قىتايداعى تابيعات اپاتىنان 25 ادام كوز جۇمدى
حىنانداعى (ورتالىق قىتاي) نوسەر جاۋىننان كەيىن 25 ادام مەرت بولدى، تاعى 7 ادام ءىز-ءتۇزسىز جوعالىپ كەتكەن. بۇل جايىندا جەرگىلىكتى بيلىك سارسەنبى كۇنى كەشكىسىن وتكىزگەن باسپا ءسوز ءماسليحاتىندا ءمالىم ەتتى.
«وڭىردە 16 شىلدەدەن بەرى جاڭبىر قۇيىپ تۇر. ودان 1,24 ميلليوننان استام ادام زارداپ شەككەن. پروۆينتسيادا تۇراتىن شامامەن 164710 ادام قاۋىپسىز جەرگە ەۆاكۋاتسيالاندى»، - دەپ حابارلادى باسپا ءسوز كونفەرەنسياسىندا حىنان پروۆينسياسىنىڭ سۋ تاسقىنى جانە قۇرعاقشىلىقپەن كۇرەس جونىندەگى شتابىنىڭ كەڭسە باستىعى سيۋي جۋن.
ءبىز بۇعان دەيىن قىتايدىڭ جىڭجوۋ قالاسىندا نوسەر جاڭبىر سالدارىنان كولىك قاتىناسى توقتاپ، ەلەكتر قۋاتىنىڭ جۇمىسى بۇزىلعانىن حابارلاعان بولاتىنبىز. سۋ دەڭگەيى قاتتى كوتەرىلگەندىكتەن قالاداعى جول قوزعالىسى تەجەلگەن.
80-نەن استام اۆتوبۋس مارشرۋتىنىڭ قوزعالىسى ۋاقىتشا توقتاتىلعان، مەترو دا جۇرمەيدى. نوسەر سالدارىنان قالانىڭ بىرنەشە اۋدانى سۋسىز جانە ەلەكتر جارىعىنسىز قالدى.
اۆتور: جانات قاپالبايەۆا