قازاقستاننان ەكسپورتتالاتىن تاۋارلار 23 پايىزعا قىمباتتادى

استانا. قازاقپارات - قازاقستاندا شەتەلگە ەكسپورتتالاتىن تاۋارلاردىڭ باعاسى 2018-جىلدىڭ قاراشا ايىندا بۇعان دەيىنگى ايمەن سالىستىرعاندا 3,5 پايىزعا، 2017-جىلدىڭ جەلتوقسان ايىنا قاراعاندا - 23,4 پايىزعا وسكەن.

ال يمپورتتالاتىن تاۋارلار سايكەسىنشە 0,9 پايىز جانە 8 پايىزعا ءوستى. بۇل تۋرالى ق ر ۇلتتىق ەكونوميكا مينيسترلىگىنىڭ ستاتيستيكا كوميتەتىنە سىلتەمەمەن «قازاقپارات» ح ا ا حابارلايدى.

وتكەن جىلدىڭ قاڭتار-قاراشاسىندا 2017-جىلدىڭ وسىنداي كەزەڭىمەن سالىستىرعاندا قازاقستاندا شەتەلگە ەكسپورتتالاتىن تاۋارلار 23,5 پايىزعا، يمپورتتالاتىن تاۋارلار - 7,2 پايىزعا ارتقان.

جىل باسىنان بەرى ەكسپورتتىق جەتكىزىلىمدەر باعاسى مۇنايعا - 32,2 پايىز، تابيعي گازعا - 25,3 پايىز، مارگانەتس كەندەرىنە - 23,1 پايىز، تەمىر كەندەرىنە - 19,7 پايىز، مىسقا - 17,1 پايىز، فەرروقورىتپالارعا - 14,9 پايىز، قارا مەتالل پروكاتىنا - 12,6 پايىز، كومىرگە - 8,6 پايىز، جوعارىلادى. مىرىشقا كەرىسىنشە، 7,6 پايىز، قورعاسىنعا - 12,4 پايىزعا تومەندەدى.

سونداي-اق باعانىڭ ارپاعا - 19,2 پايىز، ماقتاعا - 9,3 پايىز، ءبيدايعا 16,8 پايىزعا جوعارىلاعانى تىركەلدى. ءجۇننىڭ قۇنى 4,2 پايىزعا ارزانداعان.

يمپورتتالاتىن ونىمدەردەن جەمىس جانە جاڭعاقتار - 59,4 پايىز، قۇس ەتى - 29,2 پايىز، بالىق - 15 پايىز، قانت -13,4 پايىز، كوكونىستەر - 11 پايىز، شاي - 10,1 پايىز، مارگارين - 4,2 پايىز، فارماتسيەۆتيكالىق ونىمدەر - 3,4 پايىز قىمباتتادى. ال كاكاو 1,6 پايىزعا ارزانداي تۇسكەن.

اياق كيىمدەر - 27,9 پايىز، قۇرىلىس ماتەريالدارى - 19,4 پايىز، پلاستماسسا - 13,9 پايىز، توقىما بۇيىمدارى - 13,1 پايىز، قاعاز - 13 پايىزعا قىمباتتادى.