قازاقپارات كۇنتىزبەسى: 25- اقپان
ەستە قالار وقيعالار
1971-جىلى جەزقازعان مىس قورىتۋ زاۋىتىنىڭ العاشقى كەزەگى ىسكە قوسىلدى.
1991 -جىلى قازاق ك س ر مينيسترلەر كەڭەسىنىڭ «سەمەي قالاسىندا رادياتسيالىق مەديتسينا جانە ەكولوگيا ينستيتۋتىن قۇرۋ تۋرالى» قاۋلىسى قابىلداندى. ينستيتۋت عىلىمي قىزمەتىنىڭ نەگىزگى باعىتتارى - رادياتسيالىق جانە باسقا دا فاكتورلاردىڭ قورشاعان ورتاعا، ادامدارعا، جانۋارلارعا اسەرىن زەرتتەۋ.
1993 -جىلى قازاق ك س ر و عارىشتىق زەرتتەۋلەر اگەنتتىگى قازاقستان رەسپۋبليكاسىنىڭ ۇلتتىق اەروعارىش اگەنتتىگى (ۇ ا ع ا) بولىپ قايتا قۇرىلدى. قازاقستان رەسپۋبليكاسى ۇ ا ع ا باس ديرەكتورى بولىپ تۇڭعىش قازاق عارىشكەرى توقتار اۋباكىروۆ تاعايىندالدى.
1994 -جىلى قازاقستان رەسپۋبليكاسى مەن كامبودجا كورولدىگى اراسىنداعى ديپلوماتيالىق قارىم-قاتىناس ورنادى.
1999 -جىلى قازاقستاندا تاۋەلسىزدىك العاننان كەيىنگى العاشقى حالىق ساناعى باستالدى. ساناق ناۋرىزدىڭ 4 ىنە دەيىن جالعاستى. مەملەكەت اۋماعى 1463 ساناق بولىمدەرىنە ءبولىندى. ساناق قورىتىندىسى بويىنشا قازاقستاندا 15673400 ادام تۇرادى.
2008 -جىلى س. سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ (قاز ا ت ۋ) «اق جەلكەن» ستۋدەنتتىك تەاترى قۇرىلدى. جىل سايىن تانىمال قازاق جانە شەتەلدراماتۋرگتارىنىڭ قويىلىمدارىن قويادى.
2012 -جىلى ستۋدەنتتىك تەاتر ساكەن سەيفۋلليننىڭ ءومىرى مەن قىزمەتىنە جانە رۋحاني مۇراسىنا ارنالعان «اقىن مەن اجال» سپەكتاكلىنىڭ پرەمەراسىن قويدى. بۇل تۋىندىنى «اق جەلكەن» ستۋدەنتتىك تەاترى ءۇشىن اقىن، قازاقستان جازۋشىلار وداعىنىڭ مۇشەسى گ. ەشتانايەۆ ارنايى جازدى.
2009 -جىلى پولشادا «پولياك بەنەديكت: ەۋروپادان ازياعا قازاقستان ارقىلى (1245-1247 ج.ج.)» اتتى كىتاپ جارىق كوردى. وسىدان جەتى عاسىردان استام، ماركو پولو دۇنيەنىڭ ازيالىق بولىگىنە كەلگەنىنەن 30 جىل بۇرىن، فرانسيسكاندىق تاقۋا بەنەديكت پولياك قاسيەتتى تاقتىڭ ديپلوماتيالىق ميسسياسى قۇرامىندا ەۋروپالىقتاردىڭ ىشىندە ءبىرىنشى بولىپ، قازىرگى قازاقستان دالاسىن باسىپ ءوتىپ، ازيا قۇرلىعىنىڭ تەرەڭ قويناۋىنا ساياحات جاسادى.
بۇل ساياحاتتاۋدىڭ ناتيجەسى زامانداستارىنىڭ كۇتكەن جاڭالىقتارىنىڭ بارىنەن دە اسىپ ءتۇستى. پولياك ساياحاتشىسىنىڭ جاساعان حابارلاماسى ەۋرازياداعى التىن وردانىڭ سالتانات قۇرۋ داۋىرىندەگى ەڭ جارقىن قۇجاتتاردىڭ ءبىرى. عالىمداردىڭ پىكىرى بويىنشا، پولياك بەنەديكت ۇلى دالا تۋرالى اقپارات جيناۋدا ماڭىزدى ءرول اتقاردى، وسىنىڭ ارقاسىندا ەۋروپا ءبىرىنشى رەت دالا تۇرعىندارىنىڭ ءومىرى مەن تۇرمىسى تۋرالى جايلاردى ءبىلدى.
ۆارشاۆاداعى قازاقستان ەلشىلىگى باستاماسىمەن باسىلىپ شىققان جاريالانىمدا وقىرماندارعا ۆەنا جانە پاريج قالالارىنداعى ۇلتتىق كىتاپحانالاردا ساقتالعان وسى ساياحاتتىڭ جىلناماسى بەرىلگەن. سونىمەن قاتار، ساياحات بارىسىن سيپاتتاعان كونە قولجازبالار عىلىمي اينالىمعا تۇڭعىش رەت بىرنەشە تىلدە: لاتىن، پولياك، قازاق جانە ورىس تىلدەرىندە ەنگىزىلدى.
