سىبايلاس جەمقوردى ۇستاپ بەرگەندەر 240 مىڭ تەڭگە سىياقى الادى

استانا. قازاقپارات - مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ ءتوراعاسى اليك شپەكبايەۆ سىبايلاس جەمقورلىققا قاتىستى قۇقىق بۇزۋشىلىق تۋرالى اقپاراتپەن بولىسكەن ازاماتتار قۇقىقتىق قورعاۋمەن قامتاماسىز ەتىلەتىنە كەپىلدىك بەرىلەتىنىن ءمالىم ەتتى.

بۇل تۋرالى اگەنتتىك ءتوراعاسى فەيسبۋكتەگى پاراقشاسىندا جازدى.

«ازاماتتىق سانالىلىق - قۇر ءسوز ەمەس. ءاربىر قازاقستاندىق ساناسىنداعى سىبايلاس جەمقورلىقتى جەڭە بىلگەندە ەلىمىزدە بۇل قۇبىلىستى جەڭەتىنىمىزگە سەنەمىن. ءارقايسىسىمىز ءقازىر جانە بولاشاقتا سىبايلاستىق جەمقورلىققا ورىن جوق دەپ ءمالىم ەتكەندە، ەڭ باستىسى - ءاربىر ازامات وعان قارسى كۇرەسە باستاعاندا عانا جەڭىس كەلەدى.

دوستار، ەگەر دە سىبايلاس جەمقورلىق قۇقىق بۇزۋشىلىقتارى، ياعني پارانى بوپسالاپ الۋ نەمەسە بەرۋ، بيۋدجەت قارجىسىن جىمقىرۋ جوسپارى، لاۋازىمدىق وكىلەتتىكتەرىن اسىرا پايدالانۋ جاعدايلارىنىڭ كۋاگەرى بولىپ جاتساڭىزدار، تەز ارادا اگەنتتىككە حابارلاسىڭىزدار.

ءبىزدىڭ call-ورتالىعىمىزدىڭ ءنومىرى 1424. تاۋلىك بويى جۇمىس جاسايدى. مەنىڭ جەكە پوشتام [email protected].

بىردە ءبىر ءوتىنىشتىڭ قاراۋسىز قالمايتىندىعىنا كەپىلدىك بەرەمىن. اقپاراتپەن بولىسكەن ازاماتتار قۇپيالىلىق جانە قۇقىقتىق قورعاۋمەن قامتاماسىز ەتىلەدى.

اقپارات راستالعان جانە سوتتا ايىپتاۋ ۇكىمى بولعان جاعدايدا، مالىمەت بەرۋشىگە 240 مىڭ تەڭگەگە سىياقى بەرىلەدى»، - دەپ جازدى اليك شپەكبايەۆ.