بۇگىن «بۋراباي» ۇلتتىق تابيعي پاركىنىڭ قۇرىلعانىنا 22 جىل
12 تامىز 20:12

بۇگىن «بۋراباي» ۇلتتىق تابيعي پاركىنىڭ قۇرىلعانىنا 22 جىل

نۇر-سۇلتان. قازاقپارات - شامامەن 130 مىڭ گەكتار اۋماقتى الىپ جاتقان ۇلتتىق پاركتىڭ فلوراسى مەن فاۋناسىن ساقتاۋ جولىندا 516 مامان ەڭبەك ەتىپ كەلەدى.

پرەزيدەنتتىڭ ءىس باسقارۋشىسى ايبەك دادەبايەۆ پارك ۇجىمىن اتاۋلى كۇنمەن قۇتتىقتادى، دەپ حابارلايدى قازاقپارات.

«تامىز ايىندا پاركتە جۇمىستىڭ قىزا تۇسەتىنى سونشالىق، مەرەكەنى تويلاۋعا دا قول تيمەيدى. قىزمەتكەرلەر كۇندىز-ءتۇنى جۇمىستا. كوكورايلى جەردىڭ اۋماعى شامامەن 130 مىڭ گەكتار ەكەنىن ەسكەرسەك، فلورا مەن فاۋنانى ساقتاۋ وڭاي شارۋا ەمەس ەكەنى ايتپاسا دا تۇسىنىكتى. كوشەت وتىرعىزۋ، جانۋارلاردىڭ قىسقى ازىعىن دايىنداۋدان بولەك، قاۋىپسىزدىككە ءجىتى ءمان بەرۋگە تۋرا كەلەدى.

ءدال قازىر تۋريستىك ماۋسىمنىڭ قىزعان شاعى، ءتارتىپتى قاداعالاۋ كەرەك. وسى جازدا كاسىپورىن قىزمەتكەرلەرى 16 ءورتتىڭ الدىن الدى. وعان قوسا، جىل باسىنان بەرى پارك اۋماعىنان 715 توننادان استام، تۋريستەر كوپتەپ كەلەتىن شىلدە ايىنىڭ وزىندە 292 توننا قوقىس شىعارىلدى.

ۇلتتىق پاركتە 516 ءوز ءىسىنىڭ بىلگىرى جۇمىس ىستەيدى. ورتا ەسەپپەن العاندا ولاردىڭ ەڭبەك تاجىريبەسى 10 جىلدان اسادى. ءابدىراحمانوۆتار، ابىلدينوۆتەر، دوروگوۆتار، كراسنوۋسوۆتار، ماحمەتوۆتەر، وماروۆتار، راحماتۋلليندەر اۋلەتى ءۇشىن بۇل جۇمىس - اتاكاسىپ. مەرەكە بەكاحمەتوۆ، ۆلاديمير كانتسيەۆ، الەكساندر ماكارەنكو، قابدراشيت ماحمەتوۆ جانە باسقا دا قىزمەتكەرلەر قۇرمەتتى ەڭبەك ارداگەرى قاتارىندا.

تابيعي مۇرانى قىزعىشتاي قورعاپ، كەيىنگى بۋىنعا اماناتتاي بىلگەن ەرەن ەڭبەكتەرىڭىز ءۇشىن سىزدەرگە ريزاشىلىعىمدى بىلدىرەمىن! «بۋراباي» م ۇ ت پ بارشا ۇجىم مۇشەلەرىنە مىقتى دەنساۋلىق، مول تابىس جانە باق-بەرەكە تىلەيمىن!» - دەپ جازدى ايبەك دادەبايەۆ تەلەگرام كانالىندا.

جاڭالىقتار