ساعاتىنا 260 كيلومەتر جىلدامدىقپەن قاشقان: پوليتسەيلەر كولىك ۇرىسىن جارتى ساعات قۋعان

تالدىقورعان. قازاقپارات - الماتى وبلىسىندا وزگەنىڭ كولىگىن ۇرلاعان كۇدىكتى پوليتسەيلەردەن قاشىپ، ءتۇرلى ايلا جاساعان، دەپ حابارلايدى قازاقپارات ءتىلشىسى.

الماتى وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، 13- قىركۇيەكتە ساعات تۇنگى 01:00 شاماسىندا قاراساي اۋدانى پوليتسياسىنىڭ كەزەكشى بولىمىنە 27 جاستاعى ەر ادام تەلەفون شالىپ، قاينار اۋىلىندا بەلگىسىز بىرەۋ «Toyota Camry» ماركالى كولىگىن ۇرلاپ كەتكەنى تۋرالى ارىزدانعان.

كولىك قۇرالىن زاڭسىز يەلەنۋ فاكتىسى بويىنشا اكىمشىلىك ءوندىرىس قوزعالدى (ق ر ق ك 200-بابى 1-بولىگى). حابارلامانى العان «190№ بورت» ەكيپاجى - پاترۋلدىك قىزمەت روتاسىنىڭ ينسپەكتورلارى پوليتسيا لەيتەنانتى ەسبول نيازبايەۆ پەن پوليتسيا لەيتەنانتى ادىلەت بايقادىروۆ «ۇستاۋ» جوسپارى بويىنشا «الماتى-بىشكەك» اۆتوجولىنا اتتانعان.

ولار راتسيا ارقىلى قولدى بولعان كولىكتىڭ قاشىپ كەلە جاتقانىن ءبىلىپ، ونىڭ قوزعالىس باعىتىندا جاساندى جول كەپتەلىسىن جاساعان. ۇرلانعان اۆتوكولىك وتە جوعارى جىلدامدىقپەن قوزعالىپ، پوليتسەيلەردىڭ توقتاۋ تۋرالى تالابىن ەلەمەستەن، كۇدىكتى كولىكتى بىردەن لەيتەنانت ە. نيازبايەۆقا قاراي باعىتتاعان. ول ءوزىنىڭ ەپتىلىگى مەن شاپشاڭدىعىنىڭ ارقاسىندا جول شەتىنە سەكىرىپ، كولىك سوققىسىنان قاشىپ ۇلگەرگەن.

كۇدىكتى قۋعىنشىلاردان قارا ءۇزىپ كەتۋى ءۇشىن ءتۇرلى مانيەۆرلەر جاساعان: جول شەتىندەگى بورديۋرلەردەن سەكىرىپ، جولدىڭ قارسى باعىتىنا شىققان، جاساندى كەدەرگىلەردەن اينالىپ ءوتۋ ءۇشىن جولسىز دالامەن جۇرگەن. ونىڭ كولىگى كەي ساتتە ساعاتىنا 260 كيلومەتردەن استام جىلدامدىقپەن قوزعالعان.

36 مينۋتتىق ەكسترەمالدى جۇرىستەن كەيىن 199№ ەكيپاجدىڭ جانار-جاعار مايى تاۋسىلۋعا جاقىنداعان. قىلمىسكەردىڭ ىزىنە تۇسكەن وزگە كولىكتەردىڭ الىستا قالعانىن ەسكەرە وتىرىپ، ەرجۇرەك پوليتسەيلەر قىلمىسكەردى جىبەرىپ الماۋ ءۇشىن كۇدىكتىنىڭ كولىگىن قاعىپ توقتاتۋعا شەشىم قابىلدايدى.

جۇرگىزۋشى لەيتەنانت ا. بايقادىروۆ جولدى جاقسى بىلەتىنىن پايدالانىپ، كامازدى باسىپ وزعاننان كەيىن، كۇدىكتى مىنگەن كولىكتى بەتوندى قورشاۋعا قاراي ىعىستىرعان. سوندا دا بوي بەرمەگەن جۇرگىزۋشى قاشۋعا تىرىسىپ، گازدى باسقان. ءبىراق قىسىلعان كولىك دوڭگەلەگى ءبىر ورنىندا اينالىپ قالا بەرگەن. ونىڭ جولىندا تۇرعان لەيتەنانت ە. نيازبايەۆ تابەلدىك قارۋىنان اسپانعا ءۇش رەت ەسكەرتۋ وعىن اتقان.

ءبىراق قىلمىسكەر پوليتسەيلەردىڭ تالاپتارىن ەلەمەي، ەسىكتەردى جاۋىپ، ءىز جاسىرۋعا ارەكەت ەتكەن.

ە. نيازبايەۆ جۇرگىزۋشى جاعىنان اينەكتى اياعىمەن سىندىرعان. ءتارتىپ ساقشىلارى قارسىلىق كورسەتكەن ونى تەرەزە ارقىلى دالاعا شىعارعان. جەرگە جاتقىزىپ، قولدارىنا كىسەن سالدى.

ۇستالعان ازاماتتىڭ ىشىمدىككە ماساڭ كۇيدەگى جامبىل اۋدانى ۇزىناعاش اۋىلىنىڭ 28 جاستاعى تۇرعىنى ەكەنى جانە بۇعان دەيىن بىرنەشە رەت سوتتالعانى بەلگىلى بولدى.

ول كىسى ءولتىرۋ، زورلاۋ، توناۋ، الاياقتىق جانە ۇرلىق جاساعانى ءۇشىن قىلمىستىق جاۋاپكەرشىلىككە تارتىلعانى انىقتالدى. كۇدىكتىنىڭ قاسىندا ۇرلانعان كولىكتە الماتى قالاسىنىڭ 30 جاستاعى تۇرعىنى بولعان، ول رۋلدە وتىرعان ادامنىڭ قۇربىسى ەكەنىن ايتقان.

ول ۇرلىق تۋرالى بىلمەگەن جانە كولىكتى توقتاتۋدى وتىنگەنىمەن، ونى تىڭداماعان. كۇدىكتى ۋاقىتشا ۇستاۋ يزولياتورىنا قامالدى. ول ۇرلىق، بەلسەندى قارسىلىق جانە پوليتسيا قىزمەتكەرلەرىنىڭ ومىرىنە قاستاندىق جاساۋ دەرەكتەرى بويىنشا زاڭ الدىندا جاۋاپ بەرەتىن بولادى.