قازاقپارات كۇنتىزبەسى: 26- قاڭتار
اتاۋلى كۇندەر
دۇنيەجۇزىلىك ەكولوگيالىق ءبىلىم بەرۋ كۇنى
قازىرگى تاڭدا الەمدە ەكولوگيالىق ءبىلىم بەرۋ ماسەلەسىنىڭ وزەكتى بولىپ وتىرعانى سونشالىق، دۇنيەجۇزىلىك ەكولوگيالىق ءبىلىم بەرۋ كۇنى جىلىنا بىرنەشە رەت اتالىپ وتەدى. ەكولوگيالىق ءبىلىم بەرۋ جونىندەگى دۇنيەجۇزىلىك كونگرەسس بۇل كۇندى 14 - قازانعا ۇسىنسا، كوپتەگەن باسقا ەكولوگيالىق ۇيىمدار ونى 26 - قاڭتاردا اتاپ وتەدى.
ەكولوگيالىق ءبىلىم بەرۋدى دامىتۋدىڭ باستى قوزعالتقىش كۇشى - ب ۇ ۇ- نىڭ قورشاعان ورتا پروبلەمالارىنا ارنالعان كونفەرەنتسياسى كەزىندە قابىلدانعان ستوكگولم دەكلاراتسياسى.
حالىقارالىق كەدەنشىلەر كۇنى
1983-جىلدان باستاپ اتاپ وتىلەدى. بۇل مەرەكەنى اتاپ وتەتىندەر سانى بۇكىل الەمدە 800 مىڭنان اسادى. 1950-جىلعى جەلتوقساننىڭ 15 ىندە كەدەندىك ىنتىماقتاستىق كەڭەسىن قۇرۋ تۋرالى كونۆەنتسيانىڭ نەگىزىندە بۇكىل الەمدىك كەدەن ۇيىمى (WCO) قۇرىلدى.
بۇگىندە ۇيىمعا 162 مەملەكەت مۇشە.
ەستە قالار وقيعالار
1981 -جىلى مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ جاڭا عيماراتىنىڭ اشىلۋ سالتاناتى ءوتتى. ساۋلەتشىلەرى - و. بايمىرزايەۆ، ا. قايناربايەۆ، م. جاقسىلىقوۆ. جوبا اۆتورلارى 1982-جىلى قازاقستاننىڭ مەملەكەتتىك سىيلىعىنا يە بولعان.
1992 -جىلى ماسكەۋدە قازاقستان رەسپۋبليكاسى مەن جاپونيا اراسىندا ديپلوماتيالىق قارىم-قاتىناس ورناتۋ تۋرالى حات الماسۋ ءراسىمى ءوتتى.
1996 -جىلى قازاقستان دۇنيەجۇزىلىك ساۋدا ۇيىمىنا كىرۋ تۋرالى رەسمي ءوتىنىم جاسادى. سول جىلدىڭ اقپان ايىندا قازاقستان د س ۇ- نىڭ باقىلاۋشى ەلى دەگەن مارتەبەسىنە يە بولدى.
2010 -جىلى جامبىلدىق وقۋشى بوگدان زاگريبەلنىي ساۋد ارابياسىندا وتكەن دۇنيەجۇزىلىك بالالار فورۋمىندا الەم ەلشىسى اتاندى. بوگدان زاگريبەلنىي شاقىرۋدى يندونەزيا، سينگاپۋر، مالايزيا، امەريكا قۇراما شتاتتارى جانە باسقا ەلدەردىڭ بالالارى سياقتى ساۋد ارابياسىنىڭ كورولى ابداللا يبن ابدەل ازيزدەن الدى.
بۇعان دەيىن تارازدىق وقۋشى كورولدىكتە ۇيىمداستىرىلعان دۇنيەجۇزىلىك ونەر وليمپياداسىنىڭ جەڭىمپازى بولدى. بوگدان 11-14 جاس ارالىعىنداعى قاتىسۋشىلاردىڭ ونەر سالاسىنداعى ءبىلىم پروبلەمالارىن تالقىلايتىن بەدەلدى بالالار فورۋمىندا قازاقستان رەسپۋبليكاسىنىڭ جالعىز وكىلى بولعان.
2013 -جىلى گەرمانيانىڭ بوحۋم قالاسىندا «بەلگىسىز قازاقستان» - ازيا جۇرەگىنىڭ ارحەولوگياسى» اتتى تاقىرىپتىق ارنايى كورمە ۇسىنىلدى.
2014 -جىلى الماتىدا ەلىمىزدىڭ 8 جەتەكشى جوعارى وقۋ ورنى رەكتورلار كونسورتسيۋمىن قۇردى. ونىڭ ىشىندە ءال-فارابي اتىنداعى قازاق ۇلتتىق ۋنيۆەرسيتەتى، قازاق-بريتان تەحنيكالىق ۋنيۆەرسيتەتى، حالىقارالىق بيزنەس اكادەمياسى مەن كيمەپ، ليەۆ گۋميليەۆ اتىنداعى ەۋرازيا ۇلتتىق ۋنيۆەرسيتەتى، گۋمانيتارلىق زاڭ ۋنيۆەرسيتەتى مەن قازاق ۇلتتىق اگرارلىق ۋنيۆەرسيتەتى بار.
