ەلوردادا 25 مىڭنان استام وقۋشى ءبىرىنشى سىنىپقا بارادى
قۇجاتتاردى قابىلداۋ 20- تامىزعا دەيىن جۇرگىزىلەدى، دەپ حابارلايدى قازاقپارات قالا اكىمدىگىنە سىلتەمە جاساپ.
قالالىق ءبىلىم باسقارماسىنىڭ مالىمەتىنشە، جاڭا وقۋ جىلىندا ەلوردادا ءبىرىنشى سىنىپقا 25 مىڭنان استام وقۋشى قابىلدانادى. قۇجاتتاردى قابىلداۋ egov.kz ەلەكتروندى ۇكىمەت پورتالى ارقىلى جانە قاعاز فورماتتا جۇرگىزىلەدى. بۇگىنگى تاڭدا ءبىرىنشى سىنىپقا 21406 ءوتىنىش بەرىلىپ، 16123 ءوتىنىش قابىلداندى.
ەستەرىڭىزگە سالا كەتەيىك، 1- قىركۇيەكتەن باستاپ بارلىق ەلوردالىق مەكتەپتەر (1-11- سىنىپتاردا) مەن كوللەدجدەردە وقۋ جىلى قاشىقتان باستالادى. بۇل رەتتە باستاۋىش سىنىپ وقۋشىلارى ءۇشىن (1 دەن 4 كە دەيىن) «كەزەكشى سىنىپ» جۇمىس ىستەيدى. ياعني، اتا- انالاردىڭ ءوتىنىشى بويىنشا، قاتاڭ سانيتاريا نورمالارىن ساقتاي وتىرىپ، «كەزەكشى سىنىپتار» اشىلادى. وقىتۋ بىرنەشە اۋىسىممەن ۇيىمداستىرىلادى.
«سىنىپتار شاعىن توپتارعا ءبولىنىپ جيناقتالادى. وسى توپتارداعى بالا سانى 10-15 تەن اسپاۋى كەرەك. ساباق ءبىر كابينەتتە وتەدى، ءۇزىلىس ءتۇرلى ۋاقىتتا بولادى. سونىمەن قاتار، پاندەردىڭ ءبىر بولىگى قاشىقتان جۇرگىزىلەدى»، - دەپ اتاپ ءوتتى ءبىلىم باسقارماسىنىڭ وكىلدەرى.
بۇعان دەيىن حابارلانعانداي، نۇر-سۇلتاندا 12 مىڭنان استام پەداگوگ (مەكتەپ، كوللەدج، بالاباقشا تاربيەشىلەرى) قاشىقتان وقىتۋدى ۇيىمداستىرۋ بويىنشا ونلاين كۋرس وقىدى. بالالار، اتا-انالار جانە بالاباقشا قىزمەتكەرلەرى ءۇشىن جۇمىس الگوريتمى جاسالدى. بارلىق نىسان سانيتارلىق تالاپقا سايكەس دايىندالعان.