استانادا الداعى بەس جىلدا 24 مەكتەپ سالىنادى

استانا. قازاقپارات - جاڭا وقۋ جىلىنا وراي استانا اكىمدىگى قالا مەكتەپتەرى تۋرالى سيفرلىق مالىمەتتەردى جاريالادى، دەپ حابارلايدى قازاقپارات.

اكىمدىكتىڭ حابارلاۋىنشا، بۇگىندە استانادا 105 ورتا ءبىلىم مەكەمەسى بار، ونىڭ 85 ى مەملەكەتتىك، 1 -كەشكى، 15 -جەكەمەنشىك جانە تورتەۋى - رەسپۋبليكالىق ماڭىزى بار مەكتەپتەر.

«جاڭا وقۋ جىلىندا استانا مەكتەپتەرىنە 160 مىڭ وقۋشى باردى، ونىڭ اراسىندا 18 مىڭ ءبىرىنشى سىنىپ وقۋشىسى بار. ماۋسىمايىنان باستاپ، 1 -سىنىپقا قابىلداۋ ءۇشىن ەلەكتروندى جانە قاعاز جۇزىندە 16 مىڭنان استام ءوتىنىش تىركەلدى»، - دەلىنگەن اكىمدىكتىڭ رەسمي حابارلاماسىندا.

سونىمەن بىرگە اكىمدىك استانادا سالىناتىن جاڭا مەكتەپتەر جونىندە باياندادى.

«2018 -جىلى - 8 مەكتەپ جوندەۋدەن وتسە، سوڭعى 4 جىلدا 22 ءبىلىم ءبىلىم بەرۋ ورداسىندا كۇردەلى جوندەۋ جۇمىستارى جۇرگىزىلدى. الداعى 5 جىلدا استانادا 24 مەكتەپ پەن 10 قوسىمشا عيمارات قۇرىلىسى جوسپارلانىپ وتىر، سونداي-اق 50 مىڭ ورىندى قامتيتىن جەكەمەنشىك مەكتەپتەر اشۋ كوزدەلگەن. بۇل قادامدار ءۇش اۋىسىمدى ماسەلەنى شەشۋگە كومەكتەسەدى»، - دەپ حابارلادى ەلوردا اكىمدىگى.

وقۋ عيماراتتارىندا بالالارعا قولايلى جاعداي جاساۋ ءۇشىن جاڭا وقۋ جىلىندا 42 مەكتەپتە اۋىز سۋ فونتانى، 13 مەكتەپتە باستاۋىش سىنىپ وقۋشىلارى ءۇشىن جەكە شكافتار ورناتىلعان.

«مەكتەپتەر روبوتوتەحنيكا كابينەتتەرىمەن، كومپيۋتەرلىك، ينتەراكتيۆتى جانە STEM زەرتحانالارىمەن جابدىقتالادى، ءاربىر سىنىپقا Wi-Fi جەلىسى وتكىزىلەدى. قاعازبەن بايلانىستى جۇمىستاردى قىسقارتۋ ماقساتىندا، ەلەكتروندى جۋرنالدار مەن كۇندەلىكتەر جۇيەسى ەنگىزىلەدى. اتا- انالار مەن پەداگوگتار ءۇشىن وسى جىلدان باستاپ ۇيالى قوسىمشا جۇمىس ىستەيدى»، - دەيدى اكىمدىكتىڭ باسپا ءسوز قىزمەتى.