ۇلتتىق قوردىڭ اكتيۆتەرى 26 تريلليون 320 ميلليارد تەڭگەگە جەتتى
بۇل تۋرالى بۇگىن ۇكىمەت وتىرىسىندا 10 ايداعى مەملەكەتتىك بيۋجەتتىڭ اتقارىلۋى جايىندا بايانداعان ق ر پرەمەر-ءمينيسترىنىڭ ءبىرىنشى ورىنباسارى - قارجى ءمينيسترى ءاليحان سمايىلوۆ ايتتى، دەپ حابارلايدى قازاقپارات ءتىلشىسى.
«بيىلعى 10 اي ىشىندەگى كىرىستەردىڭ ءوسۋ قارقىنى 2018-جىلدىڭ وسىنداي كەزەڭىمەن سالىستىرعاندا جوعارى. مەملەكەتتىك بيۋجەتتىڭ كىرىستەرى - 14 پايىزعا، رەسپۋبليكالىق - 17 جانە جەرگىلىكتى بيۋجەتتەر - 7 پايىزعا ءوستى. شىعىستاردىڭ اتقارىلۋى دا جاقساردى: مەملەكەتتىك بيۋجەت شىعىستارى - 98,7، رەسپۋبليكالىق بيۋدجەت شىعىستارى - 99,2 جانە جەرگىلىكتى بيۋجەتتەردىڭ شىعىستارى - 98,4. بيۋجەت تاپشىلىعى ءىس جۇزىندە ەسەپتى كەزەڭ جوسپارىنان ەداۋىر تومەن قالىپتاستى: مەملەكەتتىك بيۋجەت بويىنشا - 995 ميلليارد تەڭگە، رەسپۋبليكالىق بيۋدجەت بويىنشا - 1 تريلليون 127 ميلليارد تەڭگە. جەرگىلىكتى بيۋجەتتەر بويىنشا 20 ميلليارد تەڭگە سوماسىندا پروفيتسيت قالىپتاستى. ۇلتتىق قوردىڭ اكتيۆتەرى 26 تريلليون 320 ميلليارد تەڭگەنى قۇرادى»، - دەدى ول.
ونىڭ دەرەگىنشە، رەسپۋبليكالىق بيۋدجەتكە تۇسەتىن كىرىستەر 5 تريلليون 285 ميلليارد تەڭگە سوماسىندا نەمەسە ەسەپتى كەزەڭگە ارنالعان جوسپارعا 100 پايىز جينالدى. 2018-جىلدىڭ 10 ايىمەن سالىستىرعاندا 771 ميلليارد تەڭگەگە ءوستى. نەگىزگى ءوسىم: قوسىلعان قۇن سالىعى - 443 ميلليارد تەڭگە، كورپوراتيۆتىك تابىس سالىعى - 194 ميلليارد تەڭگە، حالىقارالىق ساۋداعا جانە سىرتقى وپەراتسيالارعا سالىناتىن سالىقتار بويىنشا - 105 ميلليارد تەڭگە.
«جەرگىلىكتى بيۋجەتتەردىڭ مەنشىكتى كىرىستەرى 74 ميلليارد تەڭگەگە اسىرا ورىندالدى جانە 2 تريلليون 27 ميلليارد تەڭگەنى قۇرادى. وتكەن جىلدىڭ وسىنداي كەزەڭىمەن سالىستىرعاندا كىرىستەر 140 ميلليارد تەڭگەگە ءوستى. بۇل نەگىزىنەن سالىقتار ەسەبىنەن قامتاماسىز ەتىلدى. كىرىستەر جوسپارى ماڭعىستاۋ وبلىسىن جانە نۇر-سۇلتان قالاسىن قوسپاعاندا، بارلىق وڭىرلەردە اسىرا ورىندالدى»، - دەدى ءا. سمايىلوۆ.