ەلوردادا كەشە ءبىر كۇندە 23 ادامعا قوعامدىق ورىندا تۇكىرگەنى ءۇشىن ايىپپۇل سالىنعان
بۇل تۋرالى قالالىق پوليتسيا دەپارتامەنتى جەرگىلىكتى پوليتسيا قىزمەتى باسقارماسىنىڭ باستىعى ارمان ايتماعامەتوۆ ايتتى، دەپ حابارلايدى قازاقپارات ءتىلشىسى.
«قازىرگى تاڭدا قۇقىق بۇزۋدىڭ مۇنداي ءتۇرى كوشەدەگى كامەرالار ارقىلى اۆتوماتتى رەجيمدە دە، پوليتسيا قىزمەتشىلەرىنىڭ قاداعالاۋى ناتيجەسىندە دە انىقتالادى. ارينە، ازاماتتاردىڭ حابارلاۋى ارقىلى دا بەلگىلى بولىپ جاتادى. ەگەر مۇنداي ارەكەتكە كۋا بولساڭىز، ءتارتىپ بۇزىلعان ءساتتى فوتو نەمەسە ۆيدەو تۇرىندە تىركەپ، «102» موبيلدىك قوسىمشاسى ارقىلى مالىمدەۋگە بولادى»، - دەدى ول بريفينگىدە.
ايتۋىنشا، قوعامدىق ءتارتىپ بۇزۋدىڭ اتالعان ءتۇرى كوبىنەسە كوشەدەگى كامەرالار ارقىلى انىقتالادى.
«كەشەگى ءبىر كۇننىڭ وزىندە نۇر- سۇلتان قالاسى بويىنشا پوليتسيا قىزمەتكەرلەرى ءدال وسى تۇكىرۋ ارەكەتىنە جاتاتىن 23 اكىمشىلىك زاڭ بۇزۋ فاكتىسىن انىقتادى. ولاردىڭ ءبارى اكىمشىلىك جاۋاپقا تارتىلدى. انىقتالعان 23 جايتتىڭ 17 سى كوشەدەگى كامەراعا ءتۇسىپ قالسا، التاۋىن پوليتسيا قىزمەتكەرلەرى تىركەگەن»، - دەدى ارمان ايتماعامەتوۆ.