قوسشىدا جىل سوڭىنا دەيىن 2400 وقۋشىنى قامتيتىن مەكتەپ پايدالانۋعا بەرىلەدى
بۇل تۋرالى ءوزىنىڭ Facebook پاراقشاسىندا ق ر ءبىلىم جانە عىلىم ءمينيسترى اسقات ايماعامبەتوۆ جازدى، دەپ حابارلايدى قازاقپارات.
«بۇگىن اقمولا وبلىسىنداعى 2№ قوسشى ورتا مەكتەبىندە بولدىم. ايماقتاعى ەڭ پروبلەمالىق مەكتەپتەردىڭ ءبىرى بولعاندىقتان ءدال وسى ءبىلىم بەرۋ ۇيىمىن تاڭدادىم. بۇل وقۋ ورنىندا بۇگىن 600 دەن استام بالا مەكتەپ تابالدىرىعىن اتتادى. الفاۆيت بويىنشا 1-سىنىپتىڭ رەتتىلىگى «ى» ارپىنە دەيىن جەتەدى. ءبىلىم ورداسىنداعى وقۋشى ورىندارىنىڭ سانى 1200 الۋشىعا جەتەدى. وقۋ پروتسەسى ءۇش اۋىسىمدا جۇرگىزىلەدى»، - دەپ جازدى مينيستر.
ونىڭ سوزىنشە، ءدال وسى ماسەلەنى مەملەكەت باسشىسى قاسىم-جومارت كەمەل ۇلى توقايەۆ ءوزىنىڭ بۇگىنگى قازاقستان حالقىنا جولداۋىندا ايتتى.
پرەزيدەنت اتاپ وتكەندەي، ۋربانيزاتسيا مەن دەموگرافيانىڭ وسۋىنە بايلانىستى 2025-جىلعا قاراي وقۋشى ورنىنىڭ تاپشىلىعى شامامەن 1 ميلليوندى قۇرايدى. ماسەلەنى شەشۋ ءۇشىن بيىل 200 جاڭا مەكتەپتى پايدالانۋعا بەرۋ جوسپارلانىپ وتىر.
«ال، 2025-جىلعا دەيىن ءبىزدىڭ الدىمىزعا اكىمدىكتەرمەن بىرلەسە وتىرىپ، 1 مىڭ مەكتەپ سالۋ بويىنشا مىندەت قويىلدى. اقمولا وبلىسىنىڭ قوسشى قالاسىنداعى مەكتەپتەردەگى وقۋشى ورنىنىڭ تاپشىلىعى ماسەلەسىنە كەلەتىن بولساق، وسى جىلدىڭ سوڭىنا دەيىن بۇل جەردە 2400 وقۋشىعا ارنالعان ءارى ەكى اۋىسىمدا جۇمىس ىستەيتىن جاڭا مەكتەپ اشىلادى دەپ جوسپارلانىپ وتىر. كەلەسى جىلى 2400 وقۋشىعا ارنالعان ەكى اۋىسىمدا جۇمىس ىستەيتىن تاعى ءبىر مەكتەپ اشىلادى. سونىمەن قاتار قالادا 2023-جىلعا دەيىن تاعى بىرنەشە مەكتەپ سالۋ جوسپاردا بار»، - دەدى اسحات ايماعامبەتوۆ.
سونداي-اق مەكتەپتەر سالۋ جونىندەگى جۇمىس بارلىق وڭىردە وزىق قارقىنمەن جۇرگىزىلۋى تيىستىگىن اتاپ ءوتتى.
اكىمدىكتەر مەكتەپ قۇرىلىسى ءۇشىن جەر ۋچاسكەلەرىن الدىن الا رەزەرۆكە ۇستاپ، تەك ماقساتتى پايدالانىلۋىن قامتاماسىز ەتۋى قاجەت.
«مەكتەپ قۇرىلىسى بارىسىندا قوعامدىق مونيتورينگتى قامتاماسىز ەتۋ جانە پرەزيدەنت تاپسىرماسىن ورىنداۋ ءۇشىن ارنايى اقپاراتتىق پورتال دايىنداپ جاتىرمىز. ول جەردە قانداي ەلدىمەكەندە مەكتەپ سالىناتىنىن، قۇرىلىستىڭ اعىمداعى جاعدايى مەن بارىسىن كورۋگە بولادى. ساپالى ءبىلىم، جايلى جانە قاۋىپسىز جاعداي جاساۋ ءۇشىن ەڭ الدىمەن ماتەريالدىق-تەحنيكالىق بازانى جانە وقىتۋ ءۇشىن سانيتارلىق نورمالارعا سايكەس جاعدايلاردى قامتاماسىز ەتۋ قاجەت ەكەنىن ءتۇسىنۋ قاجەت»، - دەلىنگەن ءمينيستردىڭ پاراقشاسىندا.