ماڭعىستاۋدا كوروناۆيرۋس جۇقتىرعان 25 ناۋقاستىڭ جاعدايى اۋىر

None
None
اقتاۋ. قازاقپارات - ماڭعىستاۋ وڭىرىندە كوروناۆيرۋستىڭ الدىن الۋ بويىنشا قولعا الىنعان شارالار كۇشەيتىلگەنىمەن، قازىرگى احۋال تۇراقسىز بولىپ وتىر.

سوعان قاراماستان ستاتسيونارلار مەن دارىگەرلىك بريگادالاردى ۇيىمداستىرۋ جۇمىستارى قولعا الىندى، - دەپ حابارلايدى قازاقپارات ءتىلشىسى.

بۇل تۋرالى ماڭعىستاۋ وبلىسى دەنساۋلىق ساقتاۋ باسقارماسىنىڭ باسشىسى جامال جامانبايەۆا ايتىپ بەردى. عالىمداردىڭ ماتەماتيكالىق مودەلى بويىنشا ۇستىمىزدەگى جىلدىڭ تامىز ايىنىڭ سوڭىنا دەيىن، Covid-19 ىندەتىمەن ناۋقاستانعاندار سانى 10 ەسە ءوسۋى مۇمكىن.

بۇل جاعدايدا كوز جۇماتىندار سانى دا از بولمايىن دەپ تۇر. سول سەبەپتى ساقتىق شارالارىنا ءالى دە ۇلكەن جاۋاپكەرشىلىكپەن قاراپ، كارانتين رەجيمىن ساقتاۋ قاجەت.

اسىرەسە حالىق كوپ شوعىرلاناتىن ورىندارعا بارماۋ، بەتپەردە تاعىپ، قولعاپ كيىپ ءجۇرۋ، قولدى ۇنەمى جۋۋ سياقتى ەرەجەلەردى ەستەن شىعارماعان ءجون. ال يممۋنيتەتى مىقتى ادامداردىڭ اعزاسى كوروناۆيرۋستىق ينفەكتسيانى ءوز بەتىنشە جەڭە الادى. ول ءۇشىن دۇرىس تاماقتانۋ كەرەك. بۇعان دەيىن ازىرلەنگەن ءىس-قيمىل جوسپارىنا سايكەس، اۋرۋدىڭ كۇرت ءوسۋى جاعدايىندا ناۋقاستاردى جاتقىزاتىن ينفەكتسيالىق جانە پروۆيزورلىق ستاتسيونارلاردى دايىنداۋ جان-جاقتى پىسىقتالعان بولاتىن. بۇل رەتتە وبلىستىق تۋبەركۋلەزگە قارسى ديسپانسەر مەن پسيحيكالىق دەنساۋلىق ورتالىعىنىڭ عيماراتى ءبىرىنشى كەزەكتە تۇردى. جوسپار بويىنشا كەلەسى - ماڭعىستاۋ وبلىستىق اۋرۋحاناسىنىڭ «ۆ» بلوگى.

ودان ءارى وسكەن جاعدايدا - وبلىستىق اۋرۋحانانى پروۆيزورعا تولىق كوشىرۋ ماسەلەسى تۋىنداۋى عاجاپ ەمەس. ۇكىمەتتىڭ تاپسىرماسى بويىنشا ادام ءومىرىن قۇتقارۋ ءۇشىن بارلىق رەزەرۆتەر مەن رەسۋرستاردى پايدالانۋ قاجەت. وكىنىشكە قاراي، 2 ادام كوز جۇمدى. بۇل - تەك ستاتسيونارلارداعى جاعداي عانا. قازىرگى ۋاقىتتا اقتاۋ جانە جاڭاوزەن قالالارىندا، سونداي-اق بەينەۋ اۋدانىندا توسەك ورىندارىنىڭ جەتىسپەۋى بايقالۋدا. سول سەبەپتى قوسىمشا پروۆيزورلىق ستاتسيوناردى اشۋ ارقىلى جوسپاردىڭ كەلەسى قادامىنا ءوتۋ تۋرالى شەشىم قابىلداندى. ماڭعىستاۋ وبلىستىق اۋرۋحاناسىنىڭ بازاسىندا «ۆ» بلوگىندا كوروناۆيرۋسقا كۇدىكتى ادامدار ءۇشىن قوسىمشا توسەكتەر دايىندالدى.

