اقمولا وبلىسىندا 242 تۇلەك مەكتەپتى «التىن بەلگىگە» اياقتادى

كوكشەتاۋ. قازاقپارات - كوكشەتاۋ قالاسىندا ابىلاي حان الاڭىندا وتكەن سالتاناتتا ۇزدىك مەكتەپ تۇلەكتەرىنە «التىن بەلگىلەر» تاپسىرىلدى، دەپ حابارلايدى قازاقپارات ءتىلشىسى.

سالتاناتتى شاراعا ايماق باسشىسى ەرمەك مارجىقپايەۆ قاتىستى. ول مەكتەپ ءبىتىرۋشى تۇلەكتەرگە «التىن بەلگىلەر» مەن ۇزدىك اتتەستاتتاردى، سونىمەن قاتار 100 جانە 80 مىڭ تەڭگە اقشالاي سەرتيفيكاتتار تابىس ەتتى.

«سىزدەر ماڭىزدى، جاۋاپتى شەشىمدەر قابىلداۋ الدىندا تۇرسىزدار. سىزدەر جاسسىزدار، كۇش- قۋات پەن بولاشاققا ۇلكەن جوسپارلارعا تولىسىزدار. بۇگىن قازاقستاننىڭ پرەزيدەنتى قاسىم- جومارت توقايەۆ ۇلىقتاۋ راسىمىندە اتاپ وتكەندەي، سىزدەردىڭ الدارىڭىزداعى ەلىمىزدىڭ دامۋىنا قوساتىن ۇلەستەرىڭىز زور. ەلباسى 2019 -جىلدى جاستار جىلى دەپ جاريالادى. سىزدەردىڭ ەڭ ۇلكەن ارماندارىڭىزدى جۇزەگە اسىرىپ، جەكە جەتىستىكتەرگە قول جەتكىزۋ ءۇشىن كوپ مۇمكىندىكتەر جاسالادى»، - دەپ اتاپ ءوتتى وبلىس اكىمى.

 

ەرمەك مارجىقپايەۆ جاستارعا الدىنا ماقسات قويىپ، ومىردە كەزدەسەتىن قيىندىقتاردان قورىقپاۋعا شاقىردى. سونىمەن قاتار، وقۋشىلارعا قاجەتتى ءبىلىم بەرىپ قانا قويماي، ءوز ءىس-ارەكەتىنە جاۋاپ بەرۋگە بارلىق كۇش-جىگەرىمەن تىرىسقان مۇعالىمدەردىڭ ەڭبەگىنە ەرەكشە توقتالدى.

قۇتتىقتاۋ ءراسىمى ءداستۇرلى ۆالس بيىمەن جانە تۇلەكتەردىڭ قوشتاسۋ فلەشموبىمەن اياقتالدى.

ايتا كەتەيىك، بيىلعى جىلى اقمولا وبلىسىندا 4606 تۇلەك مەكتەپتى ءبىتىردى، ونىڭ 242 ى «التىن بەلگى»، 175 ى ۇزدىك اتتەستات يەگەرى. 2018-2019 وقۋ جىلىنىڭ قورىتىندىسى بويىنشا وبلىستىڭ 710 وقۋشىسى وبلىستىق، رەسپۋبليكالىق جانە حالىقارالىق وليمپيادالاردىڭ جەڭىمپازى اتاندى. ونىڭ 18 ى بيىلعى جىلعى مەكتەپ بىتىرۋشىلەر. ولاردىڭ دەنى ءال-فارابي اتىنداعى قازاق ۇلتتىق ۋنيۆەرسيتەتىنىڭ، نازاربايەۆ ۋنيۆەرسيتەتى مەن باسقا دا ج و و-لاردىڭ وقۋ گرانتتارىنا يە بولدى.