قازاقپارات كۇنتىزبەسى: 22- قاراشا
اتاۋلى كۇندەر
دۇنيەجۇزىلىك ۇل بالالار كۇنى
مەرەكەنىڭ پايدا بولۋ تاريحى بەلگىسىز. الايدا بۇل مەرەكە بۇكىل الەمدە حالىقتىڭ قولداۋىنا يە بولدى، سەبەبى بارلىق اتا-انالار ءوز بالالارىنا، ۇلدارىنا -بولاشاق اكەلەرگە بار جاقسىلىقتى تىلەيدى، ومىرلەرى ماحابباتقا جەتىستىككە تولى بولسا دەيدى. سوندىقتان 22- قاراشادا كوپتەگەن اتا-انالار ۇلدارىن ايتۋلى مەيراممەن قۇتتىقتايدى.
ەستە قالار وقيعالار
1997-جىلى الماتىدا قازاقستان دارىگەرلەرىنىڭ 1- سەزى ءوتتى.
1998-جىلى الماتىدا اقىن حاميت ەرعاليەۆ تۇرعان ۇيگە ەسكەرتكىش تاقتا ورناتىلدى.
2011-جىلى قاراعاندىدا قازاقستان رەسپۋبليكاسىنىڭ 20 جىلدىعىنا وراي قالا ورتالىعىنداعى الاڭعا تاۋەلسىزدىك مونۋمەنتى ورناتىلدى. مونۋمەنتتىڭ بيىكتىگى - 47 مەتر، سالماعى - 16 توننا.
2012-جىلى حالىقارالىق كورمەلەر بيۋروسىنىڭ 161 مۇشە-مەملەكەتى وكىلدەرىنىڭ جاسىرىن داۋىس بەرۋى بارىسىندا استانا بەلگيالىق لەج قالاسىن باسىپ وزىپ، ەكسپو-2017 حالىقارالىق مامانداندىرىلعان كورمەسىن وتكىزەتىن قالا بولىپ تاڭدالدى.
قازاقستان ەلورداسى ۇسىنعان تاقىرىپ - «بولاشاق ەنەرگياسى» - ەنەرگيانىڭ بالامالى كوزدەرىنە جانە «جاسىل» تەحنولوگيالارعا ارنالعان.
استاناداعى ەكسپو-2017 ورتالىق ازيا ايماعى مەن تمد ەلدەرىندە وتكىزىلگەن العاشقى حالىقارالىق كورمە بولدى.
2014-جىلى قازاقستاندا جاسالعان جۇك تەپلوۆوزى اشحابادقا ەكسپورتقا جونەلتىلدى.
2016-جىلى استانادا «قازاقستاندا جاسالعان» برەندىن باسقارۋ اگەنتتىگى قۇرىلدى. ونىڭ اياسىندا «حالىق ماركاسى» 100 ۇلتتىق برەندتى قۇرۋ جوباسى ىسكە قوسىلدى. اتالمىش جوباعا تانىمال ارتىستەر، سپورتشىلار مەن دەپۋتاتتار دا تارتىلدى. جاڭا 100 ۇلتتىق برەند تاماق ونەركاسىبى، جيھاز، ءۇي قاجەتتىلىكتەرى، كيىم-كەشەك جانە اياق كيىم سالالارىندا پايدا بولدى.
2016-جىلى ماڭعىستاۋ وبلىسىنىڭ تۇرعىنى ХІІ-ХІІІ عاسىرلاردىڭ التىن تيىندارىن تاۋىپ الدى. التىن تيىندار حورەزمشاح اۋلەتىنە تيەسىلى بولۋى مۇمكىن.
2017-جىلى سەۋلدە وتكەن گىر تاسىن كوتەرۋ سپورتىنان الەم چەمپيوناتىندا كوكشەتاۋلىق بوريس نۇعمانوۆ 70-74 جاس ارالىعىنداعى ارداگەرلەر ساناتىندا الەمنىڭ ابسوليۋت چەمپيونى اتاندى. ول جۇلقي كوتەرۋدەن الدىنا جان سالمادى.
2018-جىلى تانىمال وتاندىق حيميك عالىم زۇلقايىر مانسۇروۆقا يۋنەسكونىڭ «نانوعىلىم مەن نانوتەحنولوگيالار دامۋىنا قوسقان ۇلەسى ءۇشىن» مەدالى تابىستالدى. ماراپاتتاۋ ءراسىمى اتالعان ۇيىمنىڭ پاريجدەگى باس پاتەرىندە ءوتتى.
مەدال تۇجىرىمداماسىن 2010-جىلى يۋنەسكو باس ديرەكتورى بەكىتىپ، سول كەزدەن بەرى ول جىل سايىن وسى سالاداعى الەمدىك عىلىمنىڭ العا باسۋىنا ەلەۋلى ۇلەس قوسقان كورنەكتى عالىمدار مەن ۇيىمدارعا بەرىلەدى. وتاندىق عالىم بيىل ءوزىنىڭ «نانوكومىرتەك ماتەريالدارىن وڭدەۋ، كومىرتەكتى نانوتۇتىكتەر مەن گرافەندەردى جانۋ كۇيىندە سينتەزدەۋ تەحنولوگيالارىنا زەرتتەۋگە قوسقان ۇلەسى» ءۇشىن ماراپاتتالدى.