قازاقستان مەن رەسەي اراسىندا تاۋار اينالىمى 25 ميلليارد دوللارعا جەتتى – ق ر پرەزيدەنتى

None
None
ماسكەۋ. قازاقپارات - ماسكەۋدە وتكەن ۇجىمدىق قاۋىپسىزدىك تۋرالى شارت ۇيىمىنىڭ (ۇ ق ش ۇ) مەرەيتويلىق سامميتىنەن كەيىن مەملەكەت باسشىسى قاسىم-جومارت توقايەۆ رەسەي پرەزيدەنتى ۆلاديمير پۋتينمەن كەزدەسۋ وتكىزدى.

قازاقپارات بۇل تۋرالى اقورداعا سىلتەمە جاساپ حابارلايدى. پرەزيدەنتتەر ەكىجاقتى كۇن تارتىبىندەگى وزەكتى ماسەلەلەردى، سونداي-اق ساۋدا- ەكونوميكالىق سالاداعى قازاقستان- رەسەي ىنتىماقتاستىعىن تالقىلادى.

«شىن مانىندە، ەلدەرىمىز اراسىنداعى ساۋدا-ەكونوميكالىق جانە ساياسي ىقپالداستىقتىڭ قارقىنى ناشار دەۋگە ەش نەگىز جوق. تاۋار اينالىمى 25 ميلليارد دوللارعا جەتتى. رەسەي - قازاقستان ءۇشىن ساۋدا- ەكونوميكالىق سالاداعى باستى سەرىكتەس. وسى سەبەپتى، مەن، ۇكىمەتىمىزگە وسى قارقىندى جانە ساۋدا مەن ينۆەستيتسيالار كولەمىن ساقتاپ قانا قويماي، قازىرگى گەوساياسي جاعدايداعى بارلىق قيىندىقتارعا قاراماستان ولاردى ارتتىرۋ جونىندە مىندەت جۇكتەيمىن. مەن وزىممەن بىرگە وسى سالاعا جاۋاپتى پرەمەر-ءمينيستردىڭ ءبىرىنشى ورىنباسارى باستاعان ۇكىمەتتىڭ نەگىزگى شەنەۋنىكتەرىن الا كەلدىم. ولار تابىستى كەلىسسوزدەر جۇرگىزدى جانە ناقتى ناتيجەگە قول جەتكىزۋ ءۇشىن ولاردىڭ الدىنا فەدەراتسياسىنىڭ ۇكىمەتىمەن ىسكەرلىك باعىتتا جۇمىس ىستەۋ مىندەتى قويىلدى جانە ولار ناتيجەلى كەللىسوز وتكىزدى»، - دەدى قاسىم-جومارت توقايەۆ.

قازاقستان پرەزيدەنتى بۇگىندە ماشينا جاساۋ، مەتاللۋرگيا، حيميا ونەركاسىبى سياقتى سالالاردا جالپى قۇنى 4 ميلليارد دوللار بولاتىن 20 ءىرى جوبانىڭ ءارتۇرلى ساتىدا جۇزەگە اسىرىلىپ جاتقانىن ايتتى. رەسەي پرەزيدەنتى ءوز كەزەگىندە ەكى ەل اراسىنداعى ساۋدا- ەكونوميكالىق ىنتىماقتاستىقتى دامىتۋدىڭ وڭ قارقىنىن اتاپ ءوتتى.

«جالپى بىزدە بارلىق سالا جاقسى دامىپ كەلەدى. بىلتىر تاۋار اينالىمىنىڭ ءوسىمى 34 پايىز بولدى. رەسەي كومپانيالارى قازاقستان ەكونوميكاسىنا 17 ميلليارد دوللار ينۆەستيتسيا سالدى. بارىمىزگە تۇسىنىكتى ءارى بەلگىلى قازىرگى قيىنشىلىقتارعا قاراماستان، جاعداي جاقسى دامۋدا»، - دەدى ۆلاديمير پۋتين.

تاراپتار كۇن تارتىبىندەگى ەكىجاقتى كەشەندى ەكونوميكالىق ماسەلەلەردىڭ ءبارىن بيىل كۇزدە ورىنبوردا وتكىزۋگە جوسپارلانعان ايماقارالىق فورۋمدا تالقىلاۋعا ۋاعدالاستى. قاسىم-جومارت توقايەۆ ۆلاديمير پۋتيننىڭ شاقىرۋى بويىنشا بيىلعى ماۋسىم ايىندا پەتەربۋرگتە وتەتىن ەكونوميكالىق فورۋمعا قاتىساتىنىن ناقتىلادى. سونىمەن قاتار قازاقستاننىڭ ۇكىمەتتىك دەلەگاتسياسى ەكاتەرينبۋرگتە وتەتىن ءىرى ونەركاسىپتىك كورمەگە قاتىسۋدى جوسپارلاپ وتىر.


سوڭعى جاڭالىقتار