الماتىعا كوروناۆيرۋستى انىقتايتىن 266 مىڭ تەست جەتكىزىلەدى

ۇر-سۇلتان. قازاقپارات - 27- ناۋرىز كۇنى الماتى قالاسىندا كوروناۆيرۋستى انىقتايتىن 266 مىڭ تەست جەتكىزىلەدى.

بۇل تۋرالى «حابار 24» تەلەارناسىنىڭ تىكەلەي ەفيرىنەن ق ر اقپارات جانە قوعامدىق دامۋ ءمينيسترى داۋرەن ابايەۆ ايتتى، دەپ حابارلايدى قازاقپارات ءتىلشىسى.

«27- ناۋرىزدا الماتى قالاسىنا 266 مىڭ تەست الىپ كەلەدى. ولار كەدەندىك جانە ۆاليداتسيا پروتسەدۋراسىنان وتكىزىلەدى. بولجاممەن 29- ناۋرىزدا ولار ەڭ الدىمەن دارىگەرلەردىڭ قولىنا تيەدى. بۇلاردىڭ بارلىعى تەگىن تەستىلەر»، - دەدى مينيستر.

ونىڭ اتاپ وتۋىنشە، وسى ۋاقىتقا دەيىن ەلىمىزدە كوروناۆيرۋس ينفەكتسياسىن انىقتاۋعا ارنالعان 15 مىڭنان استام تەست جاسالدى. قازىرگى ۋاقىتتا كۇنىنە مىنان استام تەست جاسالىپ جاتىر. بۇل جۇمىستار الداعى ۋاقىتتا دا جالعاسادى.

«كەشە باس سانيتارلىق دارىگەردىڭ قاۋلىسى شىقتى. وعان سايكەس بارلىق قالاعا كەلۋشىلەردىڭ تۇگەلىنە تەست جۇرگىزىلەتىن بولادى»، - دەدى داۋرەن ابايەۆ.