بۋراباي مەن زەرەندى 24- شىلدەدەن باستاپ جابىلادى
بۇل تۋرالى اقمولا وبلىسىنىڭ تۋريزم باسقارماسى Instagram پاراقشاسىندا مالىمەت تاراتتى.
«اقمولا وبلىسى تۋريستىك بيزنەس وكىلدەرىنە ەسكەرتەمىز. كارانتين شارالارىنىڭ كۇشەيۋىنە جانە تۋريستىك ورىنداردا دەمالۋشىلاردىڭ جاۋاپكەرشىلىگىنىڭ تومەندىگىنە بايلانىستى 24- شىلدە ساعات 00:00 دەن باستاپ 3- تامىزعا دەيىن اقمولا وبلىسىنىڭ تۋريستىك ايماقتارى جابىلادى» دەلىنگەن باسقارمانىڭ مالىمەتىندە.
تۋريستىك ايماقتىڭ اينالاسىنا تۇگەل بلوكپوستار قويىلىپ، كولىك كىرۋىنە تىيىم سالىنادى. 24- شىلدەگە دەيىن قوناق ۇيگە كەلىپ، جايعاسىپ ۇلگەرگەن ادامدار دەمالىس بازاسىنىڭ ىشىندە قالا بەرەدى. كۋرورتتاعى ادامدار ماسكا تاعىپ، الەۋمەتتىك اراقاشىقتىقتى ساقتاۋى ءتيىس. وتەلەرلەر وسى ۋاقىت ارالىعىندا برون قابىلدامايدى.
«مەملەكەتتىك تاپسىرىس بويىنشا جۇمىس ىستەيتىن ساناتوريلەر مەن كۋرورت نىساندارى سانيتارلىق- دەزينفەكتسيالىق رەجيمدى كۇشەيتىپ، جۇمىسىن جالعاستىرا بەرەدى. جاعاجايدى، ساۋنا مەن باسسەيندى جالعا بەرۋ قىزمەتى توقتاتىلادى. جاعالاۋدا ورنالاسقان قايىق ستانسالارى، ساۋدا جانە ويىن-ساۋىق نۇكتەلەرى جابىلادى. سوندىقتان جاعدايعا تۇسىنىستىكپەن قاراپ، وسى ۋاقىت ارالىعىندا دەمالىس ورىندارىنا بارۋدان باس تارتۋىڭىزدى سۇرايمىز» دەپ ەسكەرتەدى مەكەمەدەن.