كونسورتسيۋم نەگىزىنەن جوعارى وقۋ ورىندارىنداعى بولوندىق جۇيەنىڭ ىسكە اسۋىن قامتىپ، وقۋ بارىسىنا يننوۆاتسيالىق ادىستەردىڭ ەنگىزىلۋىن قاداعالايدى. ءارى ستۋدەنتتەرگە عىلىمعا بەت بۇرىپ، ءتۇرلى ترەنينگتەرگە قاتىسۋعا مۇمكىندىك بەرەدى.
2015 -جىلى تالداۋ ورتالىقتارىنىڭ 2014-جىلعى دۇنيەجۇزىلىك يندەكس- رەيتينگىسىنە سايكەس، قازاقستان رەسپۋبليكاسى پرەزيدەنتى جانىنداعى قازاقستاندىق ستراتەگيالىق زەرتتەۋلەر ينستۋتيتى كاۆكاز، ورتالىق جانە وڭتۇستىك ازيانىڭ جەتەكشى «اقىلدى» ورتالىقتارىنىڭ ۇشتىگىنە كىردى.
2015 -جىلى «قازاقستان حالقى اسسامبلەياسىنا 20 جىل» مەرەكەلىك مەدالى بەكىتىلدى. بۇل مەدالمەن قازاقستان حالقىنىڭ بىرلىگى مەن ەلىمىزدە تۇراقتىلىقتى قامتاماسىز ەتۋگە، ەلىمىزدەگى قوعامدىق كەلىسىمنىڭ نىعايۋىنا ايتارلىقتاي ۇلەس قوسىپ كەلە جاتقان قازاقستان رەسپۋبليكاسىنىڭ جاانە شەت مەملەكەتتەردىڭ ازاماتتارى ماراپاتتالادى.
2016 -جىلى تۇركيانىڭ ىستانبۇل قالاسىنداعى رەسپۋبليكالىق كوركەمونەر گالەرەياسىنىڭ تاريحي عيماراتىندا قازاقستاندىق جەتەكشى سۋرەتشىلەردىڭ «قازاقستاننىڭ قازىرگى زامانعى ونەرى» اتتى كارتينالار كورمەسىنىڭ اشىلۋ سالتاناتى بولىپ ءوتتى.
2018 -جىلى شىمكەنتتە ليتۆا رەسپۋبليكاسىنىڭ قۇرمەتتى كونسۋلدىعى اشىلدى. ليتۆانىڭ شىمكەنت قالاسىنداعى قۇرمەتتى كونسۋلى بولىپ ماماديار قادىربەكوۆ تاعايىندالدى. ديپلوماتيالىق وكىلدىكتى اشۋ ماقساتى - ەكىجاقتى ىسكەرلىك بايلانىستاردى جاقسارتۋ، ەكونوميكالىق جانە مادەني ىنتىماقتاستىقتى دامىتۋ.
2018 -جىلى ن. كرۋپسكايا اتىنداعى استراحان وبلىستىق عىلىمي كىتاپحاناسىندا قازاقتىڭ ۇلى اقىنى اباي شىعارمالارىنىڭ اۋدارمالار جيناعى تانىستىرىلدى. كىتاپتىڭ اۆتورى يۋريي شەرباكوۆ قازاق اقىندارىنىڭ ادەبي اۋدارماسىمەن بۇرىننان اينالىسىپ ءجۇر. ول حالىقارالىق «اق تىرنا» اتتى تۇركىتىلدەس پوەزيا بايقاۋىنىڭ، كوپتەگەن باسقا حالىقارالىق جانە بۇكىل رەسەيلىك بايقاۋلار مەن ادەبي جۇلدەلەردىڭ لاۋرەاتى.
2020-جىلى قولجازبالار جانە سيرەك كىتاپتار ۇلتتىق ورتالىعىندا ابايدىڭ «جيدەباي-ءبورىلى» مەملەكەتتىك تاريحي- مادەني جانە ادەبي-مەموريالدىق قورىق-مۋزەيى قورىنان كورمە اشىلدى.
كورمەگە ابايدىڭ «جيدەباي-ءبورىلى» مۇراجاي-قورىعىنىڭ قورىنان 40 تان استام بىرەگەي ەكسپونات قويىلدى. ولاردىڭ اراسىندا اقىننىڭ فوتوسۋرەتتەرى، تۇرمىستىق زاتتارى، سونداي-اق ابايتانۋ جونىندەگى عىلىمي-پۋبليتسيستيكالىق ەڭبەكتەرى بار.