الماتىداعى تاماقتانۋ ورىندارىنا كەشكى 23:00 گە دەيىن جۇمىس ىستەۋگە رۇقسات بەرىلدى

None
None
الماتى. قازاقپارات - الماتى قالاسىنىڭ مەملەكەتتىك باس سانيتار دارىگەرى جانداربەك بەكشين 25- مامىردان باستاپ جۇمىس ىستەيتىن كافە مەن تاماقتانۋ ورىندارىنا قويىلاتىن تالاپتاردى اتادى، دەپ حابارلايدى قازاقپارات ءتىلشىسى.

«كافەلەرگە قويىلاتىن تالاپ: ۇجىمدىق كەشتەر مەن بانكەتتەر وتكىزۋگە تىيىم سالىنادى. قوعامدىق تاماقتانۋ ورىندارىنا كەشكى ساعات 23:00 گە دەيىن جۇمىس ىستەۋگە رۇقسات بەردىك. ەڭ باستىسى، ۇستەلدەر اراسىنداعى قاشىقتىق كەمىندە ەكى مەتر بولۋى كەرەك. داستارحانعا ءبىر وتباسى مۇشەلەرىن قوسپاعاندا، ءتورت ادامنان ارتىق وتىرۋعا بولمايدى» ، - دەدى ول.

جانداربەك بەكشين قىزمەت كورسەتەتىندەردى، سانيتارلىق تالاپتى ساقتاۋعا شاقىردى.

«كەلگەندەرگە قىزمەت كورسەتەتىن پەرسونالدار مىندەتتى تۇردە ماسكا تاعىپ، قولعاپ كيۋ ءتيىس. ءاربىر كليەنتتەن كەيىن دەزينفەكتسيالاۋ قۇرالدارىن قولدانا وتىرىپ تازالاۋ جۇرگىزىلۋى كەرەك. سونىمەن قاتار، الەۋمەتتىك قاشىقتىق ساقتالۋى قاجەت. ءجىتى رەسپيراتورلىق ۆيرۋستىق ينفەكتسيا بار جانە قىزۋى كوتەرىلىپ تۇرعان ادامدار جۇمىسقا جىبەرىلمەيدى. مۇنىڭ ءبارىن اكىمشىلىك قاداعالاپ وتىرۋى ءتيىس. ءبىز اسحانالارداعى ءوز- وزىنە قىزمەت كورسەتۋ پرينتسيپىن جويدىق. دايىن تاعامدى قىزمەتكەرلەر وزدەرى جەتكىزەدى. وسى سالادا قىزمەت كورسەتەتىندەردى سانيتارلىق تالاپتى ساقتاۋعا شاقىرامىن» ، - دەدى ول.


سوڭعى جاڭالىقتار