قالا مەن اۋىل وقۋشىلارى اراسىندا ءبىلىم الشاقتىعى 22 بالعا قىسقاردى
بۇل تۋرالى بۇگىن ۇكىمەت وتىرىسىندا وقۋ- اعارتۋ ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.
«ورتا ءبىلىم بويىنشا باستى ماسەلە - ءبىلىم ساپاسىن ارتتىرۋ. وڭىرلەر اراسىنداعى، قالا مەن اۋىل مەكتەپتەرى اراسىنداعى الشاقتىقتى قىسقارتۋ بويىنشا جۇمىس جۇرگىزىلدى. ساپانى باعالاۋ بويىنشى ءبىز سىرتقى جانە ىشكى باقىلاۋ مەحانيزمدەرىن كەڭىنەن قولدانامىز. وسى تۇرعىدا ءبىز ءۇشىن حالىقارالىق PISA زەرتتەۋى ماڭىزدى بولىپ تابىلادى. ءبىز وسى ۇلتتىق جوبا بويىنشا «مەكتەپتەرگە ارنالعان PISA» حالىقارالىق ارنايى زەرتتەۋىن وتكىزۋدى قولعا الدىق»، - دەدى مينيستر.
ونىڭ ايتۋىنشا، حالىقارالىق ساراپشىلاردىڭ بولجاۋىنا سايكەس، پاندەمياعا بايلانىستى PISA زەرتتەۋى بويىنشا ەلىمىزدىڭ كورسەتكىشتەرى 30-40 بالعا تومەندەۋ تاۋەكەلدەرى بار.
«دەگەنمەن، 2021 -جىلى وتكەن «مەكتەپتەرگە ارنالعان PISA» ناتيجەلەرى وقۋشىلاردىڭ ءبىلىم ساپاسىنىڭ وقۋ ساۋاتتىلىعى بويىنشا 30 بالعا، ماتەماتيكالىق ساۋاتتىلىق - 24 بالعا، جاراتىلىستانۋ باعىتى بويىنشا 11 بالعا وسكەنىن كورسەتتى. بۇل وتە جاقسى كورسەتكىش. ال قالالىق جانە اۋىلدىق وقۋشىلار ناتيجەلەرىنىڭ اراسىنداعى الشاقتىق 22 بالعا، ءارتۇرلى باسقا تىلدە وقيتىن وقۋشىلار ناتيجەلەرىنىڭ اراسىنداعى الشاقتىق 21 بالعا قىسقاردى»، - دەدى اسحات ايماعامبەتوۆ.
ءمينيستردىڭ اتاپ وتۋىنشە، ءبىلىم بەرۋ ۇيىمدارىندا قاۋىپسىزدىك جانە قولايلى جاعداي جاساۋ ماسەلەلەرى تۇراقتى باقىلاۋعا الىنعان.
ەرەكشە ءبىلىمدى قاجەت ەتەتىن بالالاردى پسيحولوگيالىق- پەداگوگيكالىق قولداۋمەن قامتۋدى ۇلعايتۋ ءۇشىن 2021 -جىلى 8 پ م پ ك جانە 6 تۇزەتۋ كابينەتى، بيىل تاعى 3 پ م پ ك مەن 4 تۇزەتۋ كابينەتى اشىلدى. ناتيجەسىندە 175 مىڭ مۇمكىندىگى شەكتەۋلى بالا ارنايى پسيحولوگيالىق- پەداگوگيكالىق قولداۋمەن قامتىلدى.
«وسى جىلدان باستاپ ەرەكشە بالاقايلاردى قولداۋ ءۇشىن ءبىز العاش رەت مەملەكەتتىك تاپسىرىس ورنالاستىراتىن بولدىق. پرەزيدەنتتىڭ قولداۋىنىڭ ارقاسىندا زاڭعا جاڭا وزگەرىستەر ەڭگىزىلدى. بۇل شەشىم ەرەكشە بالالار ءۇشىن ينكليۋزيۆتى ءبىلىمدى دامىتۋعا، كەزەكتىلىكتى ازايتۋعا جانە مۇقتاج بالالارعا تەڭ ءبىلىم بەرۋ قىزمەتتەرىن الۋعا مۇمكىندىك بەردى»، - دەدى ول.