مينيستر ءبىرتانوۆ 26 ميلليارد تەڭگەنى ۇنەمدەدى

None
None
استانا. قازاقپارات - ق ر دەنساۋلىق ساقتاۋ ءمينيسترى ەلجان ءبىرتانوۆ ءبىرىڭعاي پورتالدىڭ تانىستىرىلىمىنا قاتىستى.

اتالعان پورتال ارقىلى تەگىن مەديتسينالىق كومەككە كىرەتىن دارىلەر ساتىپ الىناتىن بولادى. بۇعان دەيىن وسى جۇمىسقا تەندەرلىك كوميسسيالار جاۋاپ بەرگەن ەدى، دەپ حابارلايدى قازاقپارات ءتىلشىسى.

«بۇل - وتە ماڭىزدى شارا. سەبەبى ەكى جىلدان بەرى پرەزيدەنتتىڭ تاپسىرماسى بويىنشا حالىقتى تەگىن ءدارى-دارمەكپەن قامتاماسىز ەتۋ ماسەلەسىن شەشىپ جاتىرمىز. سونىڭ ءبىرى - «س ك- فارماتسيانىڭ» جۇمىسىن اشىق جۇرگىزۋ. بىلتىردان بەرى بارلىق تەندەرلىك كوميسسيالاردىڭ وتىرىستارىن عالامتور ارقىلى كورسەتىپ وتىردىق. كوپ وتىرىستار بولدى. سونىڭ ءبارىن اشىق كورسەتۋدىڭ ارقاسىندا بيۋدجەت قارجىسىنىڭ 10 پروتسەنتىن - 26 ميلليارد تەڭگەنى ۇنەمدەدىك. ول اقشا قوسىمشا ءدارى- دارمەكتەرگە جۇمسالدى»، - دەيدى ە. ءبىرتانوۆ.

ءمينيستردىڭ ايتۋىنشا، بارلىق مەديتسينالىق مەكەمەلەردى قاعازسىز جۇمىسقا اۋىستىرعان ماڭىزدى. سەبەبى سيفرلاندىرۋدىڭ ارقاسىندا ءدارى-دارمەكتەردىڭ اينالىمىن اشىق كورىپ وتىرۋعا بولادى.

«جىل باسىنان بەرى قاعازسىز جۇمىسقا اۋىسۋ باستاماسىنا ءتورت ءوڭىر، ودان كەيىن ءساۋىر ايىندا تاعى ءتورت ءوڭىر قوسىلدى. 1 -شىلدەدەن باستاپ قالعانى قوسىلدى.

جىلدىڭ اياعىنا دەيىن بارلىق مەديتسينالىق ۇيىمدار دا، ياعني ستاتسيونارلار مەن ەمحانالاردىڭ جۇمىسى ەلەكتروندى فورماتقا اۋىسۋى قاجەت. سونىڭ ارقاسىندا ءبىز ازاماتتاردى ءدارى- دارمەكپەن قامتۋ ماسەلەسىن شەشە الامىز»، - دەپ اتاپ كورسەتتى ۆەدومستۆو باسشىسى.

ايتا كەتەيىك، بۇگىن تەگىن مەديتسينالىق كومەك اياسىندا ءدارى-دارمەكتەردى ساتىپ الۋعا ارنالعان ءبىرىڭعاي پورتال تانىستىرىلدى. اتالعان پورتال ازىرشە تەستتىك رەجيمدە جۇمىس ىستەيدى. ال ءبىر اپتادان كەيىن تولىعىمەن ىسكە قوسىلادى. سودان باستاپ تەگىن مەديتسينالىق كومەك اياسىندا بارلىق پرەپاراتتار وسى پورتال ارقىلى ساتىپ الىنادى.

 

سوڭعى جاڭالىقتار