الەمنىڭ ۇزدىك 25 قوناق ءۇيى انىقتالدى

نۇر-سۇلتان. قازاقپارات – Travellers' Choice اتتى حالىقارالىق سىيلىق نەگىزىندە الەمنىڭ توپ قوناقۇيلەرى انىقتالدى.

رەيتينگ TripAdvisor سايتىندا، تۋريستەردىڭ پىكىرلەرى ارقىلى ءتۇزىلدى. وعان الەمنىڭ ۇزدىك 25 قوناق ءۇيى كىردى.

كوستا- ريكاداعى Tulemar Bungalows Villas قوناق ءۇيى رەيتينگتىڭ كوشباسشىسى اتاندى. وتەل 4700 وڭ پىكىرگە يە بولدى. قوناق ءۇي ورنالاسقان جەرى، تازالىعى جانە قىزمەت كورسەتۋى بويىنشا ەڭ جوعارى - 5,0 ۇپايدى يەلەندى. وتباسىلار ءۇشىن قولايلى، ۇسىنىلعان جابدىقتار تىزىمىنە: گيپواللەرگەندى بولمە، كونديتسيونەر، جەكە جاعاجاي، قوسىمشا ۆاننا بولمەسى جانە شاعىن اس ءۇي كىرەدى.

ەكىنشى ورىندا برازيليانىڭ گرامادو قالاسىندا ورنالاسقان Colline de France قوناق ءۇيى تۇر. ول ساياحاتشىلاردان ەكى جارىم مىڭداي «وتە جاقسى» دەگەن باعا الدى. قوناق ءۇي سونىمەن قاتار Praca Major Nicoletti (1,4 شاقىرىم) جانە Chave-Mestra Escape Game Gramado (1,4 شاقىرىم) سياقتى كورىكتى جەرلەرگە جاقىن ورنالاسقان. بولمەلەردە جارىقتان قورعايتىن پەردەلەر، حالاتتار، ميني-بار جانە قوسىمشا ۇزىن توسەكتەر بار.

ءۇشىنشى ورىندى كەڭ قۇمدى جاعاجايى مەن ءمولدىر تەڭىزى بار گرەكيالىق Ikos Aria جەڭىپ الدى.

كۋرورت «بارلىعىن قامتۋ» نەگىزىندە جۇمىس ىستەيدى. قوناق ۇيدەگى ىڭعايلىلىق تىزىمىنە باسسەين، مەيرامحانا، بالا كۇتۋ قىزمەتتەرى كىرەدى. كولىگى بار تۋريستەر ءۇشىن - تەگىن تۇراق قاراستىرىلعان. دەمالىس ورنى ساياحاتشىلاردان 5,0 ۇپاي جانە 1370 وڭ پىكىر الدى.

ەڭ جاقسى قوناقۇيلەر قاتارىندا مالديۆ ارالدارى، يندونەزيا، شۆەيتساريا، تۇركيا، يسپانيا، تايلاند جانە مىسىرداعى بىرنەشە وتەل بار.

massaget.kz