قازاقستان مەن قىتاي اراسىنداعى سۋ كەلىسىمدەرىنىڭ 25 پايىزى ماقۇلداندى

نۇر-سۇلتان. قازاقپارات - ەكولوگيا، گەولوگيا جانە تابيعي رەسۋرستار ۆيتسە-ءمينيسترى سەرىك قوجانيازوۆ قازاقستان مەن قىتاي اراسىنداعى ترانسشەكارالىق وزەندەر ماسەلەسى بويىنشا جۇرگىزىلىپ جاتقان كەلىسسوزدەردىڭ ناتيجەسى تۋرالى ءمالىم ەتتى، دەپ حابارلايدى قازاقپارات ءتىلشىسى.

ورتالىق كوممۋنيكاتسيالار قىزمەتىندە مينيسترلىك وكىلىنە ترانسشەكارالىق وزەندەردىڭ ماسەلەسى تۋرالى بىرنەشە ساۋال قويىلدى.

سول ساۋالدارعا جاۋاپ بەرگەن سەرىك جۇمانيازوۆ قىتايدىڭ اتالمىش ماسەلەدە وزگە ەشبىر ەلدەرمەن كەلىسسوز ۇستەلىنە وتىرماعانان ەسكە سالدى.

«قىتاي ءوز تاريحىندا وسى كۇنگە دەيىن ترانسشەكارالىق سۋ وبەكتىلەرى بار 18 ەلدىڭ ەشقايسىسىمەن سۋ ءبولۋ جونىندە بىردە-ءبىر حالىقارالىق شارت جاساسقان جوق. رەسەي فەدەراتسياسى، ءۇندىستان، پاكىستان، اۋعانستان، قىرعىزستان، تاجىكستان، ۆەتنام، بانگالدەش، نەپال، سولتۇستىك كورەيا، كامبودجا سياقتى ەلدەردىڭ ءبىر دە بىرەۋىمەن حالىقارالىق كەلىسىمگە وتىرماعان. 2013 -جىلعى قىركۇيەكتە ق ح ر ءتوراعاسى شي جينپيڭنىڭ قازاقستانعا مەملەكەتتىك ساپارى بارىسىندا قازاقستان مەن قىتاي باسشىلارى دەڭگەيىندە قول جەتكىزىلگەن ۋاعدالاستىقتاردىڭ ارقاسىندا 2015 -جىلدان باستاپ ترانسشەكارالىق وزەندەر سۋىن ءبولۋ تۋرالى كەلىسىم جوباسىن ازىرلەۋ مەن كەلىسۋدى باستاۋ تۋرالى شەشىم قابىلدانعان بولاتىن»، - دەدى ۆيتسە-مينيستر.

وسى كەلىسىم نەگىزىندە ەكى جاقتىڭ ماماندارىنىڭ باسىن قوسقان ترانسشەكارالىق وزەندەردى پايدالانۋ جانە قورعاۋ جونىندەگى قازاقستان- قىتاي بىرلەسكەن كوميسسياسى قۇرىلعان بولاتىن. ۆەدومستۆو وكىلىنىڭ ايتۋىنشا، بۇگىندە وسى بىرلەسكەن كوميسسيانىڭ 17 وتىرىسى ءوتىپتى.

«ترانسشەكارالىق وزەندەر سۋىن ءبولۋ تۋرالى كەلىسىم جوباسىن ازىرلەۋ جانە كەلىسۋ جۇمىستارى قازىرگى پاندەمياعا قاراماستان جالعاسىپ جاتىر. كەلىسىمدى ماقۇلداۋ وتە كۇردەلى جۇمىس ەكەنىن ايتقىم كەلەدى. عىلىمي زەرتتەۋلەر جۇرگىزۋدى قاجەت ەتەدى. بۇل جۇمىسقا گەوگرافيا جانە سۋ قاۋىپسىزدىگى ينستيتۋتىنىڭ جوعارى بىلىكتى ماماندارى تارتىلىپ وتىر.

تارتىلعان ساراپشىلاردىڭ ىشىندە قازاق ك س ر-نىڭ بۇرىنعى سۋ شارۋاشىلىعى ءمينيسترى، قازاقستاننىڭ سۋ رەسۋرستارى جونىندەگى مەملەكەتتىك كوميتەتىنىڭ العاشقى ءتوراعاسى ناريمان قىپشاقبايەۆ، 2002-2009 -جىلدارى سۋ رەسۋرستارى كوميتەتى ءتوراعاسىنىڭ ورىنباسارى بولعان ءامىرحان كەنشينوۆ، 40 جىلدىڭ ەڭبەك ءوتىلى بار سۋ مامانى الەكساندر كالاشنيكوۆ، گەوگرافيا جانە سۋ قاۋىپسىزدىگى ينستيتۋتى ديرەكتورىنىڭ ورىنباسارى سايات ءالىمقۇلوۆ سياقتى بىلىكتى ماماندار بار. وسى ساراپشىلاردىڭ جوعارى بىلىكتىلىگى بىزگە ايتارلىقتاي ناتيجەلەرگە جەتۋگە مۇمكىندىك بەردى. ناقتى ايتساق، ترانسشەكارالىق وزەندەر سۋىن ءبولۋ تۋرالى كەلىسىم جوباسى ءماتىنىنىڭ 25 پايىزى ماقۇلداندى»، - دەدى سەرىك قوجانيازوۆ.

اۆتور: ەسىمجان ناقتىباي