قازاقستاندا جىل باسىنان 246 بالادا قاتەرلى ىسىك انىقتالدى
«2018 -جىلدىڭ العاشقى 6 ايىندا 246 بالادا قاتەرلى وسكىندەر پايدا بولعان، ونىڭ 113-ىندە - اققان اۋرۋى، 133 بالادا ليمفوما مەن ۇلكەن ىسىكتەر انىقتالدى»، - دەپ جاۋاپ بەردى ق ر دەنساۋلىق ساقتاۋ مينيسترلىگى مەديتسينالىق كومەكتى ۇيىمداستىرۋ دەپارتامەنتىنىڭ انا مەن بالا باسقارماسى رەداكسيانىڭ ساۋالىنا.
سونداي-اق، مينيسترلىك قازاقستاندا جىل سايىن شامامەن 600 بالا قاتەرلى ىسىك اۋرۋلارىنا شالدىعاتىنىن اتاپ ءوتتى.
«2017 -جىلدىڭ 12 ايىندا 610 بالادا قاتەرلى وسكىن تابىلعان، ونىڭ 230 ىندا اققان اۋرۋى، 374-ىندە ىسىك بولعان. 2016 -جىلى 510 بالادا قاتەرلى ىسىك انىقتالعان ەدى»، - دەپ حابارلادى مينيسترلىكتەن.
ماماندار بالالارعا قولدانىلىپ جاتقان ەم-دومداردىڭ جاڭا تاسىلدەرىمەن دە ءبولىستى.
«25 جىلدان استام ۋاقىت بويى BFM نەمىس باعدارلاماسى قولدانىلىپ كەلەدى. باعدارلاما اياسىندا ليمفوبلاستى اققان اۋرۋىنان ايىققان بالالار سانى - %76,3 دەيىن، ال ميەلوبلاستى اققان اۋرۋىنان جازىلعان بالالار سانى %42 دەيىن كوتەرىلگەن. ينتەنسيۆتى ەمدەۋدەن سوڭ، رەميسسياعا كەتكەن ناۋقاستار سانى جىلدان- جىلعا ارتىپ كەلەدى. 2016 -جىلى - 1866 بالا، 2017 -جىلى 2000 نان استام بالا دەرتتەن ايىقتى»، - دەلىنگەن مينيسترلىك جاۋابىندا.
دەنساۋلىق ساقتاۋ سالاسىنىڭ ساراپشىلارى 2012 -جىلدان باستاپ، بالالاردىڭ پوليحيميالىق تەراپيانىڭ زاماناۋي جوعارى دوزالى باعدارلامالارى بويىنشا ەمدەلىپ جاتقانىن حابارلادى. ساراپتاما ناتيجەسىنە سايكەس، تەراپيا تيىمدىلىگى %66,9 قۇراعان، ونىڭ اراسىندا رەتينوبلاستوما (%96)، وستەوساركوما (%91,7)، نەفروبلاستوما (%82,4)، گەرمينوگەندى- جاسۋشالىق ىسىكتەر جانە حودجكين ليمفومالارى (%75) اناعۇرلىم تيىمدىرەك ەمدەلگەن.
«اۋرۋدىڭ ەرتەرەك انىقتالۋى تەراپيا ناتيجەلەرىنە ىقپال ەتەدى. 2017 -جىلى ءتۇرلى ىسىكتەر مەن ليمفومالار 374 بالانىڭ 108 ىندە II-I ساتىدا، 266 بالادا - III- IV ساتىدا انىقتالعان ەدى. قاتەرلى ىسىكتى II-I ساتىدا انىقتاۋ كورسەتكىشى %37- تەن (2016 ج) %38,2 كە (2017 ج) كوتەرىلدى»، - دەپ حابارلادى دەنساۋلىق ساقتاۋ مينيسترلىگىنەن.