+7 (701) 759 90 19
3 °С : نۇر-سۇلتان
9 °С : الماتى
USD 428.05 EUR 501.2
RUB 5.47 CNY 63.87
جاڭالىقتار

23-29- قىركۇيەكتە ماگنيتتىك داۋىل بولادى: ول ادام اعزاسىنا قالاي اسەر ەتەدى

22 قىركۇيەك 22:16
:ءبولىسۋ
23-29- قىركۇيەكتە ماگنيتتىك داۋىل بولادى: ول ادام اعزاسىنا قالاي اسەر ەتەدى

الماتى. قازاقپارات- استروفيزيكتەردىڭ بولجامىنا سايكەس، قىركۇيەكتىڭ سوڭعى ون كۇندىگىندە ماگنيتتى داۋىل بولادى. بۇل تۋرالى رەنتگەندىك كۇن استرونوميا زەرتحاناسى ءمالىم ەتتى.

قازاقپارات ءتىلشىسى تابيعي قۇبىلىس ادام دەنساۋلىعىنا قانشالىقتى قاۋىپتى ەكەنىن انىقتاپ كوردى. استروفيزيكتەردىڭ ايتۋىنشا، 23-29 - قىركۇيەك ارالىعىندا ماگنيتتىك داۋىل جۇرەدى. جەردىڭ ماگنيتوسفەراسى نەگىزگى سوققىنى 25-28 قىركۇيەكتە الادى، ال داۋىلدىڭ شارىقتاۋ شەگى 27 - قىركۇيەككە كەلىپ تۇر. داۋىلدىڭ كۇشى G1 قۇرايدى.

عالىمدار اراسىندا اتالعان تابيعي قۇبىلىستىڭ ادامدارعا قالاي اسەر ەتەتىندىگى تۋرالى ءالى كۇنگە دەيىن ناقتى پىكىر جوق. الايدا مەديتسينادا ماگنيت ءورىسىنىڭ ادام دەنساۋلىعى مەن ءال- اۋقاتىنىڭ بەلگىلى ءبىر اۋىتقۋىنا اسەرى بارىن جوققا شىعارىلمايدى. ماگنيتتىك داۋىل كەزىندە ادامداردىڭ باسى اينالىپ، جۇرەگى اينىپ نەمەسە قان قىسىمى تومەندەپ كەتۋى مۇمكىن. كارديولوگ- دارىگەر المات قوداسبايەۆتىڭ ايتۋىنشا، ماگنيتتىك داۋىلدىڭ ادامداردىڭ كەز- كەلگەن دەرتىنە، سونىڭ ىشىندە جۇرەك- قان تامىرلارى اۋرۋلارىنىڭ اسقىنۋىنا تىكەلەي اسەر ەتۋىنىڭ دالەلى جوق.

«ءيا، مۇنداي كۇندەرى ادامدار جالپى السىزدىككە شاعىمدانادى. ونى ءجيى ەستىپ تە، كورىپ تە ءجۇرمىز. بۇل اسىرەسە جۇرەك اۋرۋىنا شالدىققاندارعا قاتىستى. ماگنيتتىك داۋىل كۇندەرى قان تامىرلارى جانە جۇرەك اۋرۋلارى بار ادامدار دەنساۋلىقتارىنا كوپ شاعىمدانادى. سول كەزدە ولاردىڭ دەنساۋلىعى كۇرت ناشارلايدى. ولار قاتتى باس اۋرۋىنا، تەز شارشاعىشتىققا، باس اينالۋعا، جۇرەكتىڭ اۋىرسىنۋىنا شاعىمدانادى. الايدا، باسقا دا ومىرلىك سەبەپتەر مۇنداي اۋرۋلارعا اسەر ەتۋى مۇمكىن. بۇل اۋا رايىنىڭ، سترەستىڭ، دەپرەسسيانىڭ، جۇمىس جۇكتەمەسىنىڭ كۇرت وسۋىنەن بولۋى مۇمكىن»، - دەدى دارىگەر.

عالىمدار ماگنيت ءورىسىنىڭ اعزاعا قالاي اسەر ەتەتىنىن ءالى جەتكىلىكتى زەرتتەپ بولعان جوق. دەسەكتە، فرانتسيا، گەرمانيا، قىتاي، يزرايل، ليتۆا، گرۋزيا جانە جۇرەكتىڭ يشەمياسى بار ناۋقاستار قارالاتىن ءبىرقاتار رەسەي كلينيكالارىنىڭ مالىمەتتەرى بويىنشا، ماگنيتتىك داۋىل كەزىندە جۇرەك تالماسى مەن سودان قايتىس بولاتىنداردىڭ سانى ەكى ەسەگە وسكەن.

«ادەتتە ادام اعزاسى مۇنداي كۇندەردى كۇيزەلىس رەتىندە قابىلدايدى. كوپتەگەن ادامداردا تامىر جۇيەسىنىڭ جۇمىسى بۇزىلادى، سونىڭ ىشىندە ميدىڭ تامىرلارىندا. وسى كەزدە دەنساۋلىعى مىقتى ادامداردىڭ دا كوڭىل كۇيى قۇبىلمالى بولادى»، - دەدى المات قوداسبايەۆ.

مۇنداي كەزدە اۋىر جۇمىس ىستەۋدەن اۋلاق بولۋ كەرەك. ءتىپتى جەڭىل كۇيزەلىستىڭ ءوزى ادام اعزاسىنا كەرى اسەر ەتەدى، سوندىقتان ماگنيتتىك داۋىل بولعان كۇندەرى ۋايىمداۋدان، جامان ويلاردان اۋلاق بولۋ كەرەك. دارىگەرلەر قان قىسىمى جوعارى ادامدارعا قاراپايىم ەرەجەلەردى ساقتانۋىن سۇرايدى.

«ماگنيتتى داۋىل كۇندەرى گيپەرتونيالىق ناۋقاستار كوبىرەك سۋ ءىشىپ، تۇزدى تۇتىنۋدى ازايتۋى كەرەك، ويتكەنى تۇز ورگانيزمدەگى سۇيىقتىقتى ۇستاپ، قان قىسىمىنىڭ جوعارىلاۋىنا اكەلەدى. مەتەوسەزىمتال ادامدار ءۇشىن ماگنيتتىك داۋىل كەزىندە جاقسى ۇيىقتاپ، دۇرىس تاماقتانۋى كەرەك. ترومبوزى بار ادامدار (قويۋ قان) قۇرامىندا ءاسپيرينى بار ءدارىنى نەمەسە ءاسپيريننىڭ 75 م گ كومبيناتسياسىن كۇن سايىن قابىلداۋى كەرەك. ءبىراق بۇل پاتسيەنتكە قارسى بولماعان جاعدايدا عانا، ويتكەنى بۇل پرەپاراتتاردى باقىلاۋسىز قابىلداۋ ەروزيانى جانە ءتىپتى اسقازان جاراسىن تۋدىرۋى مۇمكىن»، - دەپ قوستى دارىگەر.

مامانداردىڭ ايتۋىنشا، ماگنيتتىك داۋىلدار ورتا ەسەپپەن جىلىنا 5-6 رەت بولىپ، 2-3 كۇنگە سوزىلادى.


:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات