تۇڭعىش اسكەري ۇشقىش قىز اردانا بوتاي اۋەدە 270 ساعات ۇشقان
ەر ازاماتتىڭ دا جۇرەگى داۋالاپ، قولىنان كەلە بەرمەيتىن شەبەرلىكتى مەڭگەرگەن ارۋ قازىر اۋە كولىگىن ءوزى باسقارادى. وسىدان ەكى جىل بۇرىن اسكەري ۇشاقتى باسقارۋدى ۇيرەنىپ جۇرگەن اردانا بوتاي بۇل جولى اۋە كەمەسىن ءوز بەتىمەن باسقاردى. «ۇشاقتى جالعىز باسقارۋ - ءاربىر ۇشقىشتىڭ ەڭبەك جولىنداعى ماڭىزدى كەزەڭدەردىڭ ءبىرى»، - دەيدى اسكەري ءبولىمنىڭ كومانديرى.
«اردانا العاش ۇشقىش بولامىن دەپ وقۋ ورنىنا كەلگەندە، بارلىعى تاڭ قالعان بولاتىن. كوپ ادامدارعا ەرسى كورىندى. الايدا اردانا تاباندىلىعىنىڭ ارقاسىندا ايەل ادام دا اسكەري ۇشاقتى باسقارا الاتىنىن دالەلدەدى. قازىر ەڭبەگىنىڭ جەمىسىن كورۋدە»، - دەيدى اۆياتسيالىق وقۋ ورتالىعىنىڭ كومانديرى تيمۋر ەسپاعانبەتوۆ.
اردانا بالا كەزىنەن ۇشقىش بولۋدى ارمانداعان. وسى ارمان ون التى جاستاعى بويجەتكەندى اۆياتسيالىق ورتالىققا جەتەلەپ كەلگەن. وندا ۇزدىكتەردىڭ ءبىرى بولعان كۋرسانت الدىمەن جەڭىل موتورلى ۇشاقتاردى جۇرگىزۋدى ۇيرەنەدى.
«اسكەري ۇشاقتاردا ۇشۋ مەنىڭ بالا كەزىمنەن كەلە جاتقان ارمانىم. مەكتەپتە وقىپ جۇرگەن كەزىمدە وقۋ ورتالىعىندا، ۇشقىشتار ورتالىعىندا 40 ساعات ۇشىپ، ودان كەيىن ازاماتتىق اۆياتسيا اكادەمياسىندا جۇرگەنىمدە ۇلتتىق گۆاردياعا شاقىرىلدىم، ول جاقتا مەن ان-26 ۇشاعىمەن اۋەگە كوتەرىلدىم»، - دەدى ۇشقىش اردانا بوتاي.
اردانا بۇگىنگى كۇنگە دەيىن اۋەدە 270 ساعات ۇشىپ ۇلگەرگەن. الداعى ۋاقىتتا جاس ۇشقىشتارعا تالىمگەر بولۋدى قالايدى. «ال ومىردەگى ەڭ باستى ارمانىم - عارىشتى باعىندىرۋ»، - دەيدى تۇڭعىش اسكەري ۇشقىش قازاق قىزى.