تەڭگە 26 جىلدا قالاي وزگەردى

الماتى. قازاقپارات - قازاقستاندا 15 -قاراشادا ۇلتتىق ۆاليۋتا كۇنى اتالىپ وتەدى. ءدال وسى كۇن قارجىگەرلەردىڭ كاسىبي مەرەكەسى سانالادى، دەپ حابارلايدى قازاقپارات ءتىلشىسى.

بۇگىن ۇلتتىق ۆاليۋتامىز تەڭگەگە 26 جىل تولدى. 1993 -جىلى 12 -قاراشادا ق ر پرەزيدەنتىنىڭ 15 -قاراشادان باستاپ قازاقستان رەسپۋبليكاسىنىڭ ۇلتتىق ۆاليۋتاسى - تەڭگەنى اينالىمعا شىعارۋ تۋرالى جارلىعى جارىق كوردى. ءدال وسى كۇنى پرەزيدەنت حالىققا ۇندەۋ جاريالادى.

«وسى ۋاقىتتان باستاپ قازاقستاننىڭ شىنايى تاۋەلسىزدىگىنىڭ ماڭىزدى كەزەڭى باستالادى. بۇنداي تاريحي ساتتەر ەل ومىرىندە ءبىر- اق رەت بولاتىن ءىرى وقيعا»، - دەدى ن. نازاربايەۆ.

26 جىلدا تەڭگەنىڭ 4 سەرياسى شىقتى. ءبىرىنشى اقشامىز ۇلى بريتانيادا باسىلىپ شىقتى. 1995 -جىلى ءوز بانكنوت فابريكامىز اشىلدى.

ۇلتتىق ۆاليۋتانىڭ العاشقى لەگىندە «پورترەتتىك سەريا» قولدانىلعان. اۆتورلار بانكنوت بەتتەرىندە قازاقتىڭ ۇلى تۇلعالارىنىڭ سۋرەتتەرىن جاريالادى.

وسىلايشا تۇڭعىش رەت اقشا بەتىندە ءال-فارابي، ءسۇيىنباي، قۇرمانعازى، شوقان ءۋاليحانوۆ، اباي، ءابىلقايىر حان، ابىلاي حان بەينەلەرى جارىق كوردى.

ۇلتتىق ۆاليۋتانىڭ ەكىنشى لەگى قازاقستاندا باسىلىپ شىقتى. جاڭا سەريا «ءال-فارابي» دەپ اتالدى.

شىعىس ويشىلىنىڭ بەينەسى 200-10000 تەڭگەگە دەيىنگى بانكنوتتارعا باسىلدى. بۇل اقشا اينالىمدا كوپ بولعان جوق. ادام بەينەسى سالىنعان بانكنوتالار تەز جىرتىلىپ، مىجىلاتىندىقتان سۋرەتشىلەر پورترەتتىك سۋرەتتەردەن باس تارتا باستادى.

ۇلتتىق ۆاليۋتامىزدىڭ ءۇشىنشى بۋىنى 2006 -جىلى بايتەرەك بەينەسىمەن جارىق كوردى.

بۇل جولى ديزاينەرلەر اقشا بەتىندە تەك قازاقستاننىڭ تاريحىن عانا ەمەس، ساۋلەتى مەن تابيعاتىن دا سىيعىزۋعا تىرىستى. تەڭگەنىڭ بەتىندە اشىق الاقان، تۇڭعىش پرەزيدەنتتىڭ قولى، ءانۇراننىڭ نوتالارى باسىلدى.

«2011 -جىلدان باستاپ قازاقستاندىقتاردىڭ قولىندا جاڭا ۆاليۋتا اينالىمعا شىعا باستادى. «سامۇرىق» سەرياسىنداعى نومينالى 500، 1000، 2000، 5000، 10000 جانە 20000 تەڭگە بولاتىن اقشا پايدا بولدى. ءبىر جاق بەتىندە «قازاق ەلى» مونۋمەنتى مەن ۇشىپ بارا جاتقان كەپتەرلەر جاريالاندى. ەكىنشى جاق بەتىنە سۋرەتشىلەر الماتى قالاسىنىڭ، ەرتىس وزەنىنىڭ، ءۇستىرت جازىعىنىڭ پانوراماسىن بەينەلەدى» - دەدى ۇلتتىق بانكتەن.

مونەتالاردىڭ ءبىرىنشى پارتياسى گەرمانيادا باسىلدى. ال قازىر مونەتالار قازاقستان مونەتا سارايىندا شىعارىلادى. مونەتا سارايىندا ينۆەستيتسيالىق، كوللەكتسيالىق شاقالار شىعارىلدى.

قازىر اينالىمدا نومينالى 1، 2، 5، 10، 20، 50 جانە 100 تەڭگە بولاتىن مونەتالار بار. كەلەر جىلى نومينالى 200 تەڭگە بولاتىن مونەتا شىعادى. ق ر ۇلتتىق بانكى كوللەكتسيالىق مونەتالاردى شىعارۋدى 1995 -جىلدان باستاپ جولعا قويعان. ينۆەستيتسيالىق مونەتالار - اu 999،9 باعالى مەتالداردان سوعىلعان.

تەڭگە ءوز تاريحىندا 3 رەت دەۆالۆاتسياعا ۇشىرادى. 1993 -جىلدىڭ قاراشاسىندا $1 قۇنى 4،7 تەڭگە بولاتىن. 1994 -جىلدىڭ قاراشاسىندا $1 قۇنى 50 تەڭگەدەن استى.

1999 -جىلى تۇڭعىش رەت تەڭگە السىرەدى. جىل سوڭىندا $1 قۇنى 138 تەڭگەگە جەتتى.

ەكىنشى ديەۆالۆاتسيا سالقىنى 2009 -جىلدىڭ سوڭىندا سوقتى. $1 قۇنى 148 تەڭگەگە جەتتى.

2014 -جىلدىڭ قاڭتارىندا ءۇشىنشى قۇنسىزدانۋ تولقىنى كەلىپ، $1 قۇنى 181 تەڭگەگە جەتتى.

2015 -جىلدىڭ تامىزىندا قازاقستان تەڭگە باعامىنىڭ ەركىن تەربەلىسىنە كوشتى. بۇگىندە تەڭگەنىڭ رەسمي باعامى $1 - 388 تەڭگە.

اۆتور: گۇلميرا عوسمانالي