قازاقستاننىڭ يادرولىق قارۋدى تاراتپاۋ تۋرالى شارتقا قوسىلعانىنا - 25 جىل
بۇل تۋرالى ق ر سىرتقى ىستەر ءمينيسترىنىڭ ورىنباسارى ەرجان اشىقبايەۆتىڭ تۇسىنىكتەمەسىندە ايتىلعان.
2019-جىلعى 14- اقپان - 25 جىل بۇرىن وسى كۇنى - 1994-جىلعى 14- اقپاندا قازاقستان پرەزيدەنتى نۇرسۇلتان نازاربايەۆ امەريكا قۇراما شتاتتارىنا رەسمي ساپارى بارىسىندا يادرولىق قارۋدى تاراتپاۋ تۋرالى شارتتىڭ (ي ا ق ت ش) دەپوزيتاري ەلى رەتىندە پرەزيدەنت بيلل كلينتونعا راتيفيكاتسيا تۋرالى قۇجاتتاردى تاپسىردى.
ءدال سول ساتتەن قازاقستان يادرولىق قارۋسىز مەملەكەت رەتىندە ي ا ق ت ش- قا رەسمي تۇردە قوسىلدى. بۇنىڭ الدىندا سەمەي سىناق پوليگونىن جابۋ، يادرولىق مارتەبەدەن باس تارتۋ جانە ك س ر و قۇلدىراۋىنان كەيىن مۇرا قالعان بارلىق يادرولىق قارۋدى قازاقستاننىڭ اۋماعىنان شىعارۋ تۋرالى مەملەكەت باسشىسىنىڭ اقىلعا سالىنعان جانە كورەگەن شەشىمىمەن بايلانىستى ۇلكەن جۇمىس اتقارىلدى.
1992-جىلعى 23- مامىردا بەلارۋس جانە ۋكراينامەن بىرگە ستراتەگيالىق شابۋىل قارۋلارىن ازايتۋ جانە شەكتەۋ تۋرالى ك س ر و مەن ا ق ش اراسىنداعى شارتقا ليسسابون حاتتاماسىنا قول قويىپ، ءبىز وزىمىزگە ي ا ق ت ش- قا يادرولىق قارۋسىز مەملەكەت رەتىندە قوسىلۋ تۋرالى مىندەتتەمە الدىق.
1991-جىلدىڭ باسىنداعى جاعداي بويىنشا قازاقستاننىڭ اۋماعىندا كونتينەنتارالىق بالليستيكالىق راكەتالار ءۇشىن 1216 يادرولىق وقتىق پەن اۋىر بومبالاۋشى ءۇشىن يادرولىق زاريادتى قامتيتىن جاپپاي قىرىپ-جوياتىن قارۋدىڭ ءىرى ارسەنالى ورنالاسقانىن ەسكە سالعان ءجون.
قازاقستاننىڭ ي ا ق ت ش- قا قوسىلۋى يادرولىق قارۋدان ازات الەمگە قول جەتكىزۋدىڭ ىزگىلىكتى ۇمتىلىستارىنا نەگىزدەلگەن، ەلىمىزدىڭ سىرتقى ساياسي باعىتىن ىسكە اسىرۋدا ماڭىزدى كەزەڭ بولدى.
ي ا ق ت ش يادرولىق قارۋدىڭ تارالۋىنا جول بەرمەۋگە جانە تۇپكى قورىتىندىسىندا ونىڭ تولىق جويىلۋىنا، سونداي-اق اتوم ەنەرگياسىن بەيبىت ماقساتتا قولدانۋعا جاردەمدەسۋگە باعىتتالعان حالىقارالىق كۇش-جىگەردىڭ ىرگەتاسى بولىپ تابىلادى.
يادرولىق قارۋسىزدانۋ مەن يادرولىق قارۋدى تاراتپاۋدىڭ جاھاندىق رەجيمىن نىعايتۋدىڭ بەلسەندى جاقتاۋشىسى رەتىندە قازاقستان بارلىق تاراپتاردىڭ شارت ەرەجەلەرىن مۇلتىكسىز ورىنداۋىن قولدايدى.
يادرولىق جانە يادروسىز مەملەكەتتەر اراسىنداعى ۋاعدالاستىققا نەگىزدەلگەن وزگە حالىقارالىق كەلىسىم بولماعاندىقتان ي ا ق ت ش تەڭدەسسىز بىرەگەي قۇجات بولىپ قالۋدا.
2018-جىلعى 18- قاڭتاردا ب ۇ ۇ قاۋىپسىزدىك كەڭەسىنىڭ «جاپپاي قىرىپ-جويۋ قارۋدى تاراتپاۋ: سەنىمدى نىعايتۋ شارالارى» اتتى تاقىرىپتىق بريفينگىندە قازاقستان پرەزيدەنتى ن. نازاربايەۆ ءبىرقاتار باستامالاردى، اتاپ ايتقاندا، ي ا ق ت ش- تان شىعۋدى قيىنداتۋ بويىنشا شارالار ازىرلەۋدى جانە شارت ەرەجەلەرىن بۇزاتىن ەلدەرگە قاتىستى جازالاۋ شارالارىن قولدانۋدى ۇسىندى.
قازاقستان 2045-جىلى ب ۇ ۇ- نىڭ ءجۇز جىلدىق مەرەيتويىنا وراي يادرولىق قاۋىپ-قاتەردەن ازات الەمگە قول جەتكىزۋگە باعىتتالعان مەملەكەت باسشىسىنىڭ باستامالارىن ىسكە اسىرۋدى جالعاستىرۋعا نيەتتى.