باتىس قازاقستاندا 26 توننا مەديتسينا قولعابىن ماسكەۋگە اپارا جاتقان جۇك كولىگى ۇستالدى

ورال. قازاقپارات - باتىس قازاقستان وبلىسىندا 26 توننا مەديتسينا قولعابى تيەلگەن اۆتوكولىك ۇستالدى، دەپ حابارلايدى قازاقپارات ءتىلشىسى.

ق ر ۇ ق ك شەكارا قىزمەتى 2029-اسكەري ءبولىمى كومانديرىنىڭ ورىنباسارى، پودپولكوۆنيك اسقار قازبەكوۆتىڭ ءمالىم ەتكەنىندەي، وقيعا 16-ناۋرىز كۇنى ساعات 19.30 دا «تاسقالا» وتكىزۋ بەكەتىندە ورىن الدى. قازاقستان ۇكىمەتى مەديتسينالىق جەكە قورعاۋ قۇرالدارىن ەلدەن الىپ كەتۋگە تىيىم سالعان بولاتىن. سوعان قاراماستان، شەكاراشىلار ورالدان ماسكەۋگە باعىت العان INTERNATIONAL جۇك كولىگىن قاراعان كەزدە، ودان 26 توننا لاتەكس قولعاپتارى تابىلدى.

جۇكتىڭ ىلەسپە قۇجاتتارىندا 3,9 ميلليون قولعاپ ەكەندىگى جازىلعان. باعاسى - 3,666 ميلليون تەڭگە. جۇك ورال قالاسىنداعى «تورگوۆىي UNEX» ج ش س- دا تيەلگەن. «جۇك كولىگىن ب ق و بويىنشا ەكونوميكالىق تەرگەۋ دەپارتامەنتىنە تاپسىرۋ كوزدەلۋدە» دەدى قازاقپارات تىلشىسىنە ا. قازبەكوۆ.