16:58, 27 - قىركۇيەك 2021 | GMT +6
الماتى وبلىسىندا قاشىقتان وقىپ جاتقان 2753 وقۋشى مەكتەپكە ورالدى
تالدىقورعان. قازاقپارات - الماتى وبلىسىندا قاشىقتان وقىپ جاتقان 2753 وقۋشى قايتا مەكتەپكە ورالدى، دەپ حابارلايدى قازاقپارات ءتىلشىسى.
الماتى وبلىستىق سانيتاريالىق-ەپيدەميولوگيالىق باقىلاۋ دەپارتامەنتىنىڭ باسپا ءسوز قىزمەتى تاراتقان حابارلاماعا سايكەس، جاڭا وقۋ جىلىنىڭ 1- قىركۇيەگى مەن 27- قىركۇيەك ارالىعىندا وبلىس بويىنشا وقۋشىلار اراسىندا كوروناۆيرۋسپەن سىرقاتتانۋدىڭ 960 جاعدايى تىركەلدى.
ونىڭ ىشىندە 215 جاعداي جازعى دەمالىس كەزىندە، 720 جاعداي وفلاين وقىتۋ كەزىندە جانە 25 جاعداي ونلاين وقىتۋ كەزىندە انىقتالعان.
«وبلىستىڭ 244 مەكتەبىنىڭ 578 سىنىبىنا كارانتين ەنگىزۋ تۋرالى 567 قاۋلى شىعارىلدى جانە 9379 وقۋشى قاشىقتان وقىتۋ نىسانىنا اۋىستىرىلدى. بۇگىنگى كۇنى 578 سىنىپتىڭ 201 ءى كارانتيننەن شىعارىلىپ، 2753 وقۋشى قايتا مەكتەپكە ورالدى»، - دەلىنگەن ۆەدومستۆونىڭ حابارلاماسىندا.