2010 -جىلى الماتىدا ق ر ورتالىق مەملەكەتتىك مۋزەيىندە «ۋاقىت اعىمىنداعى حاتتار» كورمەسىنىڭ اشىلۋى ءوتتى. وندا اراب، لاتىن جانە كيريلل قارپى نەگىزىندە جازىلعان ىسكەرلىك جانە جەكە حاتتار قويىلدى. ولاردىڭ اراسىندا شوقان ءۋاليحانوۆ، اباي، الكەي مارعۇلان، مۇحتار اۋەزوۆ، احمەت جۇبانوۆتىڭ جازعان حاتتارى بار.
2010 -جىلى الماتىداعى قازاق- بريتان ۋنيۆەرسيتەتىندە رەسپۋبليكاداعى العاشقى مۇناي مۇراجايى اشىلدى. قازىرگى تاڭدا قولدا بار بارلىق جادىگەرلەر «مۇناي-گاز سالاسىنىڭ تاريحى»، «مۇناي- گاز ءىسىنىڭ گەولوگيالىق-گەوفيزيكالىق نەگىزى»، «مۇناي كاسىبىنىڭ قۇرال-جابدىقتارى» دەگەن 3 سەكتسياعا توپتاستىرىلىپ وتىر.
2012 -جىلى ەلورداداعى بەيبىتشىلىك جانە كەلىسىم سارايىندا «استانا - تۇركى الەمىنىڭ مادەني استاناسى» جىلىنىڭ اشىلۋ سالتاناتى ءوتتى.
مادەني شارا بارىسىندا مارتەبەلى مەيماندار مەن ەلوردا جۇرتشىلىعىنىڭ الدىنا شىعىپ ءسوز سويلەگەن ق ر مادەنيەت جانە اقپارات ءمينيسترى دارحان مىڭباي «استانا - تۇركى الەمىنىڭ مادەني استاناسى» جىلىن وتكىزۋ بارشا تۇركىتىلدەس مەملەكەتتەردىڭ رۋحاني دامۋىنا سونى سەرپىن بەرەتىنىن اتاپ ءوتتى.
2014 -جىلى ق ب ت ۋ حالىقارالىق ەكونوميكا مەكتەبىنىڭ (ح ە م) 2 ستۋدەنتى مەرۋەرت ەركەبۇلان مەن حاليدا عالىموۆا لوندون ۋنيۆەرسيتەتى ەمتيحاندارىنىڭ قورىتىندىسى بويىنشا ۇزدىك ناتيجە كورسەتتى. ق ب ت ۋ ح ە م 4 كۋرس ستۋدەنتى م. ەركەبۇلان 100 بالدىڭ 92 ۇپايىن جيناپ، «elements of Econometrics» ءپانى بويىنشا ۇزدىك اتاندى. ال ح. عالىموۆا «economics of Labour» پانىنەن 90 ۇپايعا يە بولعان. لوندون ۋنيۆەرسيتەتىنىڭ ەمتيحاندارىن جىل سايىن 180 ەلدىڭ 54 مىڭ ستۋدەنتى ءبىر ۋاقىتتا تاپسىرادى.
2015-جىلى قازاقستان رەسپۋبليكاسى تۇڭعىش پرەزيدەنتىنىڭ مۋزەيىندە بەينەلەۋ جانە ساندىك- قولدانبالى ونەر تۋىندىلارىنىڭ «قازاق حاندىعى: ۇلى دالانىڭ ۇلى بەينەلەرى» اتتى كورمەسىنىڭ اشىلۋ ءراسىمى ءوتتى.
ەكسپوزيتسيادا ءبىرقاتار تاريحي ارتەفاكتىلەر: رەسەي پاتشايىمى I ەليزاۆەتانىڭ اتىنان ابىلاي حانعا تارتۋ ەتىلگەن اتاقتى قىلىشتىڭ بولىگى، بولەك باتىردىڭ دۋلىعاسى، سونىمەن قاتار ق. التىنبەكوۆتىڭ تاريحي دالدىكپەن ورىنداعان قازاق حاندارىنىڭ ءمور-جۇزىكتەرى مەن ا. ءابدۋبايتتىڭ التىن زەرلى جىپپەن كەستەلەنگەن كوركەم پاننولارى بار.
2017 -جىلى ماسكەۋدە ماحامبەت وتەمىس ۇلى اتىنداعى اتىراۋ قازاق دراما تەاترى العاش رەت رەسەيلىك جازۋشى گەورگي پرياحيننىڭ «تەرگەۋ» پەساسىن قويدى.
2019 -جىلى پولشادا پولونيا العاشقى جاستار قىسقى چەمپيوناتى ءوتتى. وعان قۇرامىنا الماتى، استانا، كوكشەتاۋ قالالارى مەن سولتۇستىك قازاقستان وبلىسىنىڭ ياسنايا پوليانا اۋىلىنىڭ وكىلدەرى كىرگەن قازاقستان قۇراماسى قاتىستى.
كرىنيتسا- زدرۋي كۋرورتتى قالاشىعىندا وتكەن جارىسقا اۆستريا، بەلارۋس، ۇلى بريتانيا، ۆەنگريا، يسلانديا، يسپانيا، يتاليا، قازاقستان، ليتۆا، رەسەي، ۋكراينا جانە چەحيا سپورتشىلارى قاتىستى. كوماندالىق ەسەپتە قازاقستاندىقتار چەحيا مەن ليتۆادان كەيىنگى ءۇشىنشى ورىنعا يە بولدى.
ماراپاتتى جۇلدەگەرلەرگە چەمپيوناتتىڭ جابىلۋ سالتاناتىنا قاتىسقان پولشا سەناتىنىڭ باسشىسى ستانيسلاۆ كارچيەۆسكي تابىستادى.