«ۆ» بلوگى اۋرۋحانانىڭ بۇكىل عيماراتىنىڭ ۇشتەن ءبىر بولىگىن قۇرايدى، عيماراتتىڭ نەگىزگى بولىگىنەن تولىعىمەن قورشالعان. بۇل جەرگە تەك كوروناۆيرۋسقا كۇدىگى بار ادامدار عانا جاتقىزىلادى. اۋرۋدىڭ كۇرت وسۋىنە بايلانىستى وبلىستىڭ بارلىق ستاتسيونارلارىنا جوسپارلى تۇسۋلەر شەكتەلگەن بولاتىن.

وسىلايشا، كەلىپ تۇسكەن ناۋقاستار سانىنىڭ ازايعاندىعى بايقالىپ وتىر. اۋرۋحانالار تەك شۇعىل قىزمەتتە جۇمىس ىستەيدى. ەمىن ۇيدە جالعاستىرا الاتىن پاتسيەنتتەردىڭ باسىم بولىگى امبۋلاتورلىق ەمدەۋگە شىعارىلدى. كەي بولىمشەلەردى بىرىكتىرۋگە، ال كەي بولىكتەرىن ءىشىنارا جابۋعا تۋرا كەلدى.

دارىگەرلەر جەتىسپەيتىنى تاعى بار. اقتوبە وبلىسىنان 20 دارىگەر مەن مەدبيكەلەر كەلەدى دەپ كۇتىلۋدە. وڭىردە كوروناۆيرۋستىڭ بار-جوعىن انىقتايتىن 4 زەرتحانا جۇمىس ىستەيدى.

ايتا كەتۋ كەرەك، Covid-19 بارلىق جاعدايدا ناقتى انىقتالا بەرمەيدى. بۇل سۇراققا ناقتى جاۋاپ بەرۋ وتە قيىن. كوپ ادامدار پنيەۆمونيا بارىن العا تارتىپ مەديتسينالىق كومەككە جۇگىنىپ جاتادى، كەيدە كوروناۆيرۋستىڭ كلينيكالىق سيمپتومدارى بويىنشا سايكەس كەلىپ جاتادى، الايدا ۆيرۋس ءاردايىم ادامنىڭ بويىنان تابىلا بەرمەيدى. مۇنداي جاعدايلار وتە كوپ كەزدەسەدى.

وڭىردەگى ينفەكتسيالىق ستاتسيونارلاردا كوروناۆيرۋستان ەمدەلىپ شىققاندار سانى - 344 ادام، ال اۋىرعاندار سانى - 449 بولاتىن. پروۆيزورلىق ستاتسيونارلاردا قازىر 400 دەن استام ناۋقاس ەمدەلۋدە، ونىڭ 25 ءنىڭ جاعدايى اۋىر جانە ولار تىنىس الۋ اپپاراتىنا قوسىلعان. بارلىق ەمحانالاردا «Call-center» جۇمىس ىستەيدى، سول سەبەپتى جەدەل جاردەم قىزمەتىنىڭ جۇمىسى اۋىرلاي تۇسكەندىگىن ەسكەرىپ، اۋرۋدىڭ العاشقى بەلگىلەرى پايدا بولسا بىردەن «103» قىزمەتىنە حابارلاماي، ۋچاسكەلىك دارىگەرمەن بايلانىسقان ءجون. ال، قاجەت بولعان جاعدايدا جەدەل جاردەم ناۋقاستى ستاتسيونارعا نەمەسە اۋرۋحانانىڭ ينفەكتسيالىق بولىمشەسىنە جەتكىزەدى.

سوڭعى جاڭالىقتار