مەتروكوپىر قيراپ 23 ادام قازا تاپتى

مەحيكو. قازاقپارات - مەكسيكا استاناسى مەحيكو قالاسىنىڭ مەتروپوليتەنىندە قايعىلى وقيعا بولدى.

پويىز ءوتىپ بارا جاتقان ەستاكادا وپىرىلىپ ءتۇسىپ، كەم دەگەندە 23 ادام قازا تاپتى، ولاردىڭ اراسىندا بالادا بار.

بۇل تۋرالى قازاقپارات Euronews-كە سىلتەمە جاساپ حابارلايدى.

سوڭعى مالىمەت بويىنشا، زارداپ شەككەندەر سانى - 70 ادام. ولاردىڭ كوبى اۋرۋحاناعا جەتكىزىلگەن. بىرنەشە ادام اۋىر حالدە جاتىر.

وقيعا دۇيسەنبى كۇنى، جەرگىلىكتى ۋاقىت بويىنشا كەشكى ساعات 22 دە مەترونىڭ 12-جەلىسىندەگى «وليۆوس» جانە «تەسونكو» ستانسالارىنىڭ اراسىندا بولعان.

كوپىردىڭ استىندا كولىك جولى ورنالاسقان. پويىز قۇرامىنىڭ ەكى ۆاگونى مەن ەستاكادانىڭ ءبىر بولىگى كوپىر استىنداعى جولمەن وتكەن كولىكتەردىڭ ۇستىنە قۇلادى.

قازىرگى كەزدە قۇتقارۋ وپەراتسياسى اياقتالدى. وقيعانىڭ سەبەپتەرى انىقتالىپ جاتىر.

ەستاكادا كولىكتىڭ ءبىرى كوپىر تىرەۋىنىڭ سوققاننان قۇلاعان دەپ حابارلانىپ وتىر. سونداي-اق، مەتروپوليتەننىڭ بۇل جەلىسىنىڭ قۇرىلىسى كەزىندە كوپتەگەن كەمشىلىككە جول بەرىلگەنى بەلگىلى بولدى.