ەسەپپەن قۇرىلعان نەكەلەر: استانادا 26 جاستاعى جىگىت 40 جاستاعى ايەلگە ۇيلەندى

استانا. قازاقپارات - ەلىمىزدە جاسى كەلگەن قىز- كەلىنشەكتەرگە ۇيلەنەتىن جاس جىگىتتەردىڭ قاراسى كوبەيگەن.

ءتىپتى جۋىردا ەلوردادا 40 جاستاعى ايەل مەن 26 جاستاعى جىگىتتىڭ نەكەسى قيىلىپتى. ماماندار، 2018 -جىلى مۇنداي وتباسىلاردىڭ قاتارى 25 پايىزعا ارتقانىن ايتادى.

دەسە دە ساراپشىلار «بۇل نەكەلەردىڭ باسىم بولىگى ەسەپپەن قۇرىلادى» دەيدى. بۇل تۋرالى ەۋرازيا ءبىرىنشى ارناسى حابارلايدى.

ماحاببات جاسقا قارامايدى. بۇگىندە ەلوردالىق جىگىتتەر وزدەرىنەن كىشى ەمەس، كەرىسىنشە كەمىندە 5-10 جاس ۇلكەن بويجەتكەندەرگە ۇيلەنە باستاعان. ونى ا ح ا ج ءبولىمىنىڭ(نەكەگە تىركەۋ ءبولىمى - رەد.) ماماندارى دا راستاپ وتىر. ەڭ قىزىعى، مۇنداي نەكەلەردىڭ سانى كۇن سايىن ارتىپ كەلەدى، دەيدى.

«ەكەۋىنىڭ جاسىنىڭ اراقاشىقتىعىن قاراساق، 5 جىل ەمەس، 2 جىل ەمەس، ودان دا كوپ! 75- جىلعى ايەل ادام بولسا، وسى تاقاۋدا 92- جىلعا ەر بالا. ياعني، ۇلتتارى قازاق، نەكەگە تۇرۋعا ءوتىنىش ءبىلدىردى. بىزدە وتە كوپ ونداي. مىسالى، 97- جىلعى ەر ازامات، قىز بالا 89 -جىلعى. ولارعا ءبىز ەشەتەڭە ايتا المايمىز. ارتىق سۇراق تا قويا المايمىز. كەيبىرەۋى ءبىر ايدان كەيىن كەلمەي قالىپ تا جاتادى. 1 اي ۋاقىت بەرىلەدى سول كىسىلەرگە ويلانۋعا. كەيبىر ازاماتتارىمىز كەلمەيدى» - دەيدى ا ح ا ج ءبولىمىنىڭ باس مامانى نازيرا يسكاكوۆا.

ال كەلەسى جۇپتىڭ شاڭىراق قۇرعانىنا سەگىز جىلدان اسىپتى. باقىتتى وتباسى بۇگىندە ەكى بالانى تاربيەلەپ وتىر. اسەمگۇل وتاعاسى اسقاربەكتەن بىرنەشە جاس ۇلكەن. ءبىراق، ەكى جاستىڭ ماحابباتى بەرىك بولعانى سونشالىق، ءتۇرلى قيىندىقتارعا توتەپ بەرگەن.

«باسىندا ەندى قارسى بولدى عوي، سوسىن ۇيلەنىپ بالا بولعاننان كەيىن. ەشكىمدى تىڭدامايسىڭ. باقىتتى بولساڭ بولدى دەدى» - دەيدى قالا تۇرعىنى اسقاربەك ەسەنقايىر.

دەسە دە، «قوعامدا بەلەڭ العان ترەند قازاق مەنتاليتەتىنە جات» دەپ ەسەپتەيدى اسىلگۇل ءابىش. ونىڭ پايىمىنشا، كەرىسىنشە جىگىتتىڭ جاسى قىز بالادان ۇلكەن بولعانى دۇرىس.

«قازىر قوعامدا اجىراسۋ كوپ، ءجيى بولىپ جاتىر. جاس ازاماتتار، وزىنەن جاسى ۇلكەن ايەل بالاسىنا ۇيلەنسە. اقىل توقتاتقان، بايسالدى قىزىعۋشىلىعى بار شىعار. ال نەگىزى ايەل ادام جاسى كىشى، ەر ادامدى ۇلكەن بولۋ كەرەك قوي. قازاق مەنتاليتەتىندە ول تاڭعالاتىن قۇبىلىس بولىپ ەسەپتەلىنەدى» - دەيدى قوعام بەلسەندىسى اسىلگۇل ءابىش.

دەسە دە، الەۋمەتتانۋشىلاردىڭ مۇنداي نەكەگە قاتىستى پىكىرى ەكىگە ءبولىندى. ءبىرى وتباسىندا شىنايى سەزىم بولسا، ەكىنشىسىندە ماتەريالدىق جاعداي الدا تۇرادى، ياعني ارنايى ەسەپپەن قۇرىلادى دەيدى.

«ەندى بارلىعىنا توپىراق شاشۋعا كەلمەيدى بۇل جەردە، سەبەبى ماحاببات دەگەن نارسە قاي قوعامدا بولسىن بار. ۇناتىپ قوسىلۋى دا مۇمكىن. مىسالى، ماحاببات جاسقا قارامايدى دەپ جاتامىز. دەگەنمەن دە، بۇنداي قۇبىلىستىڭ ەسەپپەن قۇرىلعان نەكە باعىتىندا جۇزەگە اسىپ جاتقاندىعىن بايقاۋعا بولادى. ەكىنشى بۇل ادامنىڭ جالقاۋلىق سانا سەزىمى. بىلايشا ايتقاندا كەزدە ەركەكتەردىڭ وزىنە ارتقان جاۋاپكەرشىلىكتەن قاشۋى. ناقتى ءبىر جوسپاردى جۇزەگە اسىرا الماۋى. سوندىقتان وزىنە دايىنعا قول جەتكىزۋ» - دەيدى الەۋمەتتانۋشى ەسىمبەك ارعىنبەك ۇلى.

قالاي دەسەك تە، 2017 -جىلى مۇنداي جۇپتاردىڭ 10 پايىزى نەكەسىن زاڭداستىرىپتى. ال 2018 -جىلدىڭ سوڭعى توعىز ايىندا وزىنەن جاسى الدەقايدا ۇلكەن قىز-كەلىنشەككە ۇيلەنگەندەردىڭ قاتارى 25 پايىزعا جەتكەن.