شىمكەنتتە 260 ادامدى جۇمىسپەن قامتيتىن اينەك زاۋىتى ىسكە قوسىلدى
قۋاتى جىلىنا شامامەن 800 مىڭ m2 شىنى كونسترۋكتسياسىن قۇرايتىن كاسىپورىنعا «قاراپايىم زاتتار ەكونوميكاسى» باعدارلاماسى بويىنشا 3,4 ميلليارد تەڭگەگە مەملەكەتتىك قولداۋ كورسەتىلدى.
زاۋىتتا زاماناۋي ەۋروپالىق جابدىقتار ورناتىلعان، ال شيكىزات قىزىلوردا وبلىسىنان (Orda Glass Ltd) جەتكىزىلەدى.
جاڭا كاسىپورىننىڭ ءونىمى ىشكى نارىققا شىعارىلىپ قانا قويماي، وزبەكستان، قىرعىزستان جانە تاجىكستان ەلدەرىنە دە ەكسپورتتالادى دەپ كۇتىلىپ وتىر.
ءاليحان سمايىلوۆ ءوز سوزىندە ەلىمىزدە باسەكەگە قابىلەتتى وندىرىستەردىڭ سانى جىل سايىن ۇلعايىپ كەلە جاتقانىن اتاپ ءوتتى.
«مەملەكەت ولارعا جان-جاقتى قولداۋ كورسەتەدى، سونىڭ ارقاسىندا جاڭا جۇمىس ورىندارى قۇرىلىپ، ازاماتتارىمىزدىڭ ءال-اۋقاتى ارتىپ كەلەدى»، - دەدى ول.
جاڭا زاۋىتتىڭ جالپى ينۆەستيتسيالىق قۇنى - 5,8 ميلليارد تەڭگە. ونى ىسكە قوسۋدىڭ ناتيجەسىندە 260 تان استام ادام جۇمىسپەن قامتىلادى.
«جالپى ونىڭ قىزمەتى ءوڭىردىڭ عانا ەمەس، بۇكىل ەلدىڭ الەۋمەتتىك-ەكونوميكالىق دامۋىنا وڭ اسەرىن تيگىزەدى. بارشاڭىزدى كاسىپورىننىڭ اشىلۋىمەن قۇتتىقتايمىن! جۇمىستارىڭىز تابىستى بولسىن!»، — دەپ تۇيىندەدى پرەمەر-مينيستر.
