الماتىلىقتار 25 ماماندىق بويىنشا تەگىن كۋرستاردا وقىپ، ستيپەنديا الادى

الماتى. قازاقپارات - الماتى قالاسىنداعى جۇمىسسىز ازاماتتار سۇرانىسقا يە ماماندىقتار بويىنشا قىسقا مەرزىمدى تەگىن كاسىبي كۋرستاردان وتە الادى، دەپ حابارلايدى قازاقپارات ءتىلشىسى.

بيىل الماتىدا قىسقا مەرزىمدى كۋرستاردا 600-دەن استام ادامدى وقىتۋ جوسپارلانۋدا.

«بۇگىندە مەملەكەتتىك باعدارلاما اياسىندا 25 ماماندىق بويىنشا وقىتۋدى ۇسىناتىن قالانىڭ 24 وقۋ ۇيىمى جۇمىسپەن قامتۋ ورتالىعىمەن بىرگە جۇمىس جاساۋعا دايىن. جۇمىسپەن قامتۋ ورتالىعى، وقۋ ورتالىعى، جۇمىس بەرۋشى مەن كۋرس تىڭداۋشىسى اراسىندا ءتورت جاقتى كەلىسىمشارت جاسالادى. كۋرستار اياقتالعان سوڭ تىڭداۋشىلارعا جۇمىسقا ورنالاسۋعا كومەك كورسەتىلەدى»، - دەپ جاۋاپ بەردى الماتى قالاسىنىڭ الەۋمەتتىك ءال- اۋقات باسقارماسى اگەنتتىكتىڭ جىبەرگەن ساۋالىنا.

وقۋ مەرزىمى - ءۇش اي. وقۋ كەزىندە كۋرس تىڭداۋشىسىنا 20 مىڭ 948 تەڭگە كولەمىندە شاكىرتاقى تولەنەدى. كۋرس اياقتالعان سوڭ، تىڭداۋشىعا سەرتيفيكات بەرىلىپ، جۇمىسقا ورنالاسۋىنا كومەك كورسەتىلەدى. كۋرستارعا جازىلىپ، وقۋدان وتۋگە تەك الماتى قالاسىندا تۇراقتى نەمەسە ۋاقىتشا تىركەلگەن جۇمىسسىز ازاماتتار عانا وتە الادى.

كۋرستارعا جازىلۋ ءۇشىن الماتى قالاسى اكىمدىگىنىڭ حالىقتى جۇمىسپەن قامتۋ ورتالىعىنا حابارلاسۋ قاجەت.

ەسكە سالساق، وسىعان دەيىن الماتىدا حالىقتى جۇمىسپەن قامتۋ ورتالىعىنىڭ ديرەكتورى ديليارا يمانقۇلوۆا مەگوپوليستە ەڭ كوپ سۇرانىسقا يە ماماندىقتاردى ايتقان بولاتىن.

اۆتور: دۋمان ارعىنگەلدى