قاڭتاردان باستاپ بالاباقشا تاربيشىلەرىنىڭ جالاقىسى 25 پايىزعا وسەدى - اسحات ايماعانبەتوۆ
بۇل تۋرالى وقۋ-اعارتۋ ءمينيسترى اسحات ايماعامبەتوۆ تۇركىستان وبلىسىنىڭ تۇرعىندارىمەن كەزدەسۋدە ايتتى، دەپ حابارلايدى قازاقپارات ءتىلشىسى.
مينيستر جاقىن ارادا مەملەكەتتىك تاپسىرىس الىپ وتىرعان بالاباقشالارعا تالاپ كۇشەيەتىنىن ءمالىم ەتتى.
ياعني، سانيتارلىق جانە ورتكە قارسى تالاپتاردى ساقتاۋ، بەينەباقىلاۋدىڭ بولۋى، بالالارمەن جۇمىس ىستەيتىن مامانداردىڭ ءبىلىمدى، بىلىكتى بولۋى شارت. سونداي-اق، قىزمەتكەرلەردىڭ تيپتىك شتاتتارداعى ستاتۋسقا سايكەس بولۋى قاجەت.
«كەيبىر فاكتىلەردى قاراپ اناليز جاسايتىن بولساق، كەي بالاباقشالار 40-50 بالانى ءبىر توپقا جيناپ قويىپ جۇمىس ىستەيدى ەكەن. ول قانداي مىقتى تاربيەشى بولسا دا، 5-6 كۇننەن كەيىن قيىن جاعدايعا ۇشىرايدى. ال، مەملەكەتتىك بالاباقشالاردا تۇسكە دەيىن ءبىر، تۇستەن كەيىن ءبىر تاربيەشى بار. توپتارداعى بالا سانى 25 تەن اسپايدى. بۇل بوستان بوسقا جاسالماعان. مىنە، وسىنداي قاجەتتى، ماڭىزدى، عىلىممەن دالەلدەنگەن شەشىمدەردى قابىلداپ، ەنگىزەمىز»، - دەدى مينيستر.
سونداي-اق، اسحات ايماعامبەتوۆ قاڭتار ايىنان باستاپ بالاباقشا تاربيەشىلەرىنىڭ جالاقىسى 25 پايىزعا وسەتىنىن ايتتى.
«جالاقى بويىنشا قوسىمشا ماسەلەلەردى قاراستىرىپ جاتىرمىز. زەرتتەۋلەر بالاباقشادا بالالاردىڭ بولاشاعى قالىپتاساتىندىعىن كورسەتىپ وتىر. سوندىقتان بالاباقشادان باستاپ ساپالى ءبىلىم، ساپالى تاربيە بەرسەك، مەكتەپتە دە، كوللەدجدە دە جاقسى كورسەتكىشكە قول جەتكىزەدى»، - دەدى مينيستر.