08:41, 14 - قاراشا 2018 | GMT +6
قوستاناي وبلىسىندا وسىرىلگەن سيىردىڭ بۇزاۋى 220 كەلى تارتادى
قوستاناي. قازاقپارات - قوستاناي وبلىسىنىڭ كاسىپكەرلەرى شەتەلدەن ەتتى سيىر الدىرىپ، شارۋاشىلىعىن دوڭگەلەنتىپ وتىر، دەپ حابارلايدى قازاقپارات حابار 24 اگەنتتىگىنە سىلتەمە جاساپ.
وسى جولى قارابالىق اۋدانىنداعى سەرىكتەستىك «سىباعا» باعدارلاماسى بويىنشا امەريكا قۇراما شتاتتارىنان 1843 باس ابەردين انگۋس سيىرىن ساتىپ الدى. ەتتى ءىرى قارانىڭ ەرەكشەلىگى - سەگىز ايلىق بۇزاۋى 220 كەلى تارتادى. ءۇش جاستاعى سيىرلار 500 كەلىدەن استام ەت بەرسە، بۇقاسى 850 كەلىدەن اسادى.
جالپى 2010 -جىلدان بەرى توبىل وڭىرىنە شەتەلدەن 13800 باس ءىرى قارا اكەلىنگەن. بۇل ءوز كەزەگىندە مال ونىمدەرى ەكسپورتىن ارتتىرۋعا جول اشادى.
«بۇل مال جەكەلەگەن شارۋاشىلىقتارعا بولىنەدى. ولار ساتىپ الادى. جىلدان- جىلعا مال كوبەيىپ جاتىر. قازىر اۋدان بويىنشا 30 مىڭنىڭ سىرتىندا قارا مال باسى بار. كەزىندە سانىن ازايتىپ العانبىز»، - دەيدى قارابالىق اۋداندىق اۋىل شارۋاشىلىعى ءبولىمىنىڭ باسشىسى اعىباي بەيسەمبايەۆ.