پەن 17 مىسىق جينالدى.
«ءبىز جانۋارلاردى يەلەرى الىپ كەتكەنشە ولار قۇرعاق جانە قاۋىپسىز جەردە تۇرۋى ءۇشىن ارنايى ءۇي اشتىق. ولاردىڭ ءارقايسىسىندا تور نەمەسە جاتاتىن توسەك، سۋ، ازىق- تۇلىك بولدى» ، - دەيدى تەممي حەدجەس.
ءبىراق تەمميدىڭ مەيىرىمدىلىگى كۇتپەگەن ناتيجەگە اكەلدى. داۋىل باسىلعاندا ايەلدى جەرگىلىكتى جانۋارلاردى باقىلاۋ ورتالىعىنىڭ وكىلدەرى شاقىرىپ، بارلىق ءۇي جانۋارىن ەرىكتى تۇردە بەرۋدى تالاپ ەتتى. ەگەر ايەل ولاردىڭ تالابىن ورىنداماسا پوليتسيا ەرتىپ كەلەمىز دەپ قورقىتقان.
تەممي ولاردىڭ تالاپتارىن ورىندادى، ءبىراق قۇقىق قورعاۋ ورگاندارى ونى ءبارىبىر قاماۋعا الدى. وعان ليتسەنزياسىز ءۇي جانۋارلارىن ءدارى- دارمەكتەرمەن ەمدەگەن جانە رۇقساتسىز باسپانا اشقان دەگەن ايىپ تاعىلدى. مەيىرمدىلىگىنىڭ كەسىرىنەن باسى بالەگە قالعان ايەل 10 مىڭ دوللار كەپىلدىك بەرىپ بوستاندىققا شىقتى.
Stan